Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کلام میاں محمد بخش >> منظوم چٹھیاں >> چٹھی 21-19

چٹھی 21-19

میاں محمد بخش
June 27th, 2008
یاراں آون جاون چھڈیا کون پُچھے غمناکاں
سِکدی جان ہووے گئی راہن تن رلسی وِچ خاکاں
دلبر باجھوں کون لگائے مرہم سینے چاکاں
کوئی نہ سُندا کُوک محمد باجھوں مرداں پاکاں

چاکاں: زخماں، پھٹاں۔

پیاریاں نے ملن ورتن ای چھڈ چھڈیا اے ہُن غم دے ماریاں دی کیہنے پرواہ کرنی اے۔ ترسدی تپدی جند دُنیا چھڈ کے اگم دے راہ پَے جاسی تے ایہہ قلبوت (وجود) مِٹّی وِچ رل جاسی ۔ خاک نال خاک ہو جاسی۔ پیارے توں بِنا سینے دے زخماں دا دارُو کرن والا کون ہو سکدا اے۔ محمد! پاک مرداں توں بغیر کوئی ہور دِل دِیاں فریاداں نہیں سُندا۔



ساعت نیک مبارک ویلے خط آیا دِلبر دا
گھیرے زلف سجن دے وانگر نقطہ خال عنبر دا
سطراں ابرو مُشک سنگارے ہر ہر ہرن تَتر دا
کاغذ پیچ سجن دِیاں بغلاں کافوری ہر پردا
سخن لمے تے وقت نہ لمّا قاصد ڈِھل نہ کروا
فضلوں وسے ملک محمد بخش حسینوں تردا

حال عنبر دا: عنبر دی کہانی۔ تَتر: تاتار۔ ڈِھل : چر، دیر۔ بخش حسینوں: ملک محمد دے بھرا حسین بخش۔ فضلوں: فضل دین (ایہہ وی ملک ہوراں دے بھرا سن)

چنگی مُبارک گھڑی تے دِلبر دا خط آیا۔ لفظاں دے گھیرے، گولائیاں پیارے دِیاں زِلفاں دی دَس پاوندے نیں تے نُقطیاں توں مُشک عنبر دے ذرّیاں دا پتہ لگدا اے جیہڑے زُلفاں توں کھنڈے ہوئے نیں۔ خط دِیاں سطراں پیارے دے بھروٹّیاں واکن نیں تے ہر حرف مُلک تاتار دے ہرن جیہا اے۔ کاغذ دے پیچ سجن دِیاں چٹے رنگ دِیاں بغلاں واکن نیں۔ میریاں گلاں بُہت لمیاں نیں تے ویلا تھوڑا اے اُتوں سُنیہی وی کاہلا پیا اے۔ ملک تے اوہدے بھر افضل حسین بخش تِتاں نوں رب وسدا رکھے۔



ز زور ناہیں تقدیر اگے تدبیر ناہیں کوئی اڑکدی اے
کل سجناں دے سنگ کھیڈدی ساں اج سانگ فراق دی رڑکدی اے
جانی وِچ جانی کانی مار کِیتا پانی باجھ مچھی جیویں تڑفدی اے
جدوں ملک محمدا لد گئے سُنجے ویکھ ڈیرے اگ بھڑ کدی اے

اڑکدی: کھلوندی، موڑا پاوندی۔ سانگ: برچھی۔ کانی: تیر۔ سُنجے : ویران ، خالی۔

تقدیر اگے کوئی دس نہیں لگدا نہ ای کوئی تدبیر چلدی اے ۔ کل سجناں دے نال کھیڈرچی ہوئی سی اج وچھوڑے دی برچھی زخم تے زخم کری آوندی اے۔ جانی نے جان دے وِچ ای تیر ماریا اے۔ ہُن پانیوں باہر مچھی واکن تڑفدی پئی آں۔ محمد! جدوں اونٹھاں والے (ملک) ٹُر گئے تاں ڈیرے دی سُنج (ویرانی) ویکھ کے دِل وچ اگ بھڑ کدی اے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels