ਹੀਰ ਵਾਰਸ ਸ਼ਾਹ : ਬੰਦ ੫੨੧-੫੩੦

521. ਉਹੀ, ਚਲਦਾ
ਤੇਰੇ ਸਿਆਹ ਤਤੋਲੜੇ ਕਜਲੇ ਦੇ ਕੋਡੀ ਅਤੇ ਗੱਲ੍ਹਾਂ ਉਤੋਂ ਗੁੰਮ ਗਏ
ਤੇਰੇ ਫੁਲ ਗੁਲਾਬ ਦੇ ਨਾਅਲ ਹੋਏ ਕਿਸੇ ਘੇਰ ਕੇ ਰਾਹ ਵਿੱਚ ਚੁੰਮ ਲਏ
ਤੇਰੇ ਖਾਂਚੇ ਇਹ ਸ਼ੱਕਰ ਪਾਰਿਆ ਦੇ ਹੱਥ ਮਾਰ ਕੇ ਭੁਖਿਆਂ ਲੁੰਮ ਲਏ
ਧਾੜਾ ਮਾਰ ਕੇ ਧਾੜਵੀ ਮੇਵਿਆਂ ਦੇ ਰੇ ਝਾੜ ਬੂਟੇ ਕਿਤੇ ਗੁੰਮ ਗਏ
ਬੱਡੇ ਵਣਜ ਹੋਏ ਅੱਜ ਵੌਹਟੀਆਂ ਦੇ ਕੋਈ ਨਵੇਂ ਵਨਜਾਰੇ ਘੁੰਮ ਗਏ

522. ਉਹੁਹੀ, ਨਨਾਣ ਤੇ ਹੀਰ
ਕੋਈ ਧੋਬੀ ਵਲਾਇਤੋਂ ਆ ਲੱਥਾ ਸਰੀ ਸਾਫ ਦੇ ਥਾਨ ਚੜ੍ਹ ਖੁੰਬ ਗਿਆ
ਤੇਰੀ ਚੋਲੀ ਵਲੂੰਧਰੀ ਸਣੇ ਸੀਨੇ ਪੇਂਜੇ ਤੂੰਬਿਆਂ ਨੂੰ ਜਿਵੇਂ ਤੁੰਬ ਗਿਆ
ਖੇੜੇ ਕਾਬਲੀ ਕੱਤਿਆਂ ਵਾਂਗ ਏਥੇ ਵਢਵਾ ਕੇ ਕੰਨ ਤੇ ਦੁੰਬ ਗਿਆ
ਵਾਰਸ ਸ਼ਾਹ ਅਚੰਬੜਾ ਨਵਾਂ ਹੋਇਆ ਸੁੱਤੇ ਪਾਹਰੂ ਨੂੰ ਚੋਰ ਟੁੰਬ ਗਿਆ

523. ਉਹੀ ਚਲਦਾ
ਕਿਸੇ ਕੇਹੇ ਨਪੀੜੇਨੇ ਪੀੜੀਏਂ ਤੂੰ ਤੇਰਾ ਰੰਗ ਹੈ ਤੋਰੀ ਦੇ ਫੁਲ ਦਾ ਨੀ
ਢਾਕਾਂ ਤੇਰੀਆਂ ਕਿਸੇ ਮਰੋੜੀਆਂ ਨੇ ਇਹ ਤਾਂ ਕੰਮ ਹੋਇਆ ਹਿਲਜੁਲ ਦਾ ਨੀ
ਤੇਰਾ ਅੰਗ ਕਿਸੇ ਪਾਇਮਾਲ ਕੀਤਾ ਢੱਗਾ ਜੋਤਰੇ ਜਿਵੇਂ ਹੈ ਘੁਲ ਦਾ ਨੀ
ਵਾਰਸ ਸ਼ਾਹ ਮੀਆਂ ਇਹ ਦੁਆ ਮੰਗੋ ਖੁਲ ਜਾਏ ਬਾਰਾ ਅੱਜ ਕੁਲ ਦਾ ਨੀ

524. ਉੱਤਰ ਹੀਰ ਤੇ ਨਨਾਣ
ਪਰਨੇਹਾਂ ਦਾ ਮੈਨੂੰ ਅਸਰ ਹੋਇਆ ਰੰਗ ਜ਼ਰਦ ਹੋਇਆ ਏਸੇ ਵਾਸਤੇ ਨੀ
ਛਾਪਾਂ ਖੁਭ ਗਈਆਂ ਗਲ੍ਹਾਂ ਮੇਰੀਆਂ ਤੇ ਦਾਜ਼ ਲਾਲ ਪਏ ਏਸੇ ਵਾਸਤੇ ਨੀ
ਕੱਟੇ ਜਾਂਦੇ ਨੂੰ ਭਜ ਕੇ ਮਿਲੀ ਸਾਂ ਮੈਂ ਤਾਣੀਆਂ ਢਿਲੀਆਂ ਨੇ ਏਸੇ ਵਾਸਤੇ ਨੀ
ਰੁੰਨੀ ਅਥਰੂ ਡੁੱਲ੍ਹੇ ਸਨ ਮੁਖੜੇ ਤੇ ਘੁਲ ਗਏ ਤਤੋਲੜੇ ਪਾਸ ਤੇ ਨੀ
ਮੂਧੀ ਪਈ ਬਨੇਰੇ ਤੇ ਦੇਖਦੀ ਸਾਂ ਪੋਡੂ ਲਾਲ ਹੋਇਆ ਏਸੇ ਵਾਸਤੇ ਨੀ
ਸੁਰਖੀ ਹੋਠਾਂ ਦੀ ਆਪ ਮੈਂ ਚੂਪ ਲਈ ਰੰਗ ਉਡ ਗਿਆ ਏਸੇ ਵਾਸਤੇ ਨੀ
ਕੱਟਾ ਘੁਟਿਆ ਵਿੱਚ ਗਲੋਕੜੀ ਦੇ ਡੁੱਕਾਂ ਲਾਲ ਹੋਈਆਂ ਏਸੇ ਵਾਸਤੇ ਨੀ
ਮੇਰੇ ਪੇਡੂ ਨੂੰ ਕੱਟੇ ਢਿਡ ਮਾਰੇ ਲਾਸਾਂ ਬਖਲਾਂ ਦੀਆਂ ਮੇਰੇ ਮਾਸ ਤੇ ਨੀ
ਹੋਰ ਪੁਛ ਵਾਰਸ ਮੈਂ ਜ਼ਰੀਬਣੀ ਨੂੰ ਕਿਉਂ ਅੱਘਦੇ ਲੋਕ ਮਹਾਸਤੇ ਨੀ

525. ਉੱਤਰ ਨਨਾਣ
ਭਾਬੀ ਅਖੀਆਂ ਦੇ ਰੰਗ ਰੱਤ ਵੰਨੇ ਤੈਨੂੰ ਹੁਸਨ ਚੜ੍ਹਿਆ ਅਨਿਆਂਉ ਦਾ ਨੀ
ਅੱਜ ਧਿਆਨ ਤੇਰਾ ਆਸਮਾਨ ਉਤੇ ਤੈਨੂੰ ਆਦਮੀ ਨਜ਼ਰ ਨਾ ਆਂਉਦਾ ਨੀ
ਤੇਰੇ ਸੁਰਮੇ ਦੀਆਂ ਧਾਰੀਆਂ ਧੂੜ ਪਈਆਂ ਜਿਵੇਂ ਕਾਟਕੋ ਮਾਲ ਤੇ ਧਾਂਉਦਾ ਨੀ
ਰਾਜਪੂਤ ਮੈਦਾਨ ਵਿੱਚ ਲੜਨ ਤੇਜ਼ਾਂ ਅੱਗੇ ਢਾਢੀਆਂ ਦਾ ਪੁੱਤ ਗਾਂਉਦਾ ਨੀ
ਰੁਖ ਹੋਰ ਦਾ ਹੋਰ ਹੈ ਅੱਜ ਤੇਰਾ ਚਾਲਾ ਨਵਾਂ ਕੋਈ ਨਜ਼ਰ ਆਉਂਦਾ ਨੀ
ਅੱਜ ਆਖਦੇ ਹੈਣ ਵਾਰਸ ਸ਼ਾਹ ਹੋਰੀਂ ਖੇੜਾ ਕੌਣ ਗਾਂਡੂ ਕਿਸ ਥਾਂਉ ਦਾ ਨੀ

526. ਉੱਤਰ, ਹੀਰ ਦਾ ਸਹਿਤੀ ਨੂੰ
ਮੁਠੀ ਮੁਠੀ ਮੈਨੂੰ ਕੋਈ ਅਸਰ ਹੋਇਆ ਅੱਜ ਕੰਮ ਤੇ ਜਿਊ ਨਾ ਲਗਦਾ ਨੀ
ਭੁੱਲੀ ਵਿਸਰੀ ਬੂਟੀ ਉਲੰਘ ਆਈ ਇੱਕੇ ਪਿਆ ਭੁਲਾਵੜਾ ਠਗ ਦਾ ਨੀ
ਤੇਵਰ ਲਾਲ ਮੈਨੂੰ ਅੱਜ ਖੇੜਿਆਂ ਦਾ ਜਿਵੇਂ ਲੱਗੇ ਉਲੰਬੜਾ ਅੱਗ ਦਾ ਨੀ
ਅੱਜ ਯਾ ਦਆਏ ਮੈਨੂੰ ਸਈ ਸੱਜਣ ਜੈਂਦਾ ਮਗਰ ਓਲਾਂਭੜਾ ਜਗ ਦਾ ਨੀ
ਖੁਲ ਖੁਲ ਜਾਂਦੇ ਬੰਦ ਚੋਲੜੀ ਦੇ ਅੱਜ ਗਲੇ ਮੇਰੇ ਕੋਈ ਲਗਦਾ ਨੀ
ਘਰ ਬਾਰ ਵਿੱਚੋਂ ਡਰਨ ਆਂਵਦਾ ਹੈ ਜਿਵੇਂ ਕਿਸੇ ਤਤਾਰਚਾ ਵਗਦਾ ਨੀ
ਇੱਥੇ ਜੋਬਨੇ ਦੀ ਨਏਂ ਠਾਠਾ ਵੱਤੀ ਬੂੰਬਾ ਆਂਵਦਾ ਪਾਣੀ ਤੇ ਝਗਦਾ ਨੀ
ਵਾਰਸ ਸ਼ਾਹ ਬੁਲਾਉ ਨਾ ਮੂਲ ਮੈਨੂੰ ਸਾਨੂੰ ਭਲਾ ਨਾਹੀਂ ਕੋਈ ਲਗਦਾ ਨੀ

527. ਨਨਾਣ ਦਾ ਉੱਤਰ
ਅੱਜ ਕਿਸੇ ਭਾਬੀ ਤੇਰੇ ਨਾਲ ਕੀਤੀ ਚੋਰ ਯਾਰ ਫੜੇ ਗੁਨਾਂਹਗਾਰੀਆਂ ਨੂੰ
ਭਾਬੀ ਅੱਜ ਤੇਰੀ ਗਲ ਉਹ ਬਣੀ ਦੁੱਧ ਹੱਥ ਲੱਗਾ ਧੁਧਾ ਧਾਰੀਆਂ ਨੂੰ
ਤੇਰੇ ਨੈਣਾਂ ਦੀਆਂ ਨੋਕਾਂ ਦੇ ਖਤ ਬਣਦੇ ਵਾਢ ਮੱਲੀ ਹੈ ਜਿਵੇਂ ਕਟਾਰੀਆਂ ਨੂੰ
ਹੁਕਮ ਹੋਰ ਦਾ ਹੋਰ ਅੱਜ ਹੋ ਗਿਆ ਅੱਜ ਮਿਲੀ ਪੰਜਾਬ ਕੰਧਾਰੀਆਂ ਨੂੰ
ਤੇਰੇ ਜੋਬਨੇ ਦਾ ਰੰਗ ਕਿਸੇ ਲੁਟਿਆ ਹਨੂਮਾਨ ਜਿਉਂ ਲੰਕ ਅਟਾਰੀਆਂ ਨੂੰ
ਹੱਥ ਲੱਗ ਗਈ ਏਂ ਕਿਸੇ ਯਾਰ ਤਾਈਂ ਜਿਵੇਂ ਕਸਤੂਰੀ ਦਾ ਭਾਰ ਵਪਾਰੀਆਂ ਨੂੰ
ਤੇਰੀ ਤੱਕੜੀ ਦੀਆਂ ਕਸਾਂ ਢਿਲੀਆਂ ਨੇ ਕਿਸੇ ਤੋਲਿਆ ਲੌਂਗ ਸਪਾਰੀਆਂ ਨੂੰ
ਜਿਹੜੇ ਨਿੱਤ ਸਵਾਹ ਵਿੱਚ ਲੇਟਦੇ ਸਨ ਅਜ ਲੈ ਬੈਠੇ ਸਰਦਾਰੀਆਂ ਨੂੰ
ਅੱਜ ਸਿਕਦਿਆਂ ਕਵਾਰੀਆਂ ਕਰਮ ਖੁਲੇ ਨਿਤ ਢੂੰਡਦੇ ਸਨ ਜਿਹੜੇ ਯਾਰੀਆਂ ਨੂੰ
ਚੂੜੇ ਬੀੜੇ ਤੇ ਚੂਰ ਸੰਘਾਰ ਹੋਏ ਠੋਕਰ ਲਗ ਗਈ ਮਿਨਹਾਰੀਆਂ ਨੂੰ
ਵਾਰਸ ਸ਼ਾਹ ਜਿਨ੍ਹਾਂ ਮਿਲੇ ਇਤਰ ਸ਼ੀਸ਼ੇ ਉਹਨਾਂ ਕੀ ਕਰਨਾ ਫੌਜਦਾਰੀਆਂ ਨੂੰ

528. ਹੀਰ ਦਾ ਉੱਤਰ
ਕੇਹੀ ਛਿੰਜ ਘੱਤੀ ਅੱਜ ਤੁਸਾਂ ਭੈਣਾਂ ਖੁਆਰ ਕੀਤਾ ਜੇ ਮੈਂ ਨਿੱਘਰ ਜਾਂਦੜੀ ਨੂੰ
ਭੱਈਆਂ ਪਿੱਟੀ ਕਦੋਂ ਮੈਂ ਗਈ ਕਿਧਰੇ ਕਿਉ ਉਡਾਈਆਂ ਜੇ ਮੈਂ ਮੁਨਸ ਖਾਂਦੜੀ ਨੂੰ
ਛੱਜ ਛਾਣਨੀ ਘਤ ਉਡਾਇਆ ਜੇ ਮਾਪੇ ਪਿੱਟਣੀ ਤੇ ਲੁੜ੍ਹ ਜਾਂਦੜੀ ਨੂੰ
ਵਾਰਸ ਸ਼ਾਹ ਦੇ ਢਿਡ ਵਿੱਚ ਸੂਲ ਹੁੰਦਾ ਸੱਦਣ ਗਈ ਸਾਂ ਮੈਂ ਕਿਸੇ ਮਾਂਦਰੀ ਨੂੰ

529. ਨਨਾਣ ਦਾ ਉੱਤਰ
ਕਿਸੇ ਹੋ ਬੇਦਰਦ ਲਗਾਮ ਦਿੱਤੀ ਅੱਡੀਆਂ ਵੱਖੀਆਂ ਵਿੱਚ ਚੁਭਾਈਆਂ ਨੇ
ਢਿੱਲਿਆਂ ਹੋ ਕੇ ਕਿਸੇ ਮੈਦਾਨ ਦਿੱਤਾ ਲਈਆਂ ਕਿਸੇ ਮਹਿਬੂਬ ਸਫਾਈਆਂ ਨੇ
ਸਾਹ ਕਾਹਲਾ ਹੋਠਾਂ ਤੇ ਲਹੂ ਲੱਗਾ ਕਿਸੇ ਨੀਲੀ ਨੂੰ ਠੋਕਰਾਂ ਲਾਈਆਂ ਨੇ
ਵਾਰਸ ਸ਼ਾਹ ਮੀਆਂ ਹੋਣੀ ਹੋ ਰਹੀ ਹੁਣ ਕੇਹੀਆਂ ਰਿੱਕਤਾਂ ਚਾਈਆਂ ਨੇ

530.
ਲੁੜ੍ਹ ਗਈ ਜੇ ਮੈਂ ਪਰਤ ਪਾਟ ਚੱਲੀ ਕੁੜੀਆਂ ਪਿੰਡ ਦੀਆਂ ਅੱਜ ਦੀਵਾਨੀਆਂ ਨੇ
ਚੂਚੀ ਲਾਂਉਦੀਆਂ ਧੀਆਂ ਪਰਾਈਆਂ ਨੂੰ ਬੇਦਰਦ ਤੇ ਅੰਤ ਬੇਗਾਨੀਆਂ ਨੇ
ਮੈਂ ਬੇਦੋਸੜੀ ਅਤੇ ਬੇਖ਼ਬਰ ਤਾਈਂ ਰੰਗ ਰੰਗ ਦੀਆਂ ਲਾਦੀਆਂ ਕਾਨੀਆਂ ਨੇ
ਮਸਤ ਫਿਰਨ ਉਤਮਾਦ ਦੇ ਨਾਲ ਭਰੀਆਂ ਟੇਢੀ ਚਾਲ ਚੱਲਣ ਮਸਤਾਨੀਆਂ ਨੇ

ਔਖੇ ਲਫ਼ਜ਼ਾਂ ਦੇ ਮਾਅਨੇ

521
ਤਤੋਲੜੇ। ਆਪ ਬਣਾਇਆ ਤਿਲ
ਖਾਂਚੇ। ਵੱਡੇ ਥਾਲ ਜਿਹੜੇ ਮਠਿਆਈਆ ਵੇਚਣ ਵਾਲੇ ਦੁਕਾਨਦਾਰਾਂ ਕੋਲ ਆਮ ਹੁੰਦੇ ਸਨ।
ਲੁੰਮ ਲਏ। ਝਪਟੀ ਮਾਰ ਕੇ ਖੋਹ ਲਏ

522
ਵਲਾਇਤ। ਗ਼ੈਰ ਦੇਸ
ਦੁੰਬ। ਪੂਛ
ਅਚੰਬੜਾ। ਅਚੰਬਾ
ਪਾਹਰੂ। ਪਹਿਰੇਦਾਰ
ਨਪੀੜ। ਨਪੀੜਨ ਵਾਲਾ

523
ਤੋਰੀ ਦੇ ਫੁਲ ਦਾ। ਪੀਲਾ
ਪਾਇਮਾਲ। ਬਰਬਾਦ ਕੀਤਾ, ਪੈਰਾਂ ਥੱਲੇ ਮਿੱਧਿਆ
ਬਾਰਾ ਖੁਲ੍ਹ ਜਾਏ। ਕੰਮ ਬਣ ਜਾਵੇ
ਕੁਲ। ਸਾਰਿਆਂ ਦਾ

524
ਪਰਨੇਹਾਂ। ਪੀਲੀਆ, ਯਰਕਾਨ
ਜ਼ਰਦ। ਪੀਲਾ
ਛਾਪਾਂ। ਛਾਪ ਦਾ ਬਹੁ। ਵਚਨ, ਮੁੰਦੀਆਂ
ਰੁੰਨੀ। ਰੋਈ
ਪੇਡੂ। ਧੁੰਨੀ ਤੋਂ ਥੱਲੇ ਦਾ ਢਿਡ
ਬੱਖਲ। ਬੱਖਰ, ਪਸ਼ੂ ਪਾ ਬੰਨਣ ਦਾ ਮਕਾਨ
ਅਘਦੇ। ਨਿਰਦੋਸ਼ ਨੂੰ ਦੋਸ਼ ਦਿੰਦੇ

525
ਕਾਟਕੋ। ਧਾੜਵੀ
ਖੇੜਾ ਕੌਣ ਗਾਂਡੂ। ਵਾਰਸ ਸ਼ਾਹ ਨੂੰ ਹੀਰ ਦੀ ਸਫਲਤਾ ਦੀ ਦਿਲੀ ਖੁਸ਼ੀ ਹੈ ਅਤੇ ਖਲਨਾਇਕ ਖੇੜਿਆਂ ਨੂੰ 'ਗਾਂਡੂ' ਦੇ ਸ਼ਬਦਾਂ ਨਾਲ ਯਾਦ ਕਰਦਾ ਹੈ।

526
ਤਿਉਰ ਲਾਲ। ਲਾਲ ਰੰਗ ਦੇ ਸੂਟ
ਉਲੰਬੜਾ। ਲਾਟ
ਉਲਾਂਬੜਾ। ਮਿਹਣਾ
ਤਤਾਰਚਾ। ਬਰਛੀ
ਬੂੰਬਾ। ਫੁਹਾਰਾ 'ਪੂਰਨ ਕੇ ਜਸਕੇ ਉਠੇ ਬੂੰਬੇ' ਚੰਡੀ ਦੀ ਵਾਰ (ਗੋਬਿੰਦ ਸਿੰਘ ਜੀ)

527
ਦੁਧਾ ਧਾਰੀ। ਜਿਹੜੇ ਕੇਵਲ ਦੁੱਧ ਹੀ ਪੀਂਦੇ ਹਨ
ਵਾਢ। ਕੱਟਣ ਦੀ ਸ਼ਕਤੀ
ਅੱਜ ਮਿਲੀ .. ਕੰਧਾਰੀਆਂ ਨੂੰ। ਨਾਦਰ ਸ਼ਾਹ 1739 ਈ ਦੇ ਹਮਲੇ ਵਿੱਚ ਕੋਹਨੂਰ ਹੀਰਾ ਅਤੇ ਤਖਤ ਤਾਊਸ ਲੁਟ ਕੇ ਕੰਧਾਰ ਲੈ ਗਿਆ ਸੀ, ਦਿੱਲੀ ਵੀ ਪੰਜਾਬ ਵਿੱਚ ਸ਼ਾਮਲ ਸੀ।
ਨਾਦਰ ਸ਼ਾਹ ਦੁਰਾਨੀ। ਇਸ ਪ੍ਰਸਿੱਧ ਪਠਾਨ ਬਾਦਸ਼ਾਹ ਨੇ ਦਿੱਲੀ ਦੀ ਇੱਟ ਨਾਲ ਇੱਟ ਖੜਕਾ ਦਿੱਤੀ ਸੀ। ਇਸਨੇ 1717 ਤੋ. 1739 ਤੱਕ ਲਗਾਤਾਰ ਹਿੰਦੋਸਤਾਨ ਉਤੇ ਹਮਲੇ ਕੀਤੇ ਅਤੇ ਲੁਟ ਮਚਾਈ। ਦਿੱਲੀ ਤੋਂ ਸਾਹਜਹਾਨ ਵਾਲਾ ਤਖਤ ਤਾਊਸ ਅਤੇ ਕੋਹ ਨੂਰ ਹੀਰਾ ਅਤੇ ਬੇਅੰਤ ਮਾਲ ਲੈ ਗਿਆ। 1747 ਨੂੰ ਆਪਣੇ ਨੌਕਰਾਂ ਹੱਥੋਂ ਕਤਲ ਹੋਇਆ ਅਤੇ ਉਹਦਾ ਜਰਨੈਲ ਅਹਿਮਦ ਸ਼ਾਹ (ਅਬਦਾਲੀ) ਗੱਦੀ ਤੇ ਬੈਠਾ।
ਸੁਆਹ ਲਟੇਂਦੇ। ਮੰਦੇ ਹਾਲੀਂ ਸਨ
ਸਿਕਦਿਆਂ। ਤਰਸਦਿਆਂ
ਚੂੜੇ ਬੀੜੇ ਚੂਰ ਸੌਂਘਾਰ। ਮੇਕ ਅੱਪ ਉਤਰ ਗਈ

528
ਛਿੰਜ ਘਤੀ। ਰੌਲਾ ਪਾਇਆ
ਭੱਈਆਂ ਪਿੱਟੀ। ਜਾਂ ਭਰਾਵਾਂ ਪਿੱਟੀ ਦੀ ਗਾਲ ਵੀ ਔਰਤਾਂ ਖਾਂਦੀਆਂ ਹਨ।
ਮਾਪੇ ਪਿੱਟਣੀ। ਇਹ ਵੀ ਇੱਕ ਗਾਲ ਹੈ ਜਿਹੜੀ ਔਰਤਾਂ ਵੱਲੋਂ ਖਾਧੀ ਜਾਂਦੀ ਹੈ।
ਛਜ ਛਾਣਨੀ ਘਤ ਉਡਾਇਆ। ਬਹੁਤ ਬਦਨਾਮੀ ਕੀਤੀ

529
ਮੈਦਾਨ ਦਿੱਤਾ। ਅੱਗੇ ਵਧਣ ਦਾ ਮੌਕਾ ਦਿੱਤਾ
ਨੀਲੀ। ਨੀਲੀ ਘੋੜੀ
ਠੋਕਰਾਂ। ਅੱਡੀ ਲਾਈ

530
ਚੂਚੀ। ਊਜ
ਉਦਮਾਦ। ਨਸ਼ਾ, ਖੁਮਾਰੀ ( ''ਮਾਇਆ ਮਦ ਚਾਖਿ ਭਏ ਉਦਮਾਤੇ"। ਮਾਰੂ ਮਹਲਾ 5), ਖਬਤ