Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند246-250

ہیر وارث شاہ بند246-250

وارث شاہ
December 21st, 2008

246
دِتی ہیر لکھائی کے ایہہ چِٹھی رانجھے یار دے ہتھ لے جاء دینی
کِتے بیٹھ نویکلا سد ملُاں ساری کھول کے بات سُنا دینی
ہتھ بنھ کے میریاں سجناں نوں رو رو سلام دعا دینی
مر چُکیاں جان ہے نک اُتے اِک وار جے دینیا آ دینی
کھیڑے ہتھ نہ لاؤندے منجڑی نوں ہتھ لائی کے گور وِچ پادینی
ککھ ہو رہیا غماں نال رانجھا ایہا چننگ لے جائی کے لا دینی
میرا یار ہیں تاں میتھے پہنچ میاں کن رانجھے دے ایتنی پا دینی
میری لئیں نشانڑی بانک چھلّا رانجھے یار دے ہتھ لےجا دینی
وارثؔ شاہ میاں اوس کملڑے نوں ڈھنگ، زُلف زنجیر دِی پا دینی


247


اگے چنڈیاں نال ہنڈایاای زُلف کُنڈلاں دار ہُن ویکھ میاں
گھت کُنڈلی ناگ سیاہ پلمے ویکھے اوہ بھلا جس لیکھ میاں
مَلے وٹنے لوڑھ دنداسڑے دا نین خونیاں دے بھرن بھیکھ میاں
آ حسن دی دید کر ویکھ زلفاں خونیں نیناں دے بھیکھ نوں ویکھ میاں
وارثؔ شاہ فقیر ہو پہنچ میتھے فقر مار دے ریکھ وِچ میکھ میاں


248


قاصد آن رانجھیٹے نوں خط دتا نڈھی موئی ہے نک تے جان میاں
کوئی پاء بُھلاوڑا ٹھگیوئی سِر گھتیو چاء مسان میاں
تیرے واسطے رات نوں گِنے تارے کشتی نُوح دِی وِچ طوفان میاں
اِک گھڑی آرام نہ آؤندا اِی کیہا ٹھوکیو پریم دا بان میاں
تیرا نانو لے کے نڈھی جیوندی ہے بھانویں جان تے بھانویں نہ جان میاں
مونہوں رانجھے دا نام جاں کڈھ بہندی اوتھے نِت پوندے گھمسان میاں
راتیں گھڑی نہ سیج تے مول سوندی رہے لوگ بہتیرڑا ران میاں
جوگی ہوئی کے نگر وِچ پا پھیرا موجاں نال توں نڈھڑی مان میاں
وارثؔ شاہ میاں سبھو کم ہوندے جدوں رب ہندا مہربان میاں


249


چِھٹی نانو تیرے لکھی نڈھڑی نیں وِچے لکھے سو درد فراق سارے
رانجھا تُرت پڑھائی کے فرش ہویا دِلوں آہ دے ٹھنڈڑے ساہ مارے
میاں لکھ توں درد فراق میرا جیہڑا امبروں سُٹ دا توڑ تارے
گھا لکھ جو دِلے دے دُکھڑے دے لکھن پیاریاں نوں جویں یار پیارے


250


لکھیا اِیہہ جواب رانجھیٹڑے نے جدوں جیو وِچ اوس دے شورپئے
اوسے روز دے اسیں فقیر ہوئے جس روز دے حسن دے چورپئے
پہلے دعاء سلام پیاریاں نوں مجھو واہ فِراق دے بوڑ گئے
اساں جان تے مال درپیش کیتا اٹی لگڑی پریت نوں توڑ گئے
ساڈی ذات صفات برباد کر کے لڑ کھیڑیاں دے نال جوڑ گئے
آپ ہس کے ساہورے ملیو نیں ساڈے نیناں دا نیر نکھوڑ گئے
آپ ہو محبوب جا ستر بیٹھے ساڈے روپ دا رسا نچوڑ گئے
وارثؔ شاہ میاں ملیاں واہراں تھوں دھڑویل ویکھو زور و زور گئے


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels