Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> یمنی بحران تے پاکستان

یمنی بحران تے پاکستان

سید عمار مشہدی
April 23rd, 2015
5 / 5 (2 Votes)

کھاڑی ملکاں دی صورتحال نے پاکستان نوں اجیہے موڑ تے لیا کھلیارا اے جتھے اوہدے لئی بہوں اوکڑاں کھڑیاں ہوچکیا نیں اوہ کیہڑے پاسے جاوے ۔ اک پاسے پاکستانی کٹڑپنتھی مذہبی سستھاں ہین جنھاں نے افغان جہاد سمے کھاڑی دیساں نال آپنے سمبندھاں نوں گوڑھا وی کتیا تے نالے رج رج مال وی کمایا۔ ایہناں سستھاں دے عرب دیساں نال جوڑ دے دو کارن سی کیونجے اوہ مسلکی نینہ پاروں عرباں دے مذہبی ٹیچے نال میل رکھدیاں سن ، دوجا روس سوشلسٹ نظام دا موہری سی جیہدے اگےڈَکا لاؤن لئی لوک تنتر (جمہوریت) دے بت وچ ایہناں دم خم نئیں سی کہ اوہ افغانستان وچ انقلاب ثور دامقابلہ کر سکے۔ اسلام دھرم دی جہادی وچاردھارا ای سی جیہدے راہیں روس دے ودھدے ہوئے قدماں نوں روکیاجاسکدا سی۔ اسلام دھرم دیاںوکھووکھ شاخاں وچ موجود جہاد نوں بہوں اگھڑواں بیان کیتا گیا سی لیکن ایہناں چوں سُنی سلفی گروہ جہاد وچ بہوں اگانہہ ودھ کے حصہ پاؤندا سی اِنج افغانستان لئی جہادی بھرتی کرن لئی امریکا تے یورپ نوں کامے مِل سکدے سن ۔ امریکناں ایہنوں آزماؤن دا چارا کیتیا کیونجے پچھوکڑ وچ سلطنت عثمانیہ دی وڈھ ٹُک وچ سلفی گروہ نے ودھ چڑھ کے اپنا حصہ پایا سی۔ ہُن سلفی سعودیہ اوہناں دا بہوں گوڑھا سمبندھی ہون دے نال نال مال رُپیا وچ وی پچھانہہ نئیں سی اِنج سوشلزم نال نجٹھن لئی ہر شے موجود سی۔
جماعت اِسلامی ضیاء الحق دے دور وچ سرکار وچ رَلت سی نال نال وہ اوہدے جہادی نیتی دی سرپینچ وی سی۔ روس دے افغانستان توں پرت جاون مگروں پاکستانی اسٹیبلشمنٹ نے افغانی جہاد دےہتھ ٹوکے نوں کشمیر وچ آزماون دا اپرالا کتیا تانجے ہندوستان د ے گوڈے لوا کے کشمیر نوں آزاد کریا جاوے ۔ایس نیتی دا اک ہور کارن ایہہ وی سی جیہڑے جہادی افغانستان وچ دس ورہے تائیں رُجھے رہے سن اوہ ویہلے ہو کےکتھے پاکستان دا سردرد ناں بن جاون۔ افغان جہاد دی تیاری وچ امریکا تے سعودی گنڈھ جوڑ نے پاکستانی سماج وچ بہوں تبدیلیاں پیدا کردِتیاں سن۔ پاکستان وچ سعودی اثر ودھنا شروع ہو گیا تے جہادی سستھاں دی سرکاری سرپینچی نال سماج ایہناں دی لہویٹ وچ چکیا سی۔ ایہہ جہادی سستھاں سعودی وچاردھار دا پاکستانی انگ سن تے ویلے ویلے نال ایہہ اینیاں مضبوط ہوگیاں سن کہ طالبانی بغاوت سمے وی پاکستانی فوج نوں بُرا مندا آکھنا سوکھا جد کہ پاکستان ورودھی گروہاں دی خلاف گل بہوں مہنگی پیندی سی۔
اُتھاں دِتے پچھوکڑ دا ذکر کرن دا ٹیچا ایہہ سی پئی یمن دے مسئلے اُتے ونڈی ہوئی قوم دے اک پکھ دی اوکڑ نوں بیان کرنا سی پر عرباں دا ہنگوڑا بھرن والیاں چوں صرف مذہبی جہادی سستھاں نہیں سگوں پاکستان مسلم لیگ نواز بہوں اگانہہ اے۔ پاکستان مسلم لیگ نواز دے آگو نواز شریف ہوراں دے عرب بادشاہاں نے ذاتی سمبندھ بہوں گوڑھے ہین جیس پاروں ایہہ خیال کیتا جاندا اے کہ اوہ کسے وی حال وچ سعودیہ جیہے ملک نوں ناں نہیں کر سکدے کیونجے مشرف دے دھڑن تختے ویلے عرب بادشاہ اِی سن جیہناں نے نواز شریف نوں جیلوں کڈھایا تے اپنی پروہن چاری وچ لہویٹ لیا۔
دوجا اَنگ پاکستانی لبرل گروہ ہین جِہڑے سمجھدے نیں پئی یمن دی لڑائی ایران عرب دا پرانا اِٹ کھڑکا ہے نالے ایس نوں دھرم دا پکھ لاد ِتا گیا جے ۔ یمن دی بغاوت کرن والے زیدی شیعہ ہین جیس پاروں پاکستان دی شیعہ برادری ایس نوں چنگی نظر نال نہیں ویکھدی ۔ بہوں ویلے تیکر یمن وچ رہن والے پاکستانی سفیر ظفر ہلالی ہوراں دا وی ایہو آکھنا جےاسیں فوجاں یمن دی حوثیاں نال نجٹھن لئی گھلیاں تاں پاکستان وچ رہن والے چار کروڑ شیعہ کیہ سنہیا دیواں گے جیہڑا پہلاں اِی طالبان دی اَت گردی دی واہوا لہویٹ وچ ہین۔ لبرل دا کہنا ایہہ وی اے پئی عرب دیساں وچ رہن والیاں پاکستانیاں نال عرباں دا ویہار کوئی ایناں چنگا نہیں نالے پاکستان دے کشمیر تے ات گردی دے معاملے وچ اوہناں نے ساڈے نال کِناں کُو ہتھ ونڈایا سگوں پاکستان وچ ہون والی اَت گردی کے پچھانہہ ایہہ عرب دیس اِی ہین جہناں نے مدرسیاں نوں اپنے ریالاں نال ایہناں طاقتور بنادِتا کہ اوہ پاکستانی ریاست دی فوج تے عملداری نوں چیلنج کرنا شروع ہوگئے۔ ایس پچھوکڑ وچ حزب اللہ دے آگو حسن نصراللہ دا بیان وی ساہمنے آگیا جہناں پاکستان نوں آکھیا پئی جیکر پاکستان تے عرباں دے احسان بہوں ہین تے نالے ایہہ وی ناں بھُلے القاعدہ تے طالبان جیہی اوکڑاں وی اوہناں دی دین ہین۔
ایس بھمبل بھو سے چوں نکلن لئی نواز شریف نے اپنے مُدعا پارلیمنٹ اگانہہ سُٹ دِتا جتھے اوہناں نال اینے چُبھویں سوال ہوئے کہ حکومت نوں اپنی جان چھڑانی اوکھی ہوگئی۔ایسے ویلے بلدی تے اَگ لاون والا ٹویٹ امارتی باہرلے کاریاں دے وزیر ڈاکٹر انورقرقاش نے کردِتا پئی جیکر پاکستان نے اپنی فوجی ناں گھلی تاں اوہدے بھیڑے نتیجے لئی تیار رہوے جیہنوں پاکستان وچ بہوں بھیڑ ا لیا گیا تے ہر پاسیوں ایس دی نکھیدی کیتی گئی پئی عرباں نے پاکستان نے کیہ سمجھ رکھیا اے لیکن حکومت پاکستان ولوں کوئی جواب ناں آیا تاں چوہدری نثار نے پریس کانفرنس کرکے ایس نوں دھمکی آکھیا نالے پاکستانی لوکائی دی بے عزتی قرار دِتا۔ ایس سارے کارے وچ جیہڑا دھڑا فوج بھیجن دا حمایتی سی اوہ وی پچھلے قدمی پے گیا۔
پاکستان وچ یمن بارے کوئی چنگی جانکاری موجود نہیں جیس پاروں یمنی لوک ، یمنی سیاست تے یمنی دی موجودہ صورتحال پارے کوئی ذہن بن جاوے ایس نوں سدھا سانواں مسلکی جنگ لیاجارہیا ہے جیہڑی تاریخی طور تے غلط ہے۔ حوثی شیعہ برادری دا اک اَنگ ضرور ہین لیکن وچاردھار پاروں اوہ شیعہ جعفریہ وچاردھار توں بلکل وَکھ ہین سگوں سنی حنفی وچاردھارا نا ل میل رکھدے ہین۔ حوثیاں دی ایہہ بغاوت مذہبی اَنگ تو ں اَڈ سیاسی تے سماجی حقاں لئی جیہڑی علی عبداللہ صالح دی تیہہ ورھے لمی تاناشاہی مگروں عبدالرب ہادی دے اپنے وعدے توں مکروں پاروں ہتھیار بند کھِچوتان بن گئی۔ عبدالرب ہادی دا ریفرنڈم یمنی لوکائی نال مخول سی پئی ناں منن دا کوئی سوال اِی نہیں سی۔ یمنی لوکاں نے فیر وی اوسدے ریفرنڈم نوں سر اکھاں تے رکھیا لیکن وعدہ خلافی پاروں اوہ ہتھیار چُکن تے مجبور ہو گئے بلکل اوویں جدوں افغانستان وچ برہان الدین ربانی نے اک مُک سمجھوتے مگروں صدارت چھڈن توں انکار کردِتا اوس توں بعد جو کجھ افغانستان وچ ہویا اوہ سبھ دے ساہمنے اے۔ یمن دی جغرافیائی اہمیت ایس پاروں بہوں ودھ ہے کیونجے ایہہ یورپ تے امریکا نوں سمندری رستے وچ آؤندا اے باب المندب دی راہدی وچ کوئی اڑِچ نہر سویز راہیں ایشیا توں یورپی اتے امریکی منڈیاں نوں سامان لے جاون والے سمندری راہ نوں ہمیشاں لئی بند کرسکدی ہے۔ ایس راہ دی رَکھیا پاروں امریکی بحری بیڑے تے امریکا بہوں چِراں توں یمن اِچ موجود اے ۔ باب المند ب تے اگانہہ سعودی دی جدہ بندرگاہ وی آؤندی اے۔ ایس پاروں امریکا تے سعودیہ نوں اپنے ورودھی کوئی ایہو جیہی سرکار نئیں پسند جہیڑی اوہناں دے بندوبست لئی خطرہ بن جاوے۔ عرب بہار دے ناں توں اُٹھن والی لہر نے جتھے عرب تاناشاہی نوں الٹ پلٹ کے رکھ دِتا اوہدے اثرات توں یمن نئیں بچ سکدا سی ایہی کارن سی پئی چِراں توں یمن اُتے حکومت کرن والے علی عبد اللہ صالح نوں اخیری حکومت چھڈنی پے گئی۔
ایس سارے کارے وچ پاکستان دی کوئی خاص وجہ یاں خاص پاتر نظر نہیں آؤندا پئی جیس نال اوہدے کسے مفاد اُتے سَٹ پیندی نظر آوے۔ پاکستان دا یمن نال کوئی کاروباری سمبندھ وی اِیناں ودھ نہیں جیس نوں کوئی خطرہ ہووے نالے یمن دی منڈی وچ پاکستانی کم کرن والیاں دی کوئی خاص گنتی وی نہیں۔ سعودیہ نال پاکستان دے مذہبی تے سماجی میل ضرور ہے لیکن اک دھڑ مقدس استھاناں نوں سعودی سرکار توں وَکھ نظر نال ویکھدا اے پئی آل سعود تے مقدس استھاناں دی رَکھیا وکھو وکھ شیواں ہین جیہناں نوں رَلایا نہیں جاسکدا نالے سعودیہ نے یمن اُتے چڑھائی کیتی اے ناں کہ حوثیاں نے سعودیاں اُتے۔ حوثیاں کو ل کوئی ایہو جیہی طاقت نہیں پئی اوہ لوک ہوائی حملے کرکے سعودیہ نوں کوئی نقصان پُجا سکن۔ پاکستان نوں ایس معاملے نوں بہوں نازُکتا نال ویکھن دی لوڑ اے کہہ پرائی بلدی وچ کُد کے اپنا ہور نقصان ناں کر لوے۔ پاکستانی فوج وَلوں رضامندی دا ایہو جیہا کوئی سندیس نہیں آیا پئی اوہ اپنی اندرلی لڑائی توں فارغ ہو کے کسے دوجے ملک جاکے کوئی ہور پنگا لے سکے جیکر پاکستان ایس اَگ وچ کُددا اے تاں ایہدے اثرات پاکستانی سماج اُتے بہوں گوڑھے ہوون گے۔پاکستان نے جیویں عراق اتے شام دی صورت حال وچ اپنے آپ نوں وَلائی رکھیا سگوں ایس یمنی لڑائی توں پرانہہ اِی رہنا چاہیدا اے جیویں بحرین پُلس وچ پاکستانیاں دی بہوں گنتری نوں چنگا نہیں لیاجارہیا۔





Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels