Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> کلام میاں محمد بخش >> منظوم چٹھیاں >> چٹھی 27-25

چٹھی 27-25

میاں محمد بخش
June 27th, 2008
کِس سار لینی سچیار باجھوں کوئی یار نہ وِچ سنسار رہیا
سارے سخن دے رخت نہ خرچ ہوئے شاید ایہہ وی ونک بپار رہیا
روک روک کے روک وٹا رہے ساڈے ولوں نہ کُجھ اُدھار رہیا
لِکھاں کِس دے ول حسین بخشا کوئی یار ناہیں خریدار رہیا

سار: خبر۔سچیار: سچ پالن والا۔ باجھوں: بِنا، بغیر۔ سنسار: دُنیا۔ رخت :سمیان، مال اسباب۔ ونج بپار: کاروبار۔روک روک : ڈک ڈک کے ۔ روک :نقد، پیسہ۔ وٹا رہے: مال دے بدلے دیندے پئے۔
حسین بخش : ملک محمد دے بھرا۔


سچے دوست توں سوا ساڈی خبر لین والا ایس دُنیا وِچ ہور کوئی وی نہیں۔ کہن آکھن دِیاں سارِیاں گلاں اُنجے دِیاں اُنجے بِن آکھیاں رہ گئیاں خبرے ایہہ وی کوئی ونج وپار ای اے۔ مال اسباب نُوں بڑا روک روک کے ڈک ڈک کے ویچیا اے بئی خبرے تُوں آ جاویں۔ تُوں نہیں آیا ایس لئی ساڈے اُتے تیرا کوئی اُلاہما نہیں۔ حسین بخشا! ہُن کِس نوں لِکھ کے خبر کراں کوئی یار ای نہیں ساڈا جیہڑا ایہہ مال خرید سکے۔



جاں سبزہِ خط نہیں سی رُخ سی سُرخ چراغ
تاں پروانے آوندے لے سینے وِچ داغ
صبح سفےدی دُھم پئی اُڈّی شب دی زاغ
بُلبل بَھور محمدا ہٹے خزاں تک باغ

سبزہِ خط: لُو ئیں۔ رُخ: مونہہ، مُکھ۔ دُھم پئی: پُھٹ پئی۔ زاغ: کاں۔ بَھور:بھنورے، بھنورا

جدوں تیرے لُوئیں نہیں سی پُھٹی اودوں تیرا مُکھ چراغ دی روشنی واکن لال سُوہا سی۔ پروانے اپہدے وچھوڑے دا داگ دِل اُتے لَے کے چِھکے آوندے سن۔ سویر دی سفیدی پُھٹی تاں رات دا کالا شاہ کاں اُڈ اری مار گیا۔ محمد! بَھوریاں تے بُلبلُلاں باغ اُتے پت جھڑ ورتی ڈِٹھی تاں اوہ پِچھانہہ ہٹ گئے۔



نیندر سخت پیاری کر کے بخت سُتے دے ہاراں
حُبّ وفا جہانوں نٹھے یار بُھلائے یاراں
نت نزدیک اُڈیک جیہناں دی دُور نہ لیندے ساراں
سُتّے ملک محمد بخشا! موڑے کون مہاراں


دے ہاراں: شکست دے کے، ہرا کے۔ نِت :سدا ، ہمیشاں۔ ساراں: خبراں۔ مُہاراں: واگاں۔

ساڈے بھاگ سانوں ہرا کے مِٹھی گُوڑھی نِےندرے سَوں گئے۔ محبت تے پیار دُنیا توں اِنج دوڑ گئے جو یاراں نے یار وسار چھڈے۔ جےہناں دی اُڈیک نِت ساڈے نیڑے وسدی اے اوہناں کدیں دُوروں دی ساڈا حال نہیں پُچھیا۔ محمد بخشا! ملک ہوریں غافل ہوئے پئے نیں ساڈے ول کیہنے پرت پھیرا مارنا اے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels