Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 31-35

ہیر وارث شاہ بند 31-35

وارث شاہ
November 20th, 2008

بند ٣١

بھابی رزق اداس جاں ہو ٹریاں، ہن کاس نوں گھیڑ کے ٹھگدیاں ہو
پہلے ساڑ کے جیو نمانڑے دا، پچھوں بھلیاں لاونے لگدیاں ہو
بھائی ساک سن سو تسیں وکھ کیتے، تسیں ساک کیہ ساڈیاں لگدیاں ہو
اسیں کجڑے روپ کروپ والے تسیں جوبنے دیاں نئیں وگدیاں ہو
اساں آب تے طعام حرام کیتا تسیں ٹھگنیاں سارڑے جگ دیاں ہو
وارث شاہ اکلڑے کیہ کرنا، تسیں ست اکٹھیاں وگدیاں ہو

مشکل لفظاں دے معنے
رزق اداس ہونا۔ دانی پانی اٹھ جانا، دانا پانی ترک کر دینا
نمانڑے۔ نمانا، جیس دا کوئی مان نہ ہووے، یا جیس دا کسے شے تے وی مان نہ ہووے
بھلیاں لاونا۔ غلطیاں ٹھیک کرنا، معافی منگنا، بچیاں دی لکھت دیاں غلطیاں ٹھیک کرن نوں نوں بھلیاں لاونا کہندے ہیں۔ مطلب اوہ گل نوں ٹھیک کرنا جیہڑی بھل، یا غلطی ہو گئی ہووے
کجڑے۔ کجا، پانی لئی نکا جیہا گھڑا
روپ۔ حسن
کروپ۔ بد صورتی
نئیں۔ ندیاں

بند ٣٢

واہ لا رہے بھائی بھابیاں بھی، رانجھا اٹھ ہزاریوں دھایا اے
بھکھ ننگ نوں جھاک کے پندھ کرکے راتیں وچ مسیت دے چھایا اے
ہتھ ونجھلی پکڑ کے رات ادھی رانجھے مزا بھی خوب بنایا اے
رن مرد نہ پنڈ وچ رہیا کوئی سبھا گرد مسیت دے آیا اے
وارث شاہ میاں پنڈ جھگڑیاں دی پچھوں ملاں مسیت دا آیا ہے


مشکل لفظاں دے معنے

واہ۔ جتن، کوشش
دھایا۔ زور نال اگے ودھنا
جھاک۔ جھل کے، سہہ کے، برداشت کر کے
پندھ۔ سفر
چھانا۔واس کرنا، ٹکا کرنا، کسے تھاں نوں رہن لئی چننا (شاید چھاونی وی ایس توں ہی نکلیا ہے)۔
سبھا۔ سارے

بند ٣٣

مسجد بیت العتیق آہی خانہ کعبیوں ڈول اتاریا نیں
گویا اْقصی دے نال دی بھین دوئی شاید صندلی نور اساریا نیں
پڑھن فاضل درس درویش مفتی خوب کڈھ الحان پرکاریا نیں
تعلیل میزان تے صرف بہائی صرف میر بھی یاد پکاریا نیں
قاضی قطب تے کنز انواع باراں مسعودیاں جلد سواریا نیں
خانی نال مجموعہ سلطانیاں دے اتے حیرت الفقہ نواریا نیں
فتاوی برہنہ منظوم شاہاں نال زبدیاں حفظ قراریا نیں
معارج النبوت خلاصیاں توں روضہ نال اخلاص پساریا نیں
زرداریاں دے نال شرح ملا زنجانیاں نحو نتاریا نیں
کرن حفظ قرآن تفسیر دوراں، غیر شرح نوں دریاں ماریا نیں

مشکل لفظاں دے معنے
ڈول۔ ڈیزائن، نقشہ
اقصی۔ بیت المقدس دی اک مسیت جیس دا ذکر قرآن وچ معراج شریف دے سلسلے وچ آیا ہے۔ سب توں پہلاں حضرت سلیمان نے ایتھے اک عبادت دی تھاں بنائی سی جیہڑی بنی اسرائیل دے نبیاں دا قبلہ سی۔
دوئی۔ دوجی
صندلی۔ عمارت دے بناون وچ ورتیا جاون والا اُچا سٹول
اسارنا۔ بنانا
پرکاریا۔ قسم، دو شیواں یاں لفظاں وچ فرق کرنا جیویں قاری ک تے ق وچ کردا ہے۔
سواریا۔ سودھیا۔ غلطیاں توں پاک کرنا
نوارنا۔ اک دوجی کتاب دے حوالے دوہاں نوں سہارا دینا، غلطیاں کڈھنا، کسے کتاب وچوں وادھو گھاٹو مواد کڈھنا
قراریا۔ قرات دے نال
پساریا۔کھول کے بیان کرنا
نتاریا۔ شفاف کیتا

بند٣٤

اک نظم دے درس ہرکرن پڑھدے نام حق اتے خالق باریاں نیں
گلستان، بوستاں نال بہار دانش طوطی نامہ تے رازق باریاں نیں
منشات نصاب تے ابو الفضلاں شاہنامیوں واحد باریاں نیں
قران السعدین دیوان حافظ شیریں خسرواں لِکھ سواریاں نیں

نوٹ۔ ایس بند وچ وارث شاہ ہوریں اوہناں درسی کتاباں دا ذکر کردے ہین جیہڑیاں اوس ویلے پڑھایاں جاندیاں سن یا جیہڑیاں اوہناں نوں آپ پڑھنیاں پیاں ہوون گیاں
ایس بند وچ دتیاں فارسی درسی کتاباں

انشائے ہرکرن۔ لکھاری منشی ہرکرن داس کمبوہ ملتانی میر منشی اعتبار خان گورنر اکبرآباد
نامِ حق۔ فقہ دے مسئلیاں دی نظم وچ کتاب مشرف بخاری ١٢٩٤ وچ لکھی گئی
خالق باریاں۔ امیر خسرو دہلوی دی نظم وچ لغت فارسی عربی ہندی تے لفظ دیندی ہے
گلستان۔ شیخ سعدی دیاں نصیحتاں والیاں کہانیاں (فارسی نظم تے نثر) بوستان۔ شیخ سعدی دی نظم وچ حکائتاں
بہار دانش۔ عورتاں دے چلتر باے فارسی وچ کہانیاں لکھاری شیخ عنایت اللہ لاہوری
طوطی نامہ۔ فارسی کہانیاں دا پراگا لکھاری ابوالفضل، اکبر دا نورتن
رازق باری۔ فارسی دی نظم وچ لغت
منشات برہمن ۔ شاہجہان تے اوہدے درباری امیراں دے خط پتراں دا پراگا ہے جیہڑا پنڈت چندر بھان لاہوری نے اکٹھا کیتا
نصاب یا نصاب الصبیان۔ عربی فاری فرہنگ
انشائے ابوالفضل۔ فارسی دی نثر لکھاری ابوالفضل اکبری نورتن
شاہ نامہ۔ نظم وچ لکھی تاریخ جیہڑی فردوسی نے محومد غزنوی دی فرمائش تے لکھی
واحد باری۔ فارسی توں ہندی لغت
قران السعدین۔ امیر خسرو دی نظم وچ خاندان کیقباد دی تاریخ ہے
دیوان حافظ۔ غزلاں، فارسی ادب وچ منی پرمنی کتاب شمسالدین محمد حافظ شیرازی
شیریں خسرواں۔ مثنوی دے انگ وچ لکھیا عشقیہ قصہ، لکھاری مولانا محمد الیاس گنجوی

بند ٣٥

قلم دان دفتین دوات پٹی نانوے ایملی ویکھدے لڑکیاں دے
لکھن نال مسودے سیاق خسرے سیاہے اوارجے لکھدے ورقیاں دے
اک بھل کے عین دا غین واچن ملاں جند کڈھے نال کڑکیاں دے
اک آوندے شوق جزدان لے کے وچ مکتباں دے وچ تڑکیاں دے

مشکل لفظاں دے معنے

دفتن۔ فائل فولڈر طرحاں دو گتیاں دا بنیا ہویا
پٹی۔مڈھلی تختی، جیویں ا ب پ ت یا
A B C D
نانویں ۔ نامے، اقرار نامے (دستاویزی لکھتاں دی سکھائی ول اشارہ ہے)
ایملی۔ فصل دا لگان جیہڑا پیداوار دی شکل وچ لیا جاندا ہے
مسودے۔ لکھتاں
سیاق۔ گنتی، ہندسے
خسرے۔بھوئیں دا ریکارڈ رکھن والے
سیاہے۔ بہیاں کھاتے، جنہاں وچ لین دین دا حساب رکھیا جاندا سی، اکاؤنٹینٹ نوں سیاہا نویس کہیا جاندا سی
اوارجے۔ روز نامچے، ڈائری، دن دی آمدن خرچ دا اندراج، سی آئی ڈی رپورٹر نوں محرر اوارجہ کہندے سن
واچنا۔ پڑھنا، ویکھنا
جزدان۔ بستہ
تڑکیاں۔ سویرے سویرے

نوٹ۔ ایس بند وچ وارث شاہ مدرسیاں وچ پڑھائے جان والے اوہناں مضموناں دا ذکر کر رہیا جیہڑے اوس ویلے دے کورس وچ شامل ہوندے سن ۔ سو مطلب مدرسیاں وچ حکومتی بندوبستاں لئی کامے تیار کیتے جاندے سن۔

 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels