Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> انکار - پاش >> چھنی

چھنی

پاش
July 2nd, 2008

''چھنی وے لوکڑیو چھنی
    رب دیوے وے ویرا تینوں بنی'' ۔۔۔۔۔۔( لوک گیت )
    چھنی تاں چھنی ہوئی
    پر گُڈیئے تیرے گیتاں نال
    تیرے ویر نوں گیتاں نال بنی نہیں لبھنی
    اوس نوں تاں مار جاوے گا
    بابل دا گھٹ زمین دا پرچھاواں
    اوس دیاِں پاس کیتیاں دساں نوں
    چر جان گے مریل جیہے جھوٹے
    تے اوس دی چکلے دار ہِک تے
    پُھلکے ویلدی رہے گی
    سدا ہی وِگڑے رہندے انجن دی تکادی

    ہولی ہولی پے جائے گی مٹھی
    اوسدے پٹاں دیاں گھگھیاں دی اڈار
    مُک جائے گی چوگ چاواں دے بھڑولے چوں
    اوہ بڑا جھٹپٹائے گا
    جِس دِن پہلی وار افیم دی کیڑی
    اوہدیاِں انتڑیاں تے ترے گی
    اوہ ستھ چوں آپنے عملی ہوون دیاں
    کنسوواں نوں سُنگھ سُنگھ کے لنگھے گا

    پھیر ہولی ہولی بدل جان گیاں ستھ دیاں گلاں
    تے پھرنی توں ہی مُڑن لگن گے
    اوس نوں ویکھن والے

    گُڈیئے دور دِس حد ول
    جِتھے مگراں دے مِلدے جباڑے ہن
    نک دی سیدھ تُریا جائے گا تےرا ویر
    توں جِس نوں دِن سمجھدی ایں
شکاریاں دی مُٹھ وچ گُھٹے ہوئے
    دھاگے دا سِرا ہے
    ڈور وچ چھڈی ہوئی مکار ڈِھل ہے
    گُڈیئے، آپنے تاں صرف گیت ہن
    سماں آپنا نہیں ہے

    جے سماں آپنا ہوندا
    تے تینوں سکھنیاں کلائیاں نوں
    ڈھک ڈھک رکھن دا فِکر نہ ہوندا
    حالے سماں کوئی لہو منگدی سوئی ہے
    جو پُڑ تاں سکدی ہے
    تیرے پُھلاں دا بھرم اُن رہے پوٹے دے پُھل چ
    پر سیوں نہیں سکدی
    تیری وکھی توں گھسدی جا رہی کُڑتی

    چھنی تاں چھنی ہوئی
    پر گُڈیئے ہو سکے تاں
    ویر دے دھڑکو نوں
    گیتاں دے موہ دی واڑ نہ کریں
    اوس نوں لبھ لین دیئں
    گل چ پئے رسے دی گنڈھ
    اوس دے متھے اُتے جھُک گئیاں صدیاں دا کب
    کرلین دئیں سُماں والی ڈانگ نال سِدھا
    اوہنوں پا لین دئیں
    رزق دے پِڑاں چ کڈھیاں سپاں دیاں کُھڈاں چ ہتھ

    سِلسلہ شاید تُہاڈے کھوہ توں اُتری
    پُلس دی دھاڑ توں چلے
    جاں چلدے پُرزے پنچ دے
    ترنگے وانگ لہر دے طُرلے توں
    جاں بھُچالاں وانگ    کندھاں نوں کنباؤندی ہوئی
    الیکشن دی موٹر توں۔۔۔۔۔۔
سِلسلہ کِتوں وی ٹُر سکدا ہے گُڈیئے
    آپنے گیتاں نوں جا بِھڑن دئیں
    گندی ہواڑ چھڈدیاں گاہلاں دی ہِک وچ

    پھیر اِک وار چِھڑے گا
    ستھاں دے وچ اوس دا ذِکر
    جو ہنیرے وچ اوہدے قدماں اگے
    روشنی دی لیک بن کے تُرے گا۔۔۔۔۔۔

    چھنی تاں چھنی ہوئی
    گُڈیئے ہو سکے تاں ویر دے دھڑکو نوں
    بس گیتاں دے موہ دی واڑ نہ کریں
            ٭٭٭٭٭



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels