Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند371-375

ہیر وارث شاہ بند371-375

وارث شاہ
January 14th, 2009
371
اساں محنتاں ڈاہڈیاں کیتیاں نی انی گنڈئیے ٹھیھڑیے جٹیے نی
کرامات فقیر دی ویکھ ناہیں خیر رب تھوں منگ کپتیے نی
کن پاٹیاں نال نہ ضد کیجے انھے کھوہ وچ جھات نہ گھتیے نی
مستی نال تکبری رات دینہے کدی ہوش دی اکھ پرتیے نی
کوئی دُکھ تے درد نہ رہے بھورا جھاڑا مہر دا جنہاں نوں گھتیے نی
پڑھ پھوکیے اک عزمت سیفی جڑ جن تے بھوت دی پٹیے نی
تیری بھابی دے دکھڑے دور ہوون اسیں مہرجے چا پلٹیے نی
مونہوں مِٹھڑا بول تے موم ہو جا تِکھی ہو نہ کملیے جٹیے نی
جاندے سب آزار یقین کر کے وارثؔ شاہ دے پیر جے چٹیے نی
372
پھرپہنچےا بیر بتا لیاوے اوکھے عشق دی جھاڑڑے پاونے وے
نیناں ویکھ کے مارنی پھوک ساہویں سُتے پریم دے نانگ جگاونے وے
کدوں یوسفی طب میزان پڑھیوں دستور علاج سکھاونے وے
قرطاس سکندری طب اکبر ذخیریوں باب سناونے وے
قانون موجز تحفہ مومنیں بھی کفایہ منصوری تھیں پاونے وے
پران سنگلی وید منوت سمرت نرگھنٹ دے دھیاء بھولاونے وے
قرابادین شفائی تے قادری بھی متفرقہ طِب پڑھ جاونے وے
رتن جوت تے ساکھ ملمیک سوجن سکھ دیہ گنگا تھیں آونے وے
فیلسوف جہان دیاں اسیں رناں ساڈے مکر دے بھیت کس پاونے وے
افلاطون شاگرد غلام ارسطو لقمان تھیں پیر دھواونے وے
جن ایس نوں جھنگ سیال والے قابو کسے دے ایہہ نہ آونے وے
گلاں چاء چوا دیاں بہت کرنائیں ایہہ روگ نہ تُدھ تھیں جاونے وے
اِنہاں مکریاں تھوں کون ہووے چنگا ٹھگ پھر دے نے رناں ولاونے وے
جیہڑے مکر دے پیر کھلار بیٹھے بناں پھاٹ کھادے ناہیں جاونے وے
منہ نال کیہاں جیہڑے جان ناہیں ہڈ گوڈڑے تنہاں بھناونے وے
وارثؔ شاہ ایہہ مارہے وست ایسی جن بھوت تے دیونواونے وے
373
ایہا رسم قدیم ہے جوگیاں دی اوہنوں مار دے نیں جہڑی ٹرکدی ہے
خیر منگنے گئے فقیر تائیں اگوں کُتیاں وانگروں کُھرکدی ہے
ایہہ خصم دے کھان نوں کویں دیسی جیہڑی خیر دے دین توں جُھرکدی ہے
ایڈی پیرنی اِکے پہلواننی ہے اکے کنجری ایہہ کسے تُرکدی ہے
پہلے پھوک کے اگ مہتابیاں نوں پچھوں سرد پانی ویکھ بُرکدی ہے
رن گھنڈنوں جدوں پیزار وجن اوتھوں چُپ چپاتڑی چھُڑکدی ہے
اِک جُھٹ دے نال میں پُٹ لینی جہڑی زلف گلہاں اُتے لُڑکدی ہے
سیانے جاندے ہن دھنی جائے جھوٹی جیہڑی سانھاں دے موترے کُھرکدی ہے
فقر جان منگن خیر بھکھ مردے اگوں سگاں وانگوں سگوںدُرکدی ہے
لُنڈی پاہڑی نوں کھیت ہتھ آیا پئی اپروں اپروں مُرکدی ہے
اوسدے مور پھر دے اتے لون چُتڑ سوامنی مُطہر بھی پُھر کدی ہے
374
جیہڑیاں لین اُڈاریاں نال بازاں اوہ بُلبلاں تھک مریندیاں نی
اوہناں ہرنیاں دی عمر ہو چکی پانی شیر دی جوہ دا پیندیاں نی
اوہ واہناں جان کباب ہوئیاں جیہڑیاں ہیڑیاں نال کھہیندیاں نی
اوہ اِکدن پھرسن آن گھوڑے کِڑاں جنہاں دیاں نِت سُنیندیاں نیں
تھوڑیاں کرن سہاگ دیاں اوہ آساں جیہڑیاں دھاڑویاں نال منگیندیاں نیں
جوکاں اک دن پکڑ نچوہین گئیاں ان پُنے لوہو نِت پیندیاں نیں
دل مال دیجے لکھ کنجری نوں کدی دلوں محبوب نہ تھیندیاں نیں
اک دینہہ پکڑیاں جان گئیاں حاکماں تھے پرسیج تے نِت چڑھیندیاں نیں
اک دن گڑے وسائیسن اوہ گھٹاں ہاٹھاں جوڑ کے نِت گھریندیاں نیں
تیرے لون موڈھے ساڈے لون ناڑے مُشکاں کسے دیاں اج بجھیندیاں نیں
375
سُن سہتیے اسیں ہاں ناگ کالے پڑھ سیفیاں زُہد کماونے ہاں
مکر فن نوں بھن کے صاف کر دے جن بھوت نوں ساڑ وکھاونے ہاں
نقش لکھ کے پھوک یٰسین دئیے سائے سول دی ذات گواونے ہاں
دکھ درد بلاء تے جائے تنگی قدم جنہاں دے ویہڑھیاں پاونے ہاں
سنے تسمیہ پڑھاں اخلاص سورت جڑاں ویردیاں پٹ وکھاونے ہاں
دلوں حب دے چاء تعویذ لکھیے اسیں رُٹھڑے یار ملاونے ہاں
جیہڑا مارنا ہووے تاں کیل کر کے ایتوار مسان جگاونے ہاں
جیہڑے گھبرو توں رن رہے وِٹر لونگ مندر چا کھواونے ہاں
اوہناں ووہوٹیاں دے دکھ درد جاندے پڑھ ہک تے ہتھ پھراونے ہاں
کیل ڈائیناں کچیاں پکیاں نوں دند بھن کے لٹاں مناونے ہاں
جاں سحر جادو چڑھے بھوت کدے گنڈا کیل دوالے دا پاونے ہاں
کسے نال جے ویرورودھ ہووے اوہنوں بھوت مسان چمڑوانے ہاں
بُرا بول دی جیہڑی جوگیاں نوں سِرمُن کے گدھے چڑھاونے ہاں
جیندے نال مُدپّڑا ٹھیک ہووے اوہنوں بیربیتال بھچھاونے ہاں
اسیں کھیڑیاں دے گھروں اک بوٹا حکم رب دے نال پٹاونے ہاں
وارثؔ شاہ جے ہور نہ داؤ لگے سر پریم جڑیاں چا پاونے ہاں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels