Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> جنگ نامہ- شاہ محمد >> جنگ نامہ : بند 105-101

جنگ نامہ : بند 105-101

شاہ محمد
June 4th, 2008

پِچھوں بَیٹھ کے سِنگھاں نوں عقل آئی،
کِہی چڑھی ہے زہر دی سان مائی!
کِنھاں کھُندراں وِچ پھسا کے جی،
ساڈے لاہ سُٹے توں تاں گھان مائی۔
ہتھ دھوئے کے مگر کیوں پئی ساڈے،
گھریں اجے نا دینی ایں جان مائی۔
شاہ محمدا، کھوہ ہتھیار بیٹھے،
نال کُڑتیاں لئے پچھان مائی۔ ١٠١

ہُندے آئے نی رناں دے دھُروں کارے،
لنکا وِچ تاں راوَن کُہا دِتا۔
کورو پانڈواں نال کیہ بھلا کِیتا،
اٹھاراں کھوہنیاں کٹک مُکا دِتا۔
راجے بھوج دے مُنہ لگام دِتی،
مار اڈیاں ہوش بُھلا دِتا۔
شاہ محمدا، ایس رانی جِند کوراں،
سارے دیش دا فرش اُٹھا دِتا۔ ١٠٢

رب چاہے تاں کرے گا مہربانی،
ہویا سِنگھاں دا کم اراستا ای۔
وڈی سانجھ ہے ہِندُواں مُسلماناں،
اُنہاں نال نا کِسے دا واسطہ ای۔
اوہدے نال نا بَیٹھ کے گل کرنی،
خُودی آپنی وِچ مُہاستا ای۔
شاہ محمدا، دولتاں جمع کردا،
شاہوکاراں دا پُت گُماشتا ای۔ ١٠٣

جہڑی ہوئی سو لئی ہے ویکھ اکھیں،
اگے ہور کی بنت بناونی جی۔
اِک گھڑی دی کُجھ اُمید ناہیں،
کِسے لئی ہاڑھی کِسے ساونی جی۔
نِکے پوچ ہُن بَیٹھ کے کرن گلاں :
اساں ڈِٹھی فرنگی دی چھاونی جی۔
شاہ محمدا، نہیں معلوم سانوں،
اگے ہور کی کھیڈ کھِڈاونی جی۔ ١٠٤

سمت اُنی سَو دُوسرا اُتریا سی،
جدوں ہویا فرنگی دا جنگ میاں۔
ہَیسی خون دی اوہ زمین پیاسی،
ہویا سُرخ شراب دے رنگ میاں۔
دھرتی وڈھ کے دھوڑ دے بنے بدل،
جَیسے چڑھے اکاش پتنگ میاں۔
شاہ محمدا، سِراں دی لا بازی،
نہیں موڑدے سورمے انگ میاں۔ ١٠٥


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels