Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کلام میاں محمد بخش >> منظوم چٹھیاں >> چٹھی 9-7

چٹھی 9-7

میاں محمد بخش
June 27th, 2008
ب باغ بزار ہزار عیشاں، سنگ یار دے ہسدیاں رسدیاں نُوں
بھنبھور بہشت دے طور اندر، کیہے چور پئے سُکھ وسدیاں نُوں
پِیا نال پیالڑے پِیندیاں جِیؤ۔ پیا رون فراق دا ہسدیاں نُوں
اَج کون محمدا روک رکھے، ملکاں اونٹھ پلانیاں کسدیاں نُوں

آپنے یار نال راضی خوشی وسدیاں باغ بزار دِیاں ہزاراں عیشاں نیں۔ بہشت ورگے شہر بھنبھور وِچ سُکھ چین نال وسدیاں نوں پتہ نہیں کیہڑے چور آن پئے۔ پیارے نال خوشی دے پیالے پِیندیاں تے ہاسے ہسدیاں نوں وچھوڑے دا روون آ پیا۔ محمد! اج کیہڑا اے جیہڑا شُتر سواراں نوں آپنے اونٹھاں اُتے گدیاں کس کے ٹُرن دِیاں تیارِیاں توں روک لوے۔




ت تُرت پیاریاں وداع منگی، بیٹھے وصل اندر کیہے ٹھیک ساں جِیئو
آئی موت فراق سی نام جِس دا، جُثّے جان دے وانگ نزدیک ساں جیئو
اج دَکھ باجھوں ککھ نال رلساں، توڑے لکھ تھیں کل ودھےک ساں جیئو
موڑیں جھب مہار نُوں پھیر مَلکا! کھلہے راہ تے نِت اُڈیکساں جیئو

چنگے بھلے رل کے بیٹھے ہوئے ساں پیاریاں نوں خبرے کیہ ہویا اِکدم جاون دی اجازت منگ لیونیں۔ اسیں تاں دوویں وجود تے رُوح واکن ساں کہ وچھوڑا موت دا ناں وٹا کے رُوح نُوں وجود توں نکھیڑن آ گیا۔ کل بھاویں لکھاں توں وی بھارا ساں اج پیارڑے دے دیدار باجھوں حقیر ہو کے ککھاں توں وی ہولا ہو جا ساں۔ او ملک! چھیتی پچھانہہ پرتن دا چارہ کریں میں تینوں راہ تے کھلوکے نِت اُڈیکدیاں رہنا ای۔



ق قول پالیں، ناہیں بول گالیں ، رکھیں تول نہ پویں خطا اندر
کوئی لکھ آکھے ہوویں وکھ ناہیں اکھ اکھ پکی ہکسے جا اندر
ملکا! سُود لوڑیں اوس سودیوں جیئو جیہڑا آپ کیتا دریا اندر
بن خاص غواص محمدا جیئو اخلاص موتی رمزوں پا اندر

آپنے کیتے ہوئے وعدے نبھائیں ، آپِنیاں کیتاں گلاں نُوں کچیاں (جُھوٹھیاں) نہ کریں۔ تکڑی دے تول واکن سِدھا رہویں، کِسے پاسے جھوک نہ کھائیں۔ تینوں کوئی بھاویں جِنیاں مرضی پٹیاں پیا پڑھاوے تُوں اِکو پاسے دھیان ٹکائی رکھیں تے میتھوں وکھ نہ ہوویں۔ ملک تُوں اوس سودے توں مُنافع لینا چاہنائیں جیہڑا کیتا ای دریا وِچ گیا سی۔ محمد! تُوں رمزاں وِچوں اخلاص دے موتی لبھ کے لیاون والا غوطے خور بن جا۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels