Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کرکٹ دی کِٹ

کرکٹ دی کِٹ

پیروز بخت قاضی
February 26th, 2015
5 / 5 (1 Votes)

اوہ سول ہسپتال وچ دائی دے طور تے ملازم سی، اتے اوہدا شوہر اوسے ہسپتال دی ایمبولینس دا ڈرائیور سی۔ قدرت نے اوہنوں گورا رنگ تے حسن دی دولت نال نوازیا سی۔ شہر دے رنگین مزاج مرداں دی توجہ تے اوہدے اتے ہمیشاں ای رہندی سی، پر اوہ اپنے حسن دی دولت وچوں صرف اوس بندے نوں حصہ دیندی سی جیہڑا اپنی دولت اوس اتوں وار سکدا سی۔
ملک اختر نے اوہنوں ہسپتال وچ ڈٹھا تے پہلی نظر وچ ای اوہدا شُدائی ہوگیا۔ ملک اختر دا شہر وچ کاروبار وی سی تے نال دے پنڈوچ زمینداری وی سی۔ ملک اختر دا حوصلہ ودھایا گیا، کیوں جے اوہدی بھاری جیب دا اوہنوں احساس ہوگیا سی، ہن تے اوہ اوہدے گھر وی آن لگ پیا سی، اوہ ہمیشاں تحفے تحائف لے کے ای اوہدے گھر جاندا جتھے اوہدی خاطر داری کیتی جاندی۔ دِن بہ دِن ایہہ چکر لماں ہوندا گیا۔ نسرین دا پُتر سکولے پڑھدا سی اتے اوہنوں کرکٹ کھیڈن دا بڑا شوق سی، اوہ جدوں سکول توں گھر اپڑدا تے اکثر ملک اختر نوں اوتھے ویکھدا، فیر اوہناں دوہاں وچ مفاہمت دا رشتہ پکا ہوگیا سی کیوں جے ملک اختر منڈے نوں وی تیہہ روپئے دی ٹِپ دے دیندا سی۔ ہر گزر دے دن نال منڈے دے مطالبے ودھن لگ پئے جیہناں نوں اوہ پورا کر دیندا، ہر واری اوہ نسرین دے گھر آوندا تے منڈا ضرور سامنے آجاندا تے کوئی نہ کوئی فرمائش پا دیندا۔ ملک اختر اوہنوں رقم دے کے کہندا جا بازار جاکے اپنی پسند دی شے خرید لو۔ منڈے دے جان دے بعد دوویں گھر وچ اکلے رہ جاندے پر ہور وی احتیاط لئی اوہ اندروں چٹخنی چڑھا کے کمرہ بند کر لیندے۔
اوس دن وی ملک اختر آیا تے نسرین نے اوہنوں کمرے وچ بٹھایا تے آپوں پلیٹ وچ سیب تے چھری رکھ کے لے آئی۔ منڈا وی کمرے وچ وڑ آیا تے آؤندیاں ای کہن لگا پئی اوہنے کرکٹ دی پوری کِٹ مُل لینی اے۔ جیہدے لئی اوہنوں رقم چاہیدی اے۔ملک اختر اوہدی روز روز ودھ دیاں مانگاں توں تنگ آچکیا سی تے اوہ ہر واری اوہدے رنگ وچ بھنگ توں بیزار سی۔ منڈا وی کجھ لئیوں بغیر نہیں سی ٹلدا تے نہ ای اوہناں نوں کلیاں چھڈنا چاہندا سی۔ ملک اختر نے اوہنوں ٹالنا چاہیا پر منڈا بدتمیزی تے اتر آیا تے ٹلن دا ناں نہیں سی پیا لیندا ۔ ملک اختر نے اوہنوں جھِڑکی دے کے کمرے چوں باہر جان لئی آکھیا۔ منڈے نے مایوس ہوکے پلیٹ وچوں چھری چُکی تے ملک اختر دے ڈھڈ وچ کھوب دتی۔ خون دا فوارہ نکلیا تے منڈا گھروں باہر ول بھج گیا۔ نسرین گھابر گئی تے ملک اختر نوں ہسپتال پہنچان وچ دیر ہوگئی۔ خون بوہتا وگن نال ملک اختر دم توڑ گیا تے منڈے اتے قتل دا مقدمہ بن گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels