Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کلام میاں محمد بخش >> منظوم چٹھیاں >> چٹھی 24-22

چٹھی 24-22

میاں محمد بخش
June 27th, 2008
ک کل آئے اج لد گئے سئیو سو ہنے ملک قطار والے
ساڈے سُکھ دے رُکھ اُجاڑ جیؤ اک چھڈ گئے بُوٹے خار والے
جاندا صبر قرار آزار کولوں خالی بسترے ویکھ کے یار والے
سنُجی سیج محمد سیج محمد سیخ ہوئی تَن وانگ کباب انگار والے

لد گئے: ٹُر گئے۔ ملک قطار والے: اونٹھاں دِیاں قطاراں والے۔ کولوں: آپنے توں۔

اجے کل ای آئے سن تے اج ٹُر وی گئے اونٹھاں دِیاں قطاراں والے۔ سُکھ دِیاں چھاواں والے ہرے بھرے رُکھ سبھ اُجڑ پُجڑ گئے نیں کنڈیالے بُوٹے ای پِچھے بچے نیں۔ یار دا بسترا خالی ویکھ کے جیہڑا دُکھ ہوندا اے اوہ صبر قرار نہیں رہن دیندا۔ اُجڑی ہوئی ویران سیج سِیخ واکن جاپدی اے تے تن لگدا اے جینکر انگیاراں اُتے بُھجدا کباب ہووے۔



ی یار دے خواب دیدار دے جیؤ طلب دار آئے پوٹھور ہار ولوں
لاہور نوں پھیر تیاریاں نی جے تاں حکم ہویا سرکار ولوں
جے تے آونا مُکھ وکھاونا ہے چِت چاونا چا اودھار ولوں
ساڈا ملک محمدا رہے ناہیں شالا دُور دراز قطار ولوں

جیؤ : جی۔ قطار: قافلہ۔ چِت چاونا : دِل ہٹانا۔

یار دے رج کے دیدار کرن دے طلب دار پوٹھوہار دے پاسیوں آئے نیں۔ جے مرُشد دا پیارے دا حکم ہویا تاں اگے لہور جاون دِیاں تیاریاں نیں۔ جے تُساں آ کے مُکھ وکھانا اے تاں جیہڑا اُدھار رکھی آوندے او اوہدے توں جی ہٹا لوو ۔ محمد! رب کرے ساڈا ملک کدیں وی قافلے توں دُور وکھرا نہ رہوے۔



ہنجو موتی ڈِگ ڈِگ پیندے تسبیح دے تک منکے
تہی دوتہی ڈٹھی تاں ڈَھٹھے خوشی چوبارے منکے
خالی بستر نشتر ماری بچنا ہاں مَنتاں من کے
پا فراق محمد ملکے چا کیتے ہم منکے

تہی: اکہری ۔ دوتہی: دوہری چادر۔ چوبارے منکے: چوبارے دے تھم۔ مَنتاں: سُکھاں۔ ہم منکے: سانوں منکیاں واکن کھلار دِتا اے۔

دوست پیارے دی چھڈی ہوئی تسبیح دے دانے ویکھ اکھاں توں ہنجواں دے موتی ڈِگ ڈِگ پیندے نیں۔ دُوجا ایہہ وی جو یار دی تسبیح دے منکے اصل وِچ ساڈِیاں اتھراں نیں پرُتِیاں ہوئیاں۔ بسترا یار باجھ خالی اے اوتھے اوہدی چادر پئی ہوئی اے۔ یار دے ٹُر جان دی پکی ہوندیاں ای ساڈے خوشی دے چبارے دے تھم ڈھٹھ پئے نیں۔ سُنجا بسترا دِل اُتے چُھری چلاندا اے اسیں منتاں مُراداں سُکھ کے اوہد ے وار توں بچن دا جتن کرنے آں۔ محمد! ملک پیارے نے وچھوڑا دے کے ساڈی ہستی نوں کِھلرے منکیاں ہار رول چھڈیا اے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels