Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ: بند 70-61

جنگ نامہ: بند 70-61

شاہ محمد
June 4th, 2008
5 / 5 (1 Votes)
سُن کے خبر فرنگی دی چڑھے سبھے،
فوجاں بے مُہاریاں ہو تُریاں۔
اگے وار کُوار نا کِسے ڈِٹھا،
اِک دُوسرے دے اگے لگ تُریاں۔
اگے توپاں دے دھنی بھی ہَین گورے،
ونگاں پہِن کھلوتیاں نہیں کُڑِیاں۔
شاہ محمدا، ورجدے جاندیاں نوں،
فوجاں ہو مُہانیاں کدوں مُڑیاں۔ ٦١

چڑھے شہر لاہور تھیں مار دھونسے،
سبھے گبھرو نال ہنکار تُردے۔
اُرے دوہاں دریاواں تے نہیں اٹکے،
پتن لنگھَے نی جا فِروزپور دے۔
اگے چھیڑیا نہیں فرنگیاں نے،
دُہاں دھِراں دے رُلن گے بہُت مُردے۔
شاہ محمدا، بھجنا رنوں بھاری،
جُٹے سورمے آکھ توں کدوں مُڑدے۔ ٦٢

لگی دھمک سارے ہِندوستان اندر،
دِلی، آگرے، جھانسی، حصار میاں۔
بیکانیر، لکھنؤ، اجمیر، جے پور،
پئیاں بھاجڑاں جمنا توں پار میاں۔
چلی سبھ پنجاب دی بادشاہی،
نہیں دلاں دا انت شُمار میاں۔
شاہ محمدا، کِتے نا اٹکنا ای،
سنگھ رہن گے دِلی نوں مار میاں۔ ٦٣

عرضی لِکھی فرنگیاں خالصے نوں :

تُساں کاس نوں جنگ مچاؤندے ہو؟
مہاراج دے نال سی نیم ساڈا،
تُساں سُتیاں کلا جگاؤندے ہو۔
کئی لکھ روپیہ لَے جاؤ ساتھوں،
دیاں ہور جو تُسیں فرماؤندے ہو۔
شاہ محمدا، اساں نا مُول لڑنا،
تُسیں اتنا زور کیوں لاؤندے ہو؟ ٦٤

سِنگھاں لِکھیا خط فرنگیاں نوں :

تینوں ماراں گے اسیں ونگار کے جی۔
سانوں نہیں روپئیاں دی لوڑ کائی،
بھاویں دے توں ڈھیر اُسار کے جی۔
اوہو پنتھ تیرے تے آن چڑھیا،
جیہڑا آیا سی جموں نوں مار کے جی۔
شاہ محمدا، ساہمنے ڈاہ توپاں،
سُورے کڈھ میدان نِتار کے جی۔ ٦٥

پَینچ لِکھدے سارِیاں پڑتالاں دے،
ساڈی اج ہے وڈی چلنت میاں۔
وِیر سنگھ نوں ماریا ڈاہ توپاں،
نہیں چھڈیا سادھ تے سنت میاں۔
اساں مارے چوپھیر دے قلعے بھارے،
اساں ماریا کُلو بھٹنت میاں۔
شاہ محمدا، گل تاں سوئی ہونی،
جیہڑی کیرگا خالصہ پنچ میاں۔ ٦٦

دُوربین انگریز نے ہتھ لَے کے،
کِیتا فوج دا سبھ شُمار میاں۔
جِنھیں تھائیں سی جمع جمورکھانے،
کِیتے صاحب معلوم ہزار میاں۔
دارو ونڈیا سوریاں جنگیاں نوں،
دو دو بوتلاں کَیپھ خُمار میاں۔
شاہ محمدا، پی شراب گورے،
ہوئے جنگ نوں تُرت تیار میاں۔ ٦٧

اِک پِنڈ دا نام جو مُدکی سی،
اوتھے بھری سی پانی دی کھڈ میاں۔
گھوڑ چڑھے اکالیئے نویں سارے،
جھنڈے دِتے نی جائے کے گڈ میاں۔
توپاں چلیاں کٹک فرنگیاں دے،
گولے توڑدے ماس تے ہڈ میاں۔
شاہ محمدا، پِچھاں نوں اُٹھ نٹھے،
توپاں سبھ آئے اوتھے چھڈ میاں۔ ٦٨

ڈیرے آن کے بَیٹھ صلاح کردے :

ایتوار اسیں کھنڈا پھڑاں گے جی۔
تیجا سنگھ دی وڈی اُڈِیک سانوں،
اُس دے آئے بغَیر نا لڑاں گے جی۔
صرفہ جان دا نہیں جے تدوں کرنا،
جدوں وِچ میدان دے وڑاں گے جی۔
شاہ محمدا، اندروں اِک ہو کے،
ڈیرے چل فرنگی دے وڑاں گے جی۔ ٦٩

تیجا سنگھ بھی لشکریں آن وڑیا،
عہدیدار سبھے اوتھے آؤندے نی :
کرو حُکم تے تیغ اُٹھائیے جی،
پئے سنگھ کچیچیاں کھاؤندے نی۔
کُونجاں نظر آئیاں بازاں بھُکھیاں نوں،
چوٹاں کَیسیاں ویکھو چلاؤندے نی۔
شاہ محمدا، اوس تھیں حُکم لَے کے،
ہلا کرن دی ڈول بناؤندے نی۔ ٧٠

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels