Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 46-50

ہیر وارث شاہ بند 46-50

وارث شاہ
November 20th, 2008

بند ٤٦

رانجھا منتاں کر کے تھک رہیا انت ہو کندھی پرہاں جا بیٹھا
چھڈ اگ بیگانڑی ہو گوشے پریم ڈھانڈری وکھ جگا بیٹھا
گاوے سد فراق دے نال رووے اتے ونجھلی سبد وجا بیٹھا
جوکوئی آدمی تریمتاں مرد ہیسن پتن چھڈ سب اوس تے جا بیٹھا
رناں لڈن جھبیل دیاں بھرن مٹھیں پیر دوہاندے ہِک ٹکا بیٹھا
غصہ کھاء کے لئے جھبیل جھیاں، اتے دوہاں نوں ہاک بلا بیٹھا
پنڈا باہوڑی جٹ لیجاگ رناں کیہا شغل ہے آن جگا بیٹھا
وارث شاہ ایس موہیاں مرد رناں ناہیں جاندے کون بلا بیٹھا

مشکل لفظاں دے معنے
انت۔ اخیر
کندھی۔ دریا دا کنڈھا
بیگانڑی۔ بیگانی، دوجے دی
ڈھانڈری۔ ککھاں کانیاں دی نکی جیہی دھونی
سد۔ اچی آواز وچ گایا درد بھرا گیت
فراق۔ جدائی
سبد۔ہر راگ دیاں سراں سب ہوندیاں نیں۔
ونجھلی سبد۔ ونجھلی دیاں متھیاں سراں
تریمتاں۔ عورتاں
تے یا تھے۔ کول، نزدیک
جھبیل۔ لڈن ملاح دی ذات
مٹھیاں بھرنا۔ مٹھی چاپی کرنا تاں جو تھکاوٹ لتھ جاوے
ہک ۔ سینہ
جھئیاں۔غصے دے دورے پینے
ہاک۔ اچی آواز وچ بلانا
پنڈا۔ پنڈ والیو
باہوڑی۔ پہنچیو، آئیو (اوکھے ویلے دی پکار)
لیجاگ۔ لے جائے گا
موہیاں۔ کسے دا دل لٹ لینا،

بند ٤٧

لڈن کرے وسواس جیوں آدمی نوں یارو وسوسہ آن شیطان کیتا
ویکھ شور فساد جھبیل سندا مئیں رانجھے نے جیو حیران کیتا
بنھ سرے تے واہل تیار ہویا ترت ٹھلنے دا سمیان کیتا
رناں لڈن دیاں ویکھ کے رحم کیتا جو کجھ نبی نے نال مہمان کیتا
ایہو جیہے جی آدمی ہتھ آون جان مال پوار قربان کیتا
آؤ کریں ہیں ایس دی منت زاری وارث کاستھوں دل پریشان کیتا

مشکل لفظاں دے معنے
وسوسہ۔ فکر، شک
جھبیل۔ لڈن ملاح دی ذات
سندا۔ اوس دا
واہل بنھنا۔ دریا لنگھن لئی جتی کپڑے سر تے بنھ لینا
ترت۔چھیتی، شتابی
ٹھہلنے۔ تیرن
سمیان۔ سامان، تیاری
نبی نے نال مہمان کیتا۔ رسول اللہ نے اک یہودی پروہنے نال بڑا چنگا ورتارا کیتا حالاں اوسنے جان بجھ کے بستر خراب کر دتا۔
کاستھوں۔ کیس وجہ توں۔

شاہ بند ٤٨

سئیں ونجھیں چنہاؤں دا انت ناہیں ڈب مریں گا ٹھلھ نہ سجنا وو
چاڑھ موڈھیاں تے تینوں اسیں ٹھلہاں کوئی جان توں ڈھل نہ سجنا وو
ساڈا عقل شعور توں کھس لیتا رہیا کُکھڑا ہل نہ سجنا وو
ساڈیاں اکھیاں دے وچ وانگ دھیری ڈھیرا گھت بہو ہل نہ سجنا وو
وارث شاہ میاں تیری چوکھنے ہاں ساڈا کالجا سل نہ سجنا وو

مشکل لفظاں دے معنے

سئیں۔ سو
ونجھیں۔ ونجھ، وانس (بانس)
انت۔ اخیر اتھاہ
سئیں ونجھیں چنہاؤں دا نت ناہیں۔ چنہاں دریا ایڈا ڈوہنگا ہے جو کئی سو وانس ہیٹھ اتے جوڑے جاون تے پھیر وی اوس دا تھلا نہیں ملدا۔
ٹھلھ۔ ترنا
جان توں ڈھل۔ تیرے توں جان قربان کرن توں وی نہیں رک ساں
کھس لتا۔ کھوہ لیا
ککھڑا۔ ککھ، تیلا ، شریف صابر ہوراں ایتھے کُکھڑا پڑھیا ہے جیس دا مطلب ہے زنانی دی کُکھ، پیٹ رحم ۔ پر ایہہ گل ایس ڈائیلاگ دے وہا وچ جچدی نہیں۔ککھ توں بنایا کُکھڑا ایس لئی جچدا ہے جو لڈن دیاں بیویاں کہہ رہیاں ہین جو توں ساڈا کجھ وی نہیں چھڈیا۔ اسیں عام بول چال وچ وی انج ہی کہنے ہاں ''میرا تے ککھ نہیں بچیا''
دھیری۔ اکھ دی پتلی۔
ڈیرا گھت۔ ایتھے ڈیرا لا لے
چوکھنے ہاں۔ قربان جانیاں
سِل۔چوبھنا

بند٤٩

دوہاں باہاں توں پکڑ رنجھیٹیڑے نوں پھر آن بیڑی وچ چاڑھیا نیں
تقصیر معاف کر آدمے دی مڑ آن بہشت وچ واڑیا نیں
گویا خواب دے وچ عزازیل ڈٹھا مینوں پھیر مڑ عرش تے چاڑھیا نیں
وارث شاہ نوں ترت نہاء کے تے بیوی ہیر دے پلنگ تے چاڑھیا نیں

مشکل لفظاں دے معنے
تقصیر۔ گناہ
عزازیل۔ شیطان، ابلیس، بندے نوں بھلی پاون والا فرشتہ
ترت۔ جھبدے چھیتی

بند ٥٠

یارو پلنگ کیہا سنُنّی سیج اِیتھے لوکاں آکھیا ہیر جٹیٹڑی دا
بادشاہ سیالاں دے ترنجناں دی، مہر چوچکے خان دی بیٹڑی دا
شاہ پری پناہ نت لئے جِس تھوں ایہ تھاؤں اُس مشک لپیٹڑی دا
اسیں سبھ جھبیل تے گھاٹ پتن سبھا حکم ہے اوس سلیٹڑی دا

مشکل لفظاں دے معنے

سُنّی۔ ویران، بے آباد
جٹیٹڑی۔ جٹی۔۔۔ایسے طرحاں وارث شاہ ہبیٹی توں بیٹڑی، لپیٹی توں لپیٹڑی تے سلیٹی توں سلیٹڑی بنایا ہے
ترنجن۔ جتھے کڑیاں اکٹھیاں ہوندیاں نیں۔
شاہ پری۔ کوہ قاف دی رانی، پریاں دی ملکہ
پناہ لینا۔ مقابلہ کرن توں ڈرنا
مشک لپیٹڑی۔ خوشبو وچ لپیٹی ہوئی، جیس دا جثہ خوشبو وچ رچیا ہووے
جھبیل۔ بیڑی چلاون والے ملاحاں دی ذات
گھاٹ۔ دریا کنارے نہاون، کپڑے دھون دی تھاں۔ دریا تے کسٹم ڈیوٹی لین لئی بنائی تھاں
سلیٹڑی۔ سلییٹی رنگ دی، سانولی


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels