میرے لنکا دے ہمراہی جو جھارو ویر سنگرامی میں ادنیٰ بھارتی تیری کچہری وچ حاضر ہاں تیرا وی روس سچا ہے میری وی عرض سچی ہے نہ میتھوں اوپرا ایں توں نہ تیتھوں میں ہی نابر ہاں
تیرے فیِتے اُڈاون نوں تیرے سپنے بکھیرن نوں جو میرے دیش چوں تیرے لئی سوغات آئی ہے ایہہ گل کوئی عجوبہ نہیں ہے تیرے لئی نہ میرے لئی پُرانی گل ہے یارا چور نے چور دی یاری نباہی ہے
تیرے وی دل چوں اگ بھڑکی میرا وی لہو اُبلیا ہے جے توں ہتھیار چُکے نیں تاں میں کد صبر کیتا ہے میرے لنکا دے ویرے آپاں اِکو درد جیندے ہاں میرا لہو رام نے پیتا تیرا راون نے پیتا ہے
لہو پلاون والے جد کدی ہُشیار ہوندے نیں اوہناں نوں لہو پلائی جان دا ٹھرک نہیں رہندا اس نابر قوم نوں سچ دی جدوں پہچان ہوندی ہے اودوں پھر رام تے راون چ کوئی فرق نہیں رہندا
ایہہ اِندرا جِس نے تینوں موت دا پیغام گھلیا ہے سوئٹسرز لینڈ وچ جمی ہوئی لنڈن دی بیٹی ہے ایہدی ساڑی چ ڈالر ہے ایہدی انگی چ روبل ہے ایہنوں میرے دیش دی کہنا میری دھرتی دی ہیٹھی ہے
توں سچ منیں کہ میرے دیش دی ہر کُڑی اِندرا نہیں میری دھرتی چ اُگدا ہے اجیتا بھین دا جیرا توں اج وی ویکھ سکدائیں ظُلم دی مار دے تھپڑ جے لنکا دے بہادر ویکھے کیول کور دا چہرا
میں خود سیکھاں چ بند ہاں تیرے لئی کُجھ بھیج نہیں سکدا توں بھر دیویں آزادی ہیر دی خود مانگ سندھوری جد ایہہ لوہے دے ہرکارے تیرے تے بمب سُٹن گے توں جھوجھیں گا میرے ساتھی وی بھاجی دین گے پوری
آ لنکا دے بہادر آپاں اِک اِقرار کر لیئے دھرم یُدھ وچ جھوجھن دا دسہرا نِت مناون دا ظُلم حقاں دی سیتا تے کِسے دا ہون نہیں دینا کہ دس ہوون جاں سو ہوون لایئے سیِس راون دا (سنگھیپ چ۔۔۔۔۔۔جالندھر جیل) ٭٭٭٭٭
