Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> داستان امیر حمزہ >> پہلی جلد >> داستان امیر حمزہ: ورقہ 6

داستان امیر حمزہ: ورقہ 6

وچار ڈیسک
July 6th, 2008

وفات پانا قباد شہر یار کا اور تخت نشین ہونا نوشیرواں کا ارو واپس آنا خواجہ بزرجمہر کا مدائن میں

آہی بزرجمہر دے دل وچ سوچ پئی
مکے اندر رہندیاں مُدت گزر گئی
شاہ گھلیا کس کار نوں میں کیتا کجھ ہور
گویا شاہ قباد تھیں میں ہویا ہُن چور
میں آ کے وچ عربیاں کتنے بہت لفان
طرفے اس دے مقصدے کیتا نہ دھیان
میرے ولوں ہو سی آخر بے اعتبار
آہا بزرجمہر دے اس فکروں دل بھار
تد نوں گیا مدائنوں لے خط پیک روان
اس دے پسر سیاد خش لکھیا ایہہ بیان
٭٭٭




مضمون خط سیاو خش فرزندِ بزرجمہر

اول حمدا خدائے نوں پھیر درود خلیل
جس نوں دوس اپنا کیتا رب جلیل
تیرا پسر سیاد خش تیں در عرض گزار
بغد سلام آداب دے حال کرے اظہار
بعد تساڈے گیاں دے کچھ دن گئے وہا
دنیا فانی چھوڑ کے گیا قبا دسدہا
ہُن آہا نوشیرواں کر دا حُکم روان
بختک اس وزیر ہے جس تھیں تنگ جہان
اندر ساری سلطنت بختک ہے مختار
کردا ظلم تعدیاں نہ کو ورجنہار
ہالہ اُپر زمین دے کر دتا دو چند
ودھ کیتے محصول تے رہے بپاری بند
جس دن دی وچ ملک دے ایہہ بلا پئی
دیسی رعیت چھڈ کے کدھرے چلی گئی

خلقت تائیں لُٹ کے جمع کرایا مال
رات دنے وچ ملک دے ظلم کرے ہر حال
ایہہ نصیحت کر گیا جاندی واری قباد
اے فرزند نوشیرواں رکھ نصیحت یاد
گیا ہویا ہے عرب نوں میرا خاص وزیر
مارن تیرے دشمناں تائیں کر تدبیر
جاں مُڑ آوے عرب تھیں کریو استقبال
تھانوں میرے وچ جانیوں اس نوں ہر ہر حال
ہو سی تیرا خیر خواہ خلقت دا غم خوار
حکم منیں توں اوس دا ہو فرمانبردار
رہ سی وچ جہاں دے تاہیں تیرا راج
اس دی برکت بادشاہ تیرا بھرن خراج
وچ امن دے رہے گا ملک تیرا آباد
پاویں توں نوشیرواں دل دی کل مراد
جے اس میرے کہے نوں نال رکھیں گا یاد
رہے ریاست مول ناں خلق ہووے برباد
اس میرے مکتوب نوں حضرت جدوں پڑھو
شہر مدائن آڈرو عربوں تُرت چڑھو

جے ہُن ویر لگا وس خلق ہو سی ویران
آن پچھوں پچھتاو سو حیران تے پریشان
جاں ایہہ بزرجمہر نے پڑھیا حال بیان
رخصت کر کے مکیوں ہویا جلد روان
منزل منزل آیا شہر مدائن دا
خبر سنی نوشیرواں خواجہ پہونتا آ
بختک نوں نوشیرواں تُرت کرے فرمان
ہویو استقبال نوں میرے نال روان
بختک کہندا کون ہے بزرجمہر کنگال
لائق نہیں غلام دا شاہاں استقبال
فرماوے نوشیرواں اے بختک بد بخت
کیتی میرے باپ نے ایہہ وصیت سخت
جانی بزرجمہر نوں میری جا بجا
اُس دا استقبال ہُن کیوں ناں کراں ادا
ایہہ بزرجمہر ہے گویا میرا باپ
میں اس دی تعظیم نوں کراں چڑھائی آپ
ہو شرمندہ چُپ ہو بختک رہیا حرام
استقبال نوشیرواں کھڑدا فوج تمام

نال تجمل شان دے جاں آئے وچ راہ
کیتی بزرجمہر نے طرفے شاہ نگاہ
پیر پیادہ ہوئیکے آیا سر جُھکا
بھی ٹُریا نوشیرواں ویکھ پیادہ پا
دونیں ہوئے بغلگیر ملے محبت نال
دلوں شاہ قباد دے رُنّے آنسو ڈھال
کر تعزیت ہووندے پھیر تمام سوار
چلے طرف مدائنے اندر زیب ہزار
ڈٹھے راہے جاندیاں کر دے شور طیور
جانوراں وچ ویکھیا جھگڑا جنگ فتُور
کر آوازے قہر دے لڑن جناور دو
مرد سپاہی ویکھدے حالت انہاں کھلو
اندر کن نوشیرواں بختک کہے حرام
پُچھے بزرجمہر نوں اس دا حال تمام
کیوں لڑدے ایہہ جانور کرن کویہی دُھوم
جانوراں دیاں بولیاں اس نوں ہین معلوم
ہو تعجب بادشاہ اوویں کرے سوال
کہیا بزرجمہر نے سُن اے فرخ نال

اجنوراں دی بولیوں دیواں راز اگھاڑ
الُّو ہن ایہہ جانور واسا جیہناں اُجاڑ
اک چاے جو دوجیوں نسبت کرے حصول
دوجا کہندا نہ کراں مہر بھرے بن مول
جے چوداں گِن اسانوں شہر دیویں ویران
تاں ایہہ نست ہووسی تیں میں وچ آسان
چودہ منگ نہ لکھ لے شہر کہے ویران
جاں لگ ہے نوشیرواں حاکم وچ جہان
ایہہ گل سُن لوشیرواں کہندا ہو مغموم
ہے بختک بدبخت تھیں خلق سبھی مظلوم
اس دے ظلم تعدیوں دیس اجاڑ پیا
بھج شتانی ایڑیں ایہہ بگھیاڑ پیا
بختک دشمن ملک دا خلقت دا بد خواہ
کثرت نال تعدیو شرط دھرے گمراہ
بھلا ہویا توں عرب تھیں مُڑیوں وقت بھلے
بختک دی تدبیر تھیں میں دل لاٹ بلے
جیوں چاہیں ہُن آپ کر ملکاں دا سامان
دلوں بجا نوں من ساں میں تیرا فرمان

وچ دربار مدائنے آنلتھا سلطان
بخشے بزرجمہر نوں بہت بلند مکان
خواجہ بزرجمہر نے دھر قانون آسان
ہر ہر طرف ولائتاں قاصد کرے روان
اک دستورالعمل تھیں مت کو کرے خطا
حکم چلا دے حق تے ہر ہر حکم روا
بھار خراج اتاریا تے محصول تمام
تھوڑا کیتا بھار تے پائیا خلق آرام
ہر ہر جگہ ٹُر پیا ملک اندر انصاف
جور جفا جہان تھیں جان دا رہیا صاف
پہرو ہوئے چور تے دوست گرگ ہرن
باز چڑی اک تاش تے رل مل چوگ چرن
آبادی وچ ملک دے روز بروز ودھیر
دھوئی شاہ نوشیرواں دی پھر گئی چوفیر
عاقی باغی سرکشاں آن نوائے سیس
نہ اس دے وچ ملک دے کو کر سکے ریس
اس دن تھیں نوشیرواں عادل پیا خطاب
پھر سبھ عمر کمایا اس نے عدل ثواب

برکت بزرجمہر دی پایا نام بلند
نال وسیلے عدل دے ہویا طالع مند
حمزہ عمر عیاری اے دل گل سُنا
چھوڑ احوال نوشیرواں رہن دیو اک دا
٭٭٭


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels