Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 251-255

ہیر وارث شاہ بند 251-255

وارث شاہ
December 24th, 2008
5 / 5 (1 Votes)

251
ساڈی خیر ہے چاہندے خیر تینڈی پھیر لکھو حقیقتاں ساریاں جی
پاک رب تے پیر دی مہر باجھوں کٹے کون مصیبتاں بھاریاں جی
موجُو چوہدری دا پُت چاک ہو کے چُوچک سیال دیاں کھولیاں چاریاں جی
دغا دے کے آپ چڑھ جان ڈولی چینچر ہاریاں ایہہ کواریاں جی
سپ روسیاں دے کرن مار منتر تارے دیندیاں نیں ہیٹھ کھاریاں جی
پیکے جٹاں نوں مار فقیر کر کے لین ساہورے جا گھمکاریاں جی
آپ نال سہاگ دے جاء رُپن پیچھے لاء جاون پچکاریاں جی
سرداراں دے پُتر چاک کر کے آپ
 ملدیاں جا سرداریاں جی
وارثؔ شاہ نہ ہاردیاں اساں کولوں راجے بھوج تھیں ایہہ نہ ہاریاں جی

اوکھے لفظاں دے معنے
کھولیاں: مجاں
چینچرہاریاں: فریب کار
کھاری : وڈی ٹوکری
گھمکاری:چرخہ گھمن دی آواز
رپن : رُجھنا
راجہ بھوج:ریاست اجین دا مشہور راجہ جیہدے تے اوہدی ملکہ نے گھوڑا بنا کے سواری کیتی
چاک: نوکر، غلام

252
رانجھے آکھیا لُٹی دی ہیر دولت جرم گالیے تاں اوتھے جا لیئے
اوہ رب دے نور دا خوان یغما شُہدے ہوئی کے جرم وٹا لیئے
اِک ہوونا رہیا فقیر میتھوں رہیا ایتناں وس سو لا لیئے
مکھن پالیا چیکنا نرم پنڈا ذرا خاک دے وچ رُلا لیئے
کسے جوگی تھیں سِکھیے سِحر کوئی چیلے ہوئی کے کن پڑوا لیئے
اگے لوکاں دے جھگڑے بال سیکے ذرا اپنے نوں چننگ لا لیئے
اگے جھنگ سیالاں دا سیر کیتا ذرا کھیڑیاں نوں جھوک لا لیئے
اوتھے خودی گمان منظور ناہیں سِر دیجیے تاں بھیت پا لیئے
وارثؔ شاہ محبوب نوں تدوں پائیے جدوں اپنا آپ گوا لیئے

اوکھے لفظاں دے معنے
جرم: جمنا، جنم
خوان: مکلف، دستر خوان، لنگر
شہدے:ماڑے بن کے
جھگڑے:گھر
جھوک لانا:عارضی ڈیرا لاونا
لٹی دی: مفت وچ لبھ رہی ہے

253

بُجھی عِشق دی اگ نوں واؤ لگی سماں آیا ہے شوق جگاونے دا
بالناتھ دے ٹِلے دا راہ پھڑیا متا جاگیا کن پڑاونے دا
پٹے پال ملائیاں نال رکھے وقت آیا ہے رگڑ مُناونے دا
جرم کرم تیاگ کے تھاپ بیٹھا کِسے جوگی دے ہتھ وِکاونے دا
بندے سوئنے دے لاہ کے چاء چڑھیا کَن پاڑ کے مُندراں پاونے دا
کِسے ایسے گُردیو دی ٹہل کرئیے سِحر دس دے رن کِھسکاونے دا
وارثؔ شاہ میاں اِنہاں عاشقاں نوں فکر ذرا نہ جِند گواونے دا

اوکھے لفظاں دے معنے
بالناتھ:جوگیوں دا مشہور گرو
ٹلہ:بالناتھ دا پہاڑی ٹلہ ،جہلم دے نیڑے اک تھاں
متا:مشورہ، خیال
تیاگ:چھڈنا
وکاونیں: وکنا
ٹہل : خدمت

254
ہو کا پِھرے دیندا پِنڈاں و ِچ سارے آؤ کِسے فقیر جے ہوونا جے
منگ کھاونا کم نہ کاج کرنا نہ کجھ چارنا تے نہ ہی چوونا جے
ذرا کن پڑائی کے سواہ ملنی گورُو سارے ہی جگ دا ہوونا جے
نہ دیہاڑی نہ کسب روز گار کرنا ناڈھو شاہ پھر مُفت دا ہوونا جے
نہیں دینی ودھائی پھر جمنے دی کسے موئے نوں مُول نہ روونا جے
منگ کھاونا اتے مسیت سونا نہ کجھ بونا تے نہ کچھ لوونا جے
نالے منگنا تے نالے گھُورنا ئی دین دار نہ کسے دا ہوونا جے
خوشی اپنی اُٹھنا میاں وارث اتے اپنی نیند ہی سوونا جے

اوکھے لفظاں دے معنے

ودھائی: مبارک
گھورنا: نفرت کرنا، غصے نال دیکھنا
دینے دار: مقروض

255

ٹِلے جائی کے جوگی تھے ہتھ جوڑے سانوں آپنا کرو فقیر سائیں
تیرے درس دیدار دے دیکھنے نوں آیا دیس پردیس میں چِیرسائیں
صدق دھار کے نال یقین آیا اسیں چیلڑے تے تُسیں پیر سائیں
بادشاہ سچا رب عالماں دا فقر اوس دے ہین وزیر سائیں
بِناں مُرشداں راہ نہ ہتھ آوے دُدّھ باجھ نہ ہووے ہے کھیر سائیں
یاد حق دی صبر تسلیم نہچا تُساں جگ دے نال کیہ سیر سائیں
فقر کُل جہان دا آسرا ہے تابع فقر دے پیر تے میر سائیں
میرا مانو نہ باپ نہ ساک کوئی چاچا تایا نہ بھین نہ ویر سائیں
دُنیا وِچ ہاں بہت اداس ہویا پیروں ساڈیوں لاہ زنجیرسائیں
تینوں چھڈ کے جاں میں ہور کس تھے نظر آؤنا ہیں ظاہرا پیر سائیں

اوکھے لفظاں دے معنے
عالماں:سب دنیا ،کل کائنات ،ساری مخلوق
رجھدی: پکدی
نہچا:تسلی
سیر: حصے داری
جاں میں:جے میں




Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels