Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کمانڈر ابوابو دا المیہ

کمانڈر ابوابو دا المیہ

عامر رضا
March 11th, 2016
5 / 5 (5 Votes)

ناں ابو خراسانی سی پر اوہ کمانڈر ابو ابو دے ناںنال مشور ہو گیا ۔اوہدے کئی سنگی طالبان ایس گل توں پریشان سن کہ او ہنو ں اینی شہرت کیویں مل سکدی اے کیوں جے اوہ ساریاں تو ںنکما تے ڈرپو ک سی ۔پہلے گروپ وچوں اوہنوں ایس لئی کڈھ دتا گیا سی کہ اوہنوں کئی ٹرینگز مگروں وی ایکسپلوز ڈیوائس بنانی نہیں آئی۔ دوجے گروپ نے اوہنوں ایس لئی کڈھیا کہ اوہدی بنائی ہوئی خود کش جیکٹ کدی وی ٹائم تے نیئں پھٹی تے کئی خودکش بمبار جنت دی بجائے جیل وچ اپڑ گئے سن ۔تیجے گروپ وچ اوہدی ڈیوٹی اک اجیہی راہ تے ایکسپوز ڈیوائس لاون دی سی جتھوں سیکورٹی فورس دا اک قافلہ لنگھنا سی ۔جس ویلے اوہ ڈیوائس لاون لگا تے اوہدے ڈھڈ وچ ایسا مڑوڑ اٹھیا کہ اوہ جاڑے پھرن چلا گیا تے اینی دیر وچ سیکوڑی فورس دا اک دستہ اوس تھاں تے اپڑ گیا تاں جے رستے نوں محفوظ کر سکے ۔جدوں اوہ فارغ ہو کے پرتیا تے سکیورٹی دے دستے نوں ویکھ کے اوہنے ڈیواس سُٹ دتی تے لکدا لوکاندا اوتھوں کسی طریقے نال نس گیا۔ ایس واقعہ دا نقصان اوس آپریشن دی شکل وچ ساونے آیا سی جہیڑا سکیورٹی فورس نے اوہدے علاقے وچ شروع کر دتا سی ۔آپریشن وچ اوہدہ پورا گروپ مک گیا سی پر اوہ کسی نہ کسی طریقے جان بچا کے نٹھ گیا سی
ایہہ ای وجہ سی کہ اوہ ہن تیکر کئی گروپ بدل چکیا سی ۔ ایہہ شہرت اوہد ے ہتھ ربوں ای لگ سی ۔ایس شہرت دی وجہ ایک امریکی شہری دا اغوا سی جیہڑا اوہدے ہتھ انج ای آیا سی جیویں انھے ہتھ بٹیرا لگ جاوے ۔ایہہ گل ایس ویلے دی ای جدوں امریکہ نے اسامہ بن لادن دے سر دامُل پنجی ملین ڈالرز لایا سی ۔بابا جارج جیہڑا امریکی ڈریم لائف دے مزے لے چکیا سی ،اوہدی گھر والی الزیمس دی مریض ہو کے فوت ہو چکی سی تے بال کدوں دے چھڈ کے اپنے اپنے کماں تے لگ گئے سن ۔جدوں بابے جارج نے ایہہ اعلان سنیا تے اوہدی رگاں وچ اوہدے لکڑ دادے جارج اول دا خون ابالے کھاون لگ پیا ۔اوہ جارج اول جیہڑا اپنے ویلے دا مشہور بانٹی ہنٹر سی جیس نے کئی ڈاکو پھڑ کے پلس دے حوالے کیتے سن ۔بابے جارج نے سوچیا کہ گھر وچ بیہ کے مرن نالوں چنگا جے کہ اوہ اسامہ دی بانٹی ہنٹنگ ای کر لیوے ۔ اوہنے اپنے ابالے کھاندے خون نوں ٹھنڈا کرن واسطے سامان بنھنیا تے اپنے لکڑدادے دی بندوق جھاڑ پونج کے صاف کیتی تے خوش بختی دی نشانی دے طور تے نال رکھ کے تاجکستان دے راستے افغانستان اپڑگیا ۔
کئی مہینے اوہ افغانستان دے پہاڑاں دی خاک چھان دا رہیا۔اوہدے کول جہیڑی جمع پونجی سی اوہ مک گئی تے مقامی لوکاں نے اوہد سامان لٹ لیا ۔دھکے کھاندا تے بھکا مر دا اوہ اک رات افغانستان دا بارڈر ٹپ کے شمالی وزیرستان اپڑیا ۔ایہہ اوس رات دی گل اے جدوں کمانڈر ابو ابو ہجے کمانڈ ر نیئں بلکہ صرف ابو خراسانی سی ۔اوس رات اوہدے کمانڈر نیں اوس نوں پہرے تے کھڑا کیتا سی تے اوہ اپنے جوٹی داراں کوں لکدا لوکاندا جھاڑیاں وچ سُتا ہویا سی ۔بابے جارج داپیر بے دھیانی وچ اوس دے جُسے تے جا پیا تے اوہ اک چیخ مار کے اٹھیا ۔بابے جارج دی لمبی ڈاڑھی ویکھ کے اوہ اوہنوں کوئی اپنا ای سنگی سمجھ بیٹھا۔جداوہنے چائنہ دی بیڑی دا چانن کیتا تاں اوہنوں پتہ لگا کہ ایہہ بابا طالب نہیں بلکہ کوئی غیر ملکی گور اے۔اوہنے چھیتی نال اپنی بندوق اوہدے اُتے تان لئی ۔بندوق ویکھ کے بابا جارج ـ’ڈونٹ شوٹ ڈونٹ شوٹ‘ دی کھپ پاون لگ پیا ۔ابو خراسانی نے اک ہتھ نال بندوق سانبھی تے دوجا ہتھ اوہدے منہ تے رکھ دتا ۔بڈھا بڑی اوں آں کردیا رہیا پر کمانڈر خراسانی نے ہتھ دبائی رکھیا ۔فیر اوہنے بڑی کوشش دے نال اوہدیاں مشکاں کس لیاں ۔پہلا ں اوہدا دل کیتا کہ اوہ چھیتی نال جا کے اپنے کمانڈر نوں دسے تاں جے اوہنو ںشاباش ملے پر فیر اوہ رکیا تے کجھ سوچن لگ پیا۔بڑی چر بعد اوہنے ، بڈھے نوں جھاڑیاں وچ لکویا تے واپس اپنی تھاں تے چلا گیا۔پورا دن اوہ بڈھے دے بارے سوچدا رہیا ۔اوہنے اپنے سنگی ابو ضرار نال گل کیتی ۔ابو ضرار اوس دی پرچھائیں سی ۔اوہ وی ہن تیکر کئی گروپ بدل چکیا سی ۔اوہدے دل وچ غازی بنن دا جذبہ سی نہ کہ شہادت دی تمنا۔ ابو ضرار نے بوہت سوچ وچارکرن توں بعد صلاحح دتی کہ اوہ اویس گورے دا کسی نوں پتہ نہ لگن دیوے ۔ دوہاں نے بڈھے نوں اوتھوں کسی ہورتھان تے اپڑا دتا ۔کئی دناں تیکر اوہ چپ وٹ رکھی ۔اوہناں نے اپنے ترجمان دے فون وچوں میڈیا دے نمبر چوری کر کے جارج دے اغوا دی خبر دتی اوہدا پہلا رابطہ سی این این دے رپورٹر نال ہویا جس نے اپنے ٹرانسلیٹردی مدد نال اوہناں نال گل کیتی ۔ابو خراسانی نے کئی واری اویس نوں اپنا ناں دسیا سی پر جدوں رپورٹ نشر ہوئی تے اوہد ناں بار بار ابو ابو دے طور تے لیا گیا سی ۔طالبان حلقاں وچ اک نواں ناں آن دی وجہ توں کھلبلی مچ گئی سی ۔پاکستان دے کئی چینلاں نے وی نویں گروپ دے ساونے آون نوں اچیچ کروریج دتی ۔کئی اینکراں تاں ایہدے اُتے ٹاک شو وی کر دتے ۔اوہناں نے کمانڈر ابو خراسانی دے بیپر وی کیتے تے اوہد تعارف کمانڈر ابو ابو دے ناں نال ای کراندے رہیے ۔اوہنوں ایہہ ناں اک جتی ہوئی ٹرافی وانگوں لگیا۔اوہنے ناں ٹھیک کران دی بجائے ایس ناں نوں اپنالیا سی
میڈیا دی کئی مہینے دی کھپ امریکی سفارتخانے دیاں کوششاں تے خفیہ اداریاں دی پھرتیاں دے بعد بابا جارج چھڈا لیا گیا پر تاوان دے دس کروڑ دے کے ۔
کمانڈر ابو ابو نے اینی رقم زندگی وچ پہلی واری ویکھی سی ۔کئی دیہاڑے اوہ رقم مڑمڑ کے گننے دے رہیے ۔جدوں اوہناں نوںپک ہو گیا کہ رقم پوری اے تے نوٹ وی اصلی نے تے فیر اوہناں نوں تھوڑا جہیا سکون ملیا۔کئی ڈیہاڑیاں تیکر او ہ چپ غڑپ ای ہو گئے ۔جدوں اوہناں نوں ہوش آیا تے اوہناں نے ایہہ من لیاکہ ایہہ پیسہ اوہناں دی ملکیت اے تے اک نمی نمی ہنسی اوہناں دے بلھاں توں پھٹی تے وکھیاں وچوں نکلن لگ پئی ۔کئی دناں تیکر اوہ مستقبل دیاں سکیماں بناون لگ پئے ۔
آخر کمانڈر ابوابو نے اپنا گروپ کھڑا کرن دا فیصلہ کیتا ۔اوہناں نیدوجے گروپاں وچوں بندے چنگے پیسے دے کے اپنے نال ٹور لئے ۔کمانڈر ابو ابو نے اپنی ساری حیاتی جہیڑے سفنے ویکھے سی اوہناں نوں پورا کرن دا دیہاڑ آ گیا سی ۔ساری حیاتی اوہنے اپنے کمانڈراں دیاں ایس یو وی گڈیاں دے پچھے لٹک کے گزار دتی سی ۔کئی وار اوہ گڈیاں دی تیز رفتار ی تے جمپ لگن دے پاروں زمین تے گوڈیاں بھار وی ڈگ چکیا سی ۔اوہدے دل وچ بڑے چر دی ایہہ سدھر سی کہ اوہ وی کدے ایس یو وی دی فرنٹ سیٹ تے بیٹھے ۔ہن ویلا اوس سدھر نوں پورا کرن دا سی ۔اوہنے سب توں پہلاں ایس یووی گڈیاں خریدیاں تے فیر اپنے بندے بھرتی کیتے جیہڑے اوہدی گڈیاں دے پچھے لٹک دے سی ۔سب تو اگلی گڈی وچ اوہ آپ تے اوس توں پچھلی گڈی وچ اوہد ا معتمد خاص ابو ضرر ہوندا۔بلا مقصد گڈیاں بھجا بھجا کے اوہ علاقے وچ ساریاں دی نظرا ں وچ آ گیا سی ۔کئی پرانے مجاہد جہیڑے افغانستان وچ سویت فوج دے خلاف لڑدیاں ہتھ یا پیر کٹوا بیٹھے سی اپنی جوان کڑیاں دا ویاہ کمانڈر ابو ابو دے نال کرن نوں تیار ہو گئے سی ۔کمانڈر ابو ابو دا پہلا عقد اپنے توں تھوڑی جہی وڈیری عمر دی عورت نال ہویا ۔ایس نکاح دا فائدہ اوہنوں اک قبلے نال رشتے داری دی شکل وچ لبھیا۔دوجا عقد اوہنے اک طالب دی بیوہ نال کیتا ۔تیجا عقد واحد اللہ واحد دی بہن نال کیتا تاں جے افغان طالبان دے نال تعلق داری بن سکے ۔تن سالاں وچ ابوابو نے تناں بیویاں وچوں چھ نیانے جم لئے سی ۔اوہ ہن تناں بیویاں کولوں اک گیا سی ۔چھوتھی شادی تے اوہنے چنگے نوٹ لائے تے سوات وچوں اک سولہ سالاںدی مٹیار لبھ لئی جیدا پئیوسا زندہ سی ۔جدوں طالبان نے مینگورہ وچ قبضہ کیتا تے اودوں اوہدے پئیونوں خلاف شریعت کم کرن تے، گرین چوک وچ بنھ کے اوہدا گلا ووڈ دتا سی ۔ تے اوہ اوس کمانڈر نوں مال غنیمت دے طور تے ملی جیس نے اوہدے پئیو نوں وڈیا سی ۔
ابو ابو نے ایس کڑی نوں سوات وچ اودوں ویکھا سی جدوں اوہ مولوی ریڈیو نوں ملن گیا سی ۔کیوں جے اوہد ایہہ خیال سی کہ اوہ وی اپنا ریڈیو اسٹیشن لا کے ہور شہرت کما سکدا اے ۔ریڈیو دا معاملہ تے نہ بن سکیا البتہ اوہدی نظر شربت گل تے ضرور پے گئی سی ۔اوہدیاں وڈیاں تے نیلیاں اکھاں و یکھ کے اوہو پہلی وار وچ ای ڈھے پیا سی ۔دس لاکھ فدیہ دے تے اوس نے کڑی نوں چھڈا کے عقد کر لیا ۔کمانڈر ابو ابو نوں ہن بالاں دی لوڑ سی تے نہ تھوڑ۔ایہہ ای وجہ سی کہ اوہنے چھوتھی بیوی وچوں بال جمن دی کوشش ای نیئں کیتی ۔
؎تن ورھے لنگھ گئے سی ہجے تیکر کمانڈر ابو ابو دے گروپ نوں کوئی ایڈی ووڈی سپھلتا نہیں ملی سی کہ اوہد ناں اک وار فیر سی این این یا بی بی سی تے سنیاجاندا۔اوہدے ساتھی چھوٹیاں موٹیاں کارروائیاں کردے رہیے ۔کدے بنک لٹ لیا تے کدے کسی سکھ نوں اغوا کرلیا جے ہور کچھ نا لبھا تے کسی دا ڈانگر وچھا ای کھول لیا۔ کمانڈر نے اپنے ساتھیاں نال مل کے کراچی دا اک وڈا بنک لٹن دی تیاری کیتی ۔کمانڈر نوں کسی نے دسیا سی کہ پاکستان دی ساری دولت ایک بنک وچ پئی ایہہ جہنوں بنک دولت پاکستان آکھدے نیں ۔کئی مہیناں بعد کمانڈر نے اپنے منصوبے نوں آخری شکل دتی ۔ایس کارروائی تے اوہد پجا لکھ روپیہ لگ گیا سی ۔جیس گروپ نے ایہہ ورادات پاونی سی اوہدے وچ سارے اوہ طالبان شامل سن جیہڑے پہلی وار وزیرستان توں باہر چلے سی ۔وردات دی پلانگ وچ کئی غلطیاں ہوئیاں ۔ تے کسے نہ کسے طریقے نال ایس واردات دی بھنک حساس اداریاں نوں پئے گئی سی تے اوہناں نے ایس گروپ نوں کراچی اپڑن تو پہلاں ای پھڑ لیا سی ۔
کمانڈر ابوابو نوں اینا غم ساتھیاں دے پھڑے جاندا نیئں سی جینا غم اوہنوں اویس رقم دے ڈُبن دا سی جہیڑی اوہنے ایس وردات تے لائی سی
کمانڈر ابو ابو نے ہن تیکر جو کچھ کمایا سی اوہدے وچوں اک بوہت وڈا حصہ اپنے جتھے تے لا بیٹھیا سی ۔ہولی ہولی اوہد جتھے نوں وہ پتہ چل رہیا سی کہ کمانڈر ابو ابو دے دانے مک گئے نین تے اوی ہولی ہولی گروپ وچوں کھسکن لگ پئے سی ۔ایس دوران کمانڈر ابوابو بیمار ہو گیا ایہہ اوہ دیہاڑے جدوں او اپنی تیجی بیوی ولے آیا سی ۔کمانڈر ابو ضرار نے اوہدیاں بیویاں نوں کسے شے دی کمی نہیں محسوس ہوون دتی ۔اوہ اپنے کمانڈر اوہدیاں بیویاں تے بالاں دا بڑا خیال رکھ دا سی ۔سب توںنکی دا خیال اوہنے کچھ زیادہ ای رکھیاں ۔جدوں رات نوں وڈیاں سو جاندیاں تے کمانڈر اپنے ہجرے وچ بیماری تے موت دے خوف نال لڑ رہیا ہوندا سی اوہدوں کمانڈر ابو ضرارنکی دے گوڈے مڈھ بیٹھا رحمان بابا دے عشقہ شعر پڑھ دا ہوندے سی ۔ جدوں عورت نوں محبت کرنے واسطے ہم عمر لبھ جاوئے تے اک وار فیر جوبن ول ٹُر جاندی اے ۔اوہ کڑی جیدا پنڈا کمانڈر ابو ابو دی خواہش پوری کر دیاں کردیاں ڈھلکن لگ پیا سی اوہنے کمانڈر ضرار دی محبت وچ فیر اپنے آپ نوں کسنا شروع کیتا ۔
کمانڈر ابو ابو منجی توں اٹھ کے تے بہہ تاں گیا پر اوہ بہت زیادہ کمزور ہو گیا سی ۔اوس دا رنگ زرد، بلھ کالے تے اکھاں اگے کالے ہلکے پے گئے سی ۔اوہ ابو ابو جہیڑا دونبے دی ران کلا ای پھڑکا جاندا سی ہن اوہنوں اک پھلکے دی وی بھک نہیں لگدی سی ۔ہن اوہ بیویاں تے بالاں توں جان چھڑاندا گھیس وٹ کے پیا رھندا سی ۔اوہدا وزن تیزی نال ڈیگن لگ پیا سی ۔جتھے دے بندے وی گھٹ گھٹ کے دس کو ُ رہ گئے سن پر ایہہ اوہدے سچے جانثار سن جہڑے اوہنوں چھڈ کے جاون تے تیار نہیں سن تے کمانڈر دی حالت نوں ویکھ پریشان ہوندے ۔اوہناں نیں نے کمانڈر نوں علاقے دے ہر حکیم نوں وکھا چھڈیا سی ۔شریعت دی خلاف ورزی کردیاں سکھ حکیماں دے بوہے وی بھن چکے سن پر کسے کولوں کوئی شفا نہ لبھی ۔اک سیانے حکیم نے اوہناں نوں مت دتی کہ اپنے کمانڈر نوں علاج لئی شہر لے جاو یا فیر شہروں کوئی ڈاکٹر پھڑ لیاو۔کیوں جے حکیم نوں شک سی کہ کمانڈر ابو ابو دا جگر ختم ہوکے آخری سٹیج تے آ گیا اے ۔ایس سٹیج سے شہر والا ڈاکٹر ای کجھ کر سکدا سی ۔
کمانڈر ابو ابو نے وی لکھ روپیہ فیر طالبان دے حوالے کیتا کہ اوہ شہروں کسے ڈاکٹر نوں اغوا کر لیاون ۔اوہدے بندے کئی دیہاڑے حیات آباد وچ پھردے تے ڈاکٹر لبھ دے رئیے ۔اوہناں نے اک ایسا کلینک وی تاڑ لیا جتھے بوہت زیادہ رش سی ۔اوہناں دے موری طالب نے آکھیا کہ جس ڈاکٹر کول ایناں رش ایہہ ضرور او کوئی چنگا تے سوجھوان داکٹر ای ہو سی ۔اوہ کجھ دیہاڑے داکٹر نوں تاڑے دے رئیے اوہدے آون جاوں دا دھیان رکھ دے رئیے تے اک رات موقعہ ویکھ کے اوہناں نے ڈاکٹر نوں چک لیا۔ ڈاکٹر نوں اوہناں نے کوئی تکلیف نئیںدتی ۔پر ڈاکٹر بوہت زیادہ ڈریا ہویا سی تے اوہدے اتھرو رکن دا ناں نیئں لئے رئیے سن ۔جدوں اوہنوںکمانڈر ابو ابو دے سامنے پیش کیتا گیا تے اوہ کمانڈر دے پیراں وچ ڈگ پیا تے رو رو کے اللہ تے اوہدے رسول دے واسطے دیون لگ پیا۔کمانڈر ابو ابو نے اوہناں دسیہ کہ اوہد اغوا تاوان واسطے نیئں بلکہ علاج کروان لئی کیتا گیا تے ڈاکٹر دے ساہ وچ ساہ آیا ۔ڈاکٹر نے اپنا بیگ منگایا تے اوہد ے وچوں اک چھوٹی جہی ہتھوڑی کڈ لی ۔کمانڈر ابو ابو نے ہتھوڑی نوں ویکھ کے پچھیا کہ ایہہ کیس واسطے ڈاکٹر نے اوہنوں دسیا کہ وہ گوڈے گٹیاں نوں انج ای چیک کر دا جے ۔کمانڈر ابوابو نے آکھیا کہ اوہدے گوڈے ٹھیک نیں بس بھکھ نیئں لگدی تے وزن تیزی نال گھٹ رہیا اے ۔ڈاکٹر نے اپنا سامان اک پاسے رکھیا کمانڈر دی نبض پھڑی ،اکھیاں کھول کے چیک کیتاں ،جیبھوویکھی تے منہ کھلوا کے آآآآ کرن نوں آکھیا۔کجھ دیر بعد ڈاکٹر نے ٹیوا لایا کہ کمانڈر ابو ابو نوں ہیپیاٹائٹس سی اے تے ایہدی وجہ توں اوہدا جگر آخری سٹیج تے آ گیااے ۔اوہنے کمانڈر نوں دسیا کہ اوہ اوہد علاج نیئں کر سکدا کیوں جے ایہہ اوہد فیلڈ نیئں ۔کمانڈر ابو ابو دے جگر دی ٹرانسپلاٹیشن ضروری اے تے ایہہ کم کسی باہر دے ملک وچ ای ہو سکدا سی ۔
کمانڈر ابو ابو دی پریشانی تے ودھی پر ساتھیاں دے منہ وہ ڈگ پئے ۔سوائے کمانڈر ابو ضرار دے ۔کسی نے وی اوہدے منہ تے پریشانی دا کوئی تاثر نیئں ویکھیا۔کمانڈر ابو ابو اپنی موت سامنے ویکھ رہیا سی ۔اوہنوں ترایا ہویا ویکھ کے ڈاکٹر نے بڑی سوچ وچار دے بعدکہیاکہ اک طریقہ ہے جسد ے نال ایہہ علاج ہو سکدا اے پر ایہدے بدلے اوہ ڈاکٹر نوں چھڈ دیون گے ۔۔کمانڈر ابو ابو نے ڈاکٹر نوں امان دتی تے ڈاکٹر نے دسیا کہ اگلے ہفتے پشاور وچ جگر دا اک ووڈا ڈاکٹر امریکہ توں آ رہیا اے ۔جے اوہ اوہنوں چک لیاون تے کجھ ہو سکدا اے ۔کمانڈر ابو ابو دے حکم تے ڈاکٹر کولوں ساری جانکاری لین توں بعد اوہنوں چھڈ دتا گیا تے کمانڈر ابو ابو نے کرایے تے منے پرمنے طالبان اکٹھے کیتے چار ٹیماں بنایاں گییاں تے چار اں نوں اک دوجے توں بے خبررکھیا گیا۔چار ٹیماں بناندا دا کارن ایہہ سی کہ جے اک ٹیم ناکام ہو جاوے تے دوجی ایہہ کم کرلوے ۔ایس کم اوتے کمانڈر ابو ابو دا دو کروڑ روپیہ لگ گیا سی تے ہن اوہدے کول صرف تین کروڑ بچیا سی ۔
کمانڈر ابو ابو دے بندیاں دا آپریشن کامیاب رہیا تے اوہ ڈاکٹر شلڈن نوں چک لیائے ۔ڈاکٹر شلڈن دے اغوا ناں اک واری فیرکمانڈر ابو ابو سی این این تے بی بی سی دیاں خبراں وچ آ گیا سی ۔تھوڑی جہی کامیابی تے ڈاکٹر شلڈن ہتھوں علاج دی امید نیں کمانڈر نوں اک واری فیر اپنے پیرا ں تے کھڑے کر دتا سی ۔ڈاکٹر شلڈن نے ڈر دیاں ڈردیاں کمانڈر دا چیک اپ کیتا ۔کمانڈر دے کجھ ٹیسٹ کروا ئے تے نمونے حیات آباد گھلا دتے ۔جنی دیر وچ رپوٹاں آیاں اونے دن اوہناں نے ڈاکٹر نوں بڑے پیار تے محبت نال رکھیا۔اوہدی ہر طرح دی سیوا کیتی ۔رپوٹاں وچ ایہہ گل کنفرم ہو گئی کہ کمانڈر ابو ابو دا جگر آخری سٹیج تے اے ۔ڈاکٹر نے اوہنوں صورتحال دس چھڈی تے آکھیا کہ فوری طور تے جگر دی ٹرانسپلانٹیشن ضروری اے ۔تے ایہدے واسطے ایک زندہ ڈونر ضروری اے ۔جدوں اوہنے ایہہ گل کیتی تے کمانڈر نے اپنے آسے پاے ویکھا کہ کوئی اوہدا جان نثار اگے ودھے کے اعلان کرے گا کہ اوہدی جان اپنے کمانڈر لئی حاضر ہے ۔پر اوہدے سارے بندے دھون نیویں کر کے اک اک ہوکے کمرے وچوں نکل گئے ۔کمانڈر سمجھ گیا کہ اوہدے جانثاراں وچوں کوئی وی اوہنوں جگر دیون تے تیار نہیں اے ۔فیر اوہنے سوچیا کہ کیوں نہ کوئی بندہ اغوا کر کے اوہد اجگر لے لیا جاوے ۔اوہد ی ایس سوچ نون ڈاکٹر شلڈن نے رد کر چھڈیا کیوں جے بندے لئی ضروری سی کہ اوہد بلڈ گروپ کمانڈر دے بلٖڈ گروپ نال ملدا ہو وے ۔جدوں ہر پاسے ناامید ویکھی تے کمانڈر نے اپنی پگ لا کے شلڈن دے پیرا ں وچ رکھدیاں آکھیا کہ کجھ وی کر او اوہدی جان بچا لیوے
ڈاکٹر شلڈن نے بڑی سوچ دے بعد آکھیا کہ اک طریقہ ہے جیدے نال اوہدی جان بچ سکدی ای ۔۔۔۔ــ’’ اوہ کی اوہ کی ــ‘‘ کمانڈر نے بے صبری دے نال پچھا تے اوہدی اکھاں وچ جیون دی امید جاگ پئی ۔۔۔’’میں اک تجربہ کیتا اے انسان نوں سور دا جگر لاون دا ‘‘ شلڈن نے مان نال گردن اکڑا ںدیاں آکھیا۔کمانڈر اوہدی گل سن کے پہلا ںحیران ہویا فیرپریشان تے فیر سوچی پے گیا۔۔’’تسی کی سوچ ریے اوــ‘‘ شلڈن نے کمانڈر دے موڈھے تے ہتھ رکھداں آکھیا۔۔۔’’کجھ نیئں۔۔پر ایہہ ٹھیک جے انسان نوں اک نجست جانور دا جگر لایا جائے ‘‘ ۔کمانڈر نے حیرانگی نال پچھیا۔۔۔’’وڈی گل انسان نوں بچانا تے اوہدی زندگیاں وچ آسانیاں پیدا کرنا اے۔۔۔۔ایہہ ساری مخلوق خدا دی بنائی اے تے جے انسان دی زندگی ایہہ دے نال بچ جاوے تے ہور کی چاہیدا اے ‘‘ شلڈن نے اوہنوں پیار نال سمجھدیاں ہویاں آکھیاں ـ۔کمانڈر اوہدیاں گلاں سن لمبی سوچ وچ ڈب گیا ۔ــ۔۔۔ــ’’ساڈے کول ویلا بوہت تھوڑا جے ۔چھیتی نال کوئی نا کوئی فیصلہ کرنا پئے گا ــ‘‘ شلڈن نے آکھیا۔کمانڈر نے اوہدے کولوں سوچ وچار کرن دا وقت منگیا ۔
پوری رات کمانڈر ایس سوچ وچ غرق رہیا کہ اوہ کی کرے تے کی نا کرے ۔جدوں اوہ اکھاں بند کردا تے اوہدیاں اکھا ں اگے سب توں چھوٹی بیگم گھمن لگ پیندی ۔او چارپائی تے پلسیٹے مار دا ۔ایس ای پریشانی وچ رات کدوں لنگھ گئی پتہ ای نیئںچلیا۔اوہنے کمانڈر ابو ضرار نوں صلاح کرن لئی سدیا۔کمانڈر ضرار اوہدی گل سن کے اک رنگ آوے تے اک رنگ جاوے۔اوہنے کمانڈر نوںآکھیا کہ پتہ نہیں ایسدی شریعی حیثیت کی ایہہ تے کی نیئں۔’’انسان دی جان بچاناں ای سب تو ووڈا تے افضل کم جے ــ‘‘ کمانڈر آکھیا اوہدی آواز وچ ایہو جہیا اعتماد سی جیویں کوئی بوہت وڈھا مفتی گل کر رہیا ہووے ۔تھوڑی جہی بحث دے بعد کمانڈر ضرار تے اوہدے وچ اتفاق ہو گیا کہ سور دے جگر دی ٹرانسپلانٹیش کران وچ کوئی ہرج نیئں جے پر ایس گل دا کسی ہور نون پتہ نیئں چلنا چاہیدا۔کمانڈر ضرار نے کمانڈر ابو نوں وچن دتا کہ اوہ ایس راز نوں راز رکھ سی
داکٹرشلڈن نال مل کے کمانڈرضرار نے آپریشن کرن دا سارا سامان اکٹھا کر دتا تے اوہ رات دے ہنیرے وچ اک سوروی پھڑ لیایا۔ڈاکٹر شلڈن نے کمانڈر ابوابو کولوں اپنی رہائی دا وچن لین توں بعد اوہد آپریشن کر دتا ۔کوئی دو مہیناں بعد کمانڈر ابو ابو صحت یاب ہوون لگ پیا ۔ڈاکٹر شلڈن نوں اوہنے عزت تے مان نال چھڈ دتا۔ڈاکٹر شلڈن نے اپنی واپسی تے اپنی پیشہ ورانہ دیانت داری نوں برقرار رکھدیاں ہویان کسے نال ایس گل دا ذکر نہیں کیتا ۔
۔۔۔۔۔۔۔۔۔۔۔۔۔۔۔۔۔۔۔
کماندڑ کجھ دناں بعد ٹھیک ہوون لگ پیا ۔اوہدا رنگ جیہڑا بیماری کی پارو ں خراب ہو گیا سی اور واپس لالی ول ٹُر پیا ۔بھُک جہیڑی مک گئی سی اور فیر جاگ پئی بلکہ ہن اگے نال زیادہ ہو گئی سی ۔اک رات اوہ اپنی پہلی بیوی دے گھر کھانا کھا رہیا سی آٹے دی اک تون مک گئی پر کمانڈر ابو ابو ہجے وی سیر نہیں ہویا ۔اوہدے بچے بھک دے نال لیلڑیاں کڈے رے سن ۔چھوٹے منڈا بار بار روٹی روٹی منگ رہیا سی ۔اوہ جدوں وی منڈی نوں توے توں روٹی لاہ کے دیون لگی سی اودوں ای روٹی ابو ابو چک لیندا ۔بچے بھکے دے مارے ڈھڈ وچ مکیاں دے رے سن تے ماں نوں تنگ کر رہے سن ۔ماں نے کاوڑ نال آکھیا کہ ــ’’ دیندی آں کھانا تہاڈے پیو دے ڈڈھ وچ پتہ نہیں کیہڑا سور ورڑھ گیا اے جہیرا رج دا ای نیئں پیا ــ‘‘۔۔ایہہ پہلی وار سی جدو ں کمانڈر ابو ابو دے کناں وچ سور دے الفاظ پئے روٹی اوہدے ہتھوں جا پئی ۔غصے وچ اٹھیا تے روٹیاں سیکن والے چھکے نال بیوی دی چنگی طرح خبر لئی ،بالاں نوں کٹا تے گھروں باہر نکل گیا ۔ہن اوہدی بھُکھ دا ایہی عالم سی جیہڑا۔ہولی ہولی اوہ خود وی پریشان ہو گیا کہ اوہنوں بار بار ایہہ اینی بھُک کیوں لگدی اے ۔واقعی کیتے ایہدی وجہ سور دا جگر تے نہیں ۔کجھ دناں بعد اوہ بالکل واپس روٹین دی زندگی تے آ گیا ۔جدوں جسم دے پٹھے مضبوط ہوئے جسم چ نواں خون بنایا تے اوہدے گرمی نے کمانڈر جذبات نوں توخھا دیتا ۔اوس رات اوہ اپنی سب تو ں نکی ووٹی ول گیا۔
نکی ووٹی نے بڑے چر بعد جدوں اپنے بندے دی خواہش بارے سنیا تے پریشان ہو گئی ۔پر کجھ بولی نیئںپر اوس رات اوہنوں لگا کہ کمانڈر ابوابو وچ جیویں کوئی جنور وڑھ گیا جے ۔کیوں جے اوس ٹیم اوہدے چالے کوئی بندیاں ورگے نہیں سن ۔اوہ ایس گل نوں برادشت کر گئی کہ خورے ایہہ اک لمبی جدائی دے وجہ اے ۔دوجے پاسے کمانڈر نوں ایہہ محسوس ہویا کہ ایہہ سارا کم نیویں جگر تے نیویں پیدا ہونے والے خون دا کمال ایہہ۔ہر رات جدوں ہو دا عالم ہو جاندا تے کمانڈر ابو ابو دے تیکھے ساہاں اور اوہدی بیوی دے ہوکیاں دیاں واج گھر دی چار دیواری وچ گونجن لگ پیندی ۔چھوٹی ووھٹی دیاں سوکن دے کناں وچ جدوں ایہہ واج پیندی تے اوہناں دے دل وچ بھانبڑ مچن لگ پیندے ۔جدوں کمانڈر دے پٹھے دھیلے ہوندے لمبیاں لمبیاں ساہواں آوندیاں تے فیئر اوہنوں دودھ پین دی لوڑ پیندی تے ایہہ وی نکی ووٹی دا فرض سی کہ اوہ کمانڈر نوں دودھ گرم کر کے دیندی ۔ایس روٹین وچ کئی دیہاڑے لنگھ گئے
کمانڈر ضرار وی پریشان سی کہ اوہنوں ملاقات دا ویلا نیئںمل رہیا سی ۔اک رات اوہنے چھوٹی ووٹی نوں نیند دیاں گولیاں لیا کے دتیاں جہیڑی اوہنے کمانڈردے دودھ وچ ملا دتیاں ۔اوس رات اوہ کمانڈر ابو ضرار نوں دل دے پھٹ تے نہیں وکھا سکی پر اوس نے جسم تے پین والے نشان ضرور وکھا چھڈے ۔ابو ضرار اوہدے زخماں تے ہنجوادا پھاہا رکھدا رہیا ۔جدوں ایہہ سارا ماجرا ویکھا تے اوس نوں شک پیا کہ کیتے ایہہ سور دے جگر دا نتیجہ تے نیئں۔اوہنے اپنے طور تے پرکھ پڑچول تے حساب کتا ب کر کے ایہہ ویروا کڈھ لیا کہ ایہہ سور دے جگر دی گرمی اے جیہڑی کمانڈر ابو ابو نوں ٹکن نیئںدیندی ۔جدوں جذبات پھٹے تے کمانڈر ابو ابو نوں سور دا جگر لاوں والی گل لاوے وانگوں باہر آئی ۔نکی ووٹی ایہہ سن کے سکتے وچ آ گئی ۔کمانڈر ابو کولوں اوہنے نفرت ہووں لگ پئی تے نال نال اپنے کولوں وی کراہت آون لگ پئی ۔اوس رات دوہاں نے کمانڈر ابو ابو کولوںجان چھڑا کے ہمشہ ہمشہ لئی اک ہوون دا فیصلہ کیتا ۔نال ایہہ وی فیصلہ کیتا کہ کسے ٹھیک ویلے تے ایہہ راز فاش کیتا جائے گا
عورت صرف اپنا عشق دا راز لکو سکدی اے ۔ایک دیہاڑ ے روٹی پکاون توں سوکناں وچ لڑائی چھڑ گئی ۔کمانڈر ابو ابو نے گھر اپڑ کے جدوں اوہناں نوں چھڑان دی تے شعلہ بیانی دی داد اپنے ڈنڈے نال دیون دی کوشش کیتی تے نکی ووھٹی دے منہ وچوں نکلیا’’سور دا جگر لوا کے بندے نوں ایویں جوانی چڑھدی اے‘‘۔کمانڈر ابوا بو نے جدوں ایہہ سنیا تے ہتھ روک لیا تے چھیتی نال نکی ووٹی نوں کمرے وچ لے جا کے بند کردا ۔شام تیکر اوہ ایس گل تے پریشان رہیا کہ ایہہ راز تے صرف کمانڈر ابو ابو نوں پتہ سی ایہہ اوہدی بیوں نوں کنج پتہ لگیا ۔ رات نوں اوہنے پہلاں پیار نال بیوی کولوں پوچھن دی کوشش کیتی کہ اوہنوں ایہہ گل کتھوں پتہ لگی ۔پر جدوں اوہ کجھ وی نا بولی تے ۔کمانڈر نے اوہنوں نوں والاںتوں پھڑیا تے اودوں تیکر مار دا رہیا جدوں تیکر اوہنے کمانڈر ضرار دا نام نیئں لے دتا ۔ جوش وچ ہو ش گواندیاں ہویاں کمانڈر ابو ابو نے بیوی نوں چھڈیا تے کمانڈر ضرار دے ہجرے ول ٹور پیا۔دوہاں وچ خوب ہاتھا پائی ہوئی ۔دوجے ساتھیاں اوہناں نوں چھڑایا۔گل ساریاں دے سامنے کھل کے آ گئی ۔ساتھیاں کمانڈر ضرار دا ساتھ دتا تے کمانڈر ابو ابو نوں اک کمرے وچ بند کر دتا تاں جے سوری مفتیاں دی شوری ایس سارے مسلے بارے چرچا کر کے کوئی فیصلہ کر سکے
اگلے روز پورے علاقے وچ دھم پے گئی ۔شوریٰ دے مفتی اکٹھے ہوئے اوہناں دواں پاسے دلائل سن دی کھیچل ای نہیں کیتی ۔فورا شریعت دی رو نال کمانڈر ابو ابو نوں قصور وار قرار دے چھڈیا ۔اوہناں نے ایہنوں ایک غیر مذہبی فعل قرار دتا ۔سب توں پہلا فیصلہ جہیڑا کمانڈر بارے کیتا گیا اوہدے وچ اوہناں نے کمانڈر دے چار نکاح فاسق قرار دے دتے ۔دوجے فیصلے وچ اوہناں اشرف المخلوقات دی توہین تے انسان نوں سور دا جگر لوان دے جرم وچ کمانڈر ابو ابو نوں موت دی سزا سنا دتی تے ایہہ وہ آکھیا گیا کہ اوہدا سر کسی ایسی تھاں تے کپیاں جاوے جتھے ایماندار دے قدم نہ پیندے ہووں ۔
اگلے دن کمانڈر ابو ضرار اوہنوں علاقے دے باہر پہاڑان اوتے لے گیا۔جدوں اوہ کمانڈر دا سرکپن دی تیاری کر رہیا سی اودوں کمانڈر ابو ابو گڑا گڑا نے معافی منگ رہیا سی تے اپنے احسانات اوہنوں یاد کروا رہیا سی ۔آخر کمانڈر ضرار دا دل پسیج گیا۔اوہنے کمانڈر ابو ابو نوں اک شرط سے معاف کر چھڈیا کہ اوہ کدی وی اپنا منہ نیئں وکھائے ۔جاندے جاندے اوہنے نکی ووٹی دے زخمان دے بدلے وچ کمانڈر ابو ابو دا ہتھ وڈ دتا۔
۔۔۔۔۔
عدت پوری ہونے تے کمانڈر ابو ضرار نے کمانڈر ابو ابو دی چاراں بیویاں نال عقدے ثانی فرما لیا ۔
۔۔۔۔۔۔
کسے نے دسا کہ اوہنے قصہ خوانی بازار وچ اک ٹنڈے نوں بھیک منگدیاں ویکھا اے ۔۔پتہ کیوں منیوں ایہہ لگدا اے کہ ایہہ ٹنڈا کمانڈر ابو ابو نہیں


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels