Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> انکار - پاش >> اِنکار

اِنکار

پاش
June 20th, 2008

    میرے توں آس نہ کریو کہ میں کھیتاں دا پُت ہو کے
    تُہاڈے چگلے ہوئے سواداں دی گل کراں گا
    جیہناں دے ہڑھ چ رُڑھ جاندی ہے
    ساڈے بچیاں دی توتلی کوِتا
    تے ساڈیاں دھیاں دا کنجک جیہا ہاسا
    میں تاں جد وی کیتی۔۔۔۔۔۔ کھاد دے گھاٹے
    کِسے غریبڑی دی ہک وانگوں پچک گئے گنیاں دی گل ہی کراں گا
    میں دلان دے کھونجے چ پئی ساونی دی فصل
    تے دلان دے بوہے تے کھڑے سیال دی ہی گل کراں گا
    میرے توں آس نہ کریو کہ میں سردی دی رُت کھڑن والے
    پُھلاں دیاں قسماں دے ناں تے
    پِنڈ دیاں کُڑیاں دے ناں کُناں دھراں گا
    میں بینک دے سیکٹری دیاں کھچریاں مُچھاں
    سر پنچ دی تھانے تک لمی پوچھ دی
    تے اوس پورے چڑیا گھر دی
    جو میں آپنی ہک تے پال رکھیا ہے
    جاں اوس عجیب گھر دی
    جو میں آپنی ہِک اندر سانبھ رکھیا ہے
    جاں ایداں دی ہی کوئی کرڑ بڑڑی گل کراں گا
    میرے لئی دل تاں بس اک پان دے پتے ورگا لوتھڑا ہے
    میرے لئی حُسن کوئی مکئی دی لون بھِکی روٹی جیہی لذت ہے
    میرے لئی زندگی گھر دی شراب وانگ
    لُک لُک پین دی کوئی شے ہے
    میرے توں آس نہ کریو کہ میں خرگوش وانگ
    روہیاں دی کولی مہک نوں پولے جیہے سُنگھاں
    میں ہر کسے نوں جوتا لگے بلداں دے وانگ
    کُھرلی اُتے سدھا ہو کے ٹکریا ہاں
    میں جٹاں دے سادھ ہوون توں اُرانہہ دا سفر ہاں
    میں بُڈھے موچی دی گُمی ہوئی اکھاں دی لوء ہاں
میں ٹُنڈے حوالدار دے بجھے ہتھ دی یاد ہاں کیول
    میں پِنڈے وقت دے چپہ صدی دا داغ ہاں کیول
    تے میری کلپنا اُس لوہار دے تھاں تھاں توں لوسے ماس ورگی ہے
    جو بے رحم آسمان تے کھجیا رہے، اِک ہوا دے بُلے لئی

    جیہدے ہتھ وچ چو دا پھالا ہے
    کدی تلوار بن جاوے
    کدی بس پٹھیاں دی پنڈ رہ جاوے
    میں ہُن تُہاڈے لئی ہارمونیم دا پکھا نہیں ہو سکدا
    میں بھانڈے مانجدی کِسے جھیری دیاں اُنگلاں چوں سِمدا راگ ہاں کیول

    میرے کول سہج دی اوس سپن سیما توں اُرے
    حالاں کرن نوں بوہت گلاں ہن
    اجے میں دھرت تے چھائی
    کسے سیری دے کالے شاہ بُلھاں جیہی رات دی ہی گل کراں گا
    اوس اِتہاس دی
    جو میرے باپ دے دُھپ نال لوسے موراں تے اُکریا ہے
    جاں آپنی ماں دے پیریں پائیاں بیائیاں دے بھوگول دی ہی گل کراں گا
    میرے توں آس نہ کریو کہ میں کھیتاں دا پُت ہو کے
    تُہاڈے چگلے ہوئے سواداں دی گل کراں گا
    جیہناں دے ہڑھ چ رُڑھ جاندی ہے ساڈے بچیاں دی توتلی کوِتا
    تے ساڈیاں دھیاں دا کنجک جیہا ہاسا۔۔۔۔۔۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels