مینوں چاہیدے ہن کُجھ بول جیہناں دا اِک گیت بن سکے۔۔۔۔۔۔
کھوہ لوو میتھوں ایہہ بھیڑ دی ٹوں ٹوں ساڑدیو مینوں میراں نظماں دی دھونی تے میری کھوپڑی تے بیشک ٹُنگاو حکومت دا سیاہ ڈنڈا پر مینوں دیو کُجھ بول جیہناں دا اِک گیت بن سکے
مینوں نہیں چاہیدے امین سیانی دے دائیلاگ سانبھو آنندبخشی، تُسیں جانو لکشمی کانت میں کیہ کرنا ہے اِندرا دا بھاشن مینوں تاں چاہیدے ہن کُجھ بول جیہناں دا اِک گیت بن سکے
میرے مونہہ وچ تُن دیو یملے جٹ دی تونبی میرے متھے تے جھریٹ دیو ٹیگور دی نیشنل اینتھم میری ہک تے چپکا دیو گُلشن نندا دے ناول میں کاہنوں پڑھنا ہے ظفر نامہ جو مینوں مِل جان کُجھ بول جیہناں دا اِک گیت بن سکے
میری پِٹھ تے لد دیو واجپائی دا بوجھل پِنڈا میرے گل چ پا دیو ہیمنت باسو دی لاش میرے .... چ دے دیو لالہ جگت نارائن دا سِر چلو میں ماؤ دا ناں وی نہیں لیندا پر مینوں دیو تاں سہی کُجھ بول جیہناں دا اِک گیت بن سکے
مینوں پین وچ سیاہی نہ بھرن دیو میں آپنی لوہ کتھا وی ساڑ دیندا ہاں میں چندن نال وی کاٹی کر لیندا ہاں جے مینوں دے دیو کُجھ بول جیہناں دا اِک گیت بن سکے
ایہہ گیت میں اوہناں گُنگیاں نوں دینا ہے جیہناں نوں گیتاں دی قدر ہے پر جیہناں نوں تُہاڈے بھانے گاونا نہیں پُگدا جو تُہاڈے کول نہیں ہے کوئی بول کوئی گیت مینوں بکن دیو میں کیہ بکدا ہاں ٭٭٭٭٭
