Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 36-40

ہیر وارث شاہ بند 36-40

وارث شاہ
November 20th, 2008

بند ٣٦

ملاں آکھیا چــونیاں ویکھدیاں ای غیر شرح توں کون ہیں دور ہو اوئے
ایتھے لچیاں دی کائی جا ناہیں پٹے دور کر حق منظور ہو اوئے
اناالحق کہا نہ کِبر کر کے اوڑک مریں گا وانگ منصور اوئے
وارث شاہ نہ ہنگ دی باس چھپدی بھانویں رسمسی وچ کافور ہووے


مشکل لفظاں دے معنے

چونیاں۔ لمے پٹے جیہڑے ساہمنیوں جوگیاں وانگ لٹکدے نیں تے پچھوں کنگھی کیتی گردن نوں ڈھک لینے نیں۔ ایہہ عام طور تے تھلڑے میل تے عام کامے لوکاں دے والاں دا ڈھنگ ہوندا سی۔
پٹے۔ لمے وال
اناالحق۔میں رب ہاں
کبر۔ غرور
اوڑک۔اخیر، انت تے
منصور۔ منصور حلاج جیس نوں انالحق کہن تے پھاہے لا دتا گیا سی
ہنگ۔ اک کھاون وچ پین والا مصالحہ، جڑ، جیس دی بو بڑی ہوندی ہے
باس۔ چنگی یا بھیڑی بو
رسمسی ۔چنگی طرحاں بھجی ہوئی
کافور ۔ خوشبو والا سفوف،

بند ٣٧

داڑھی شیخ دی عمل شیطان والے، کیہا رانیو جاندیاں راہیاں نوں
اگے کڈھ قرآن تے بہیں ممبر کیہا اڈیو مکر دیاں پھاہیاں نوں
ایس پلیت تے پاک دا کرو واقف اسیں جانیے شرع گواہیاں نوں
جیہڑے تھاؤں ناپاک دے وچ وڑیوں شکر رب دیاں بے پرواہیاں نوں
وارث شاہ وچ حجریاں فعل کردے ملاں جوترے لاوندے واہیاں نوں


مشکل لفظاں دے معنے
شیخ۔ علم ، وڈھا بزرگ پیر
شیطان۔ خدا دا فرشتہ جیس اوس توں نابری کیتی سی تے ہن اوس دا کم لوکاں نوں پٹھے راہ تے پاونا ہے
راننا۔ پیراں تھلے مدھنا، جنسی فعل لئی ڈاہ لینا
قرآن۔ مسلماناں دی سب توں وڈھی الہامی کتاب
ممبر۔ لکڑی دا چبوترا جیس تے چڑھ کے مولوی تقریر کردے ہین
پھاہی اڈنا۔ جال وچھاونا
پلیت۔ گندہ
پاک۔ صاف
شرع۔ مسلماناں دی زندگی گذارن لئی قاعدے، شرع گواہیاں۔ شرع وچوں ثبوت
حجرے۔ ملانے دے مسیتاں نال رہن لئی بنے ہوئے کمرے
فعل کردے۔ جنسی کردے
جوترہ۔ اک ویلے لئی متھیا ہویا ہل واہن داتھاں
واہیاں۔ انج تے ایہدا لفظی مطلب ہے جیہڑی زمین وچ ہل چلیا ہووے پر ایہہ بیجے ہوئے کھیتاں یا پیلیاں لئی ورتیا جاندا ہے۔ جیویں زراعت نوں واہی بیجی کیہا جاندا ہے۔

بند ٣٨

گھر رد دے مسجداں ہندیاں نیں ایتھے غیر شرع ناہیں واڑیئے اوئے
کتا اتے فقیر پلیت ہووے نال دریاں بنھ کے ماریئے اوئے
تارک ہو صلوۃ دا پٹے رکھے لباں والیاں مار پچھاڑیئے اوئے
نیواں کپڑا ہووے تاں پاڑ سٹیئے لباں ہون دراز تاں ساڑیئے اوئے
جیہڑا فقہ اصول دا نہیں واقف اوہنوں چا سولی اتے چاڑیئے اوئے
وارث شاہ خدا دیاں دشمناں نوں دوروں کتیاں وانگ دھرکاریئے اوئے

مشکل لفظاں دے معنے
غیرشرع۔ شرع نوں نہ منن والا، شرع دا مطلب ہے اسلام دا کوڈ آف کنڈکٹ
تارک۔ چھڈ دینا
صلوۃ۔ نماز
پٹے۔ لمے وال
لباں۔ مچھاں
مار پچھاڑیئے۔ مار کے پچھاں سٹ دیئے
دراز۔ لما، لمیاں
فقہ۔ اسلام دی حیاتی دی روز بروز دے ڈھنگ بارے اصول، انج تے چار مشہور فقہاں ہیں (حنفی، حنبلی، شافعی ، ملکی) پر پاک ہند وچ حنفی فقہ دے منن والے بہتے ہین۔ وارث شاہ دے دسے پچھلے بنداں دے مدرسے وچ حنفی فقہ دیاں ہی کتاباں پڑھایا ں جا رہیا سن۔
اصول۔ قانون
دھرکاریئے یا درکاریئے۔ پھٹکار پاونا

بند ٣٩

سانوں دس نماز ہے کاس دی جی کاس نال بناء کے ساریا نیں
کن نک نماز دے ہین کِتنے، متھے کنہاں دے دھروں ایہہ ماریا نیں
لمبے قد چوڑی کِس ہان ہوندی کس چیز دے نال سواریا نیں
وارث کلیاں کتنیاں اُس دیاں نیں جِن نال ایہہ بنھ اتاریا نیں

مشکل لفظاں دے معنے
کاس۔ کس شے دی
ساریا۔ بنایا
نماز دے کن نک۔ امام غزالی دی کتاب اسلام وچ نماز دے کن نک دا ذکر ہے۔مطلب نماز وچ کیہہ ذکر تے تسبیح پڑھی جانی چاہیدی ہے۔
متھے مارنا۔ کسے نوں غصے نال کوئی شے دینی، یا کسے تے زبردستی کوئی شے دے دینی
دھروں۔ ازل توں، آد توں
ہان۔ ایس دا مطلب عمر وی ہو سکدا ہے (ہان دے منڈے جیویں) ۔ ایس دا مطلب تھاں (جے ہان ستھان توں وگڑیا ہے تے)، جگہ، مقام وی ہو سکدا ہے۔
کلیاں۔ اوہ کلے جنہاں نال ملاح اپنی بیڑی نوں بنھدے ہین۔

بند ٤٠

اسا ں فقہ اصول نوں صحیح کیتا غیر شرع مردُود نُوں مارنے ہاں
اساں دسنے کم عبادتاں دے پُل صراط توں پار اتارنے ہاں
فرض سُنتاں واجباں نفل وِتراں نال جائزاں سچ نتارنے ہاں
وارث شاہ جماعت دے تارکاں نوں تازیانیاں دُریاں مارنے ہاں

مشکل لفظاں دے معنے

فقہ۔ مسلماناں دے روز دے کار ویہار بارے ہدائتاں
مردود۔ رد کیتا ہویا
عبادتاں۔ پوجا، بندگی، کہے وچ رہنا
پل صراط۔ صراط دا مطلب ہے رستہ، اسلام وچ ایہہ ہے جو اک دن قیامت دا ہووے گا جیس دن رب سب دیاں نیکیاں بدیاں دا حساب لوے گا۔ اوس دن ہر اک نوں اک پل توں لنگھنا پوے گا جیہڑا دھاگے نالوں وی بریک ہے تے تلوار دی دھار نالوں گھٹ سوڑا۔ اوس توں اوہو لنگھن گے جیہڑے نیک ہین، باقی سب دوزخ وچ ڈگ پین گے۔
فرض۔ نماز دا اوہ حصہ جیہڑا لازم ہے، جیہڑا اللہ ولوں حکم آیا ہے۔
سنتاں۔ نماز دا اوہ حصہ جو اسلام دے پیغمبر محمد رسول اللہ
ؐ فرض دے نال پڑھدے سن۔
واجباں۔ لازمی۔ اسلام دا اوہ کم جیہڑا کرنا ہر اک لئی لازم ہے تے جیس توں بنا مذہب دی مانتا پوری نہیں ہوندی۔
نفل۔ اوہ نماز جیہڑی اپنے ولوں اللہ لئی پڑھی جاندی ہے۔ فرض تے سنت اسلام دیاں پنج نمازاں ویلے ہوندے ہین پر نفل کسے ویلے وی پڑھے جا سکدے ہین۔
وِتر۔ رات ویلے عشاء دی نماز نال تن رکاتاں پڑھیاں جاندیاں ہین۔ وِتر دا مطلب اکلا وی ہے۔ شاید عشاء دی نماز دے ایس حصے نوں وِتر ایس لئی کہیا گیا ہے جو ایہہ ہور کسے نماز نال نہیں پڑھی جاندی۔ اک رکات دا مطلب ہے اک واری کھڑا ہوکے پھیر سجدے وچ جانا۔
جائزاں۔ ماپ کے
تارکاں۔ تارک دا مطلب جو کسے کم نوں چھڈ گیا ہووے
تازیانیاں۔ کوڑے، ہنٹر
دریاں۔ کوڑے

 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels