Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 376-380

ہیر وارث شاہ بند 376-380

وارث شاہ
January 14th, 2009
376
محبوب الہ دے لاڈے ہو ایس ووہٹڑی نوں کوئی سُول ہے جی
کوئی گجھڑا روگ ہے ایس دھانا پئی نِت ایہہ رہے رنجول ہے جی
ہتھوںلڑھی وہندی لاہو لتھڑی ہے دیہی ہو جاندی مخبول ہے جی
مونہوں مِٹھڑی لاڈ دے نال بولے ہر کسے دے نال معقول ہے جی
مودھا پیا ہے جھگڑا نِت ساڈا ایہہ ووہٹڑی گھرے دا مول ہے جی
میرے ویر دے نال ہے ویر اِسدا جیہا کافراں نال رسول ہے جی
اگے ایس دے ساہورے ہتھ بدھے جو کچھ آکھدی سبھ قبول ہے جی
ایہہ پلنگھ تے کدے نہ اٹھ بیٹھے ساڈے ڈھڈھ وچ پھرے ڈنڈول ہے جی
377
نبض ویکھ کے ایس دی کراں کاری دے ویدنا سبھ بتاء مینوں
ناڑ ویکھ کے کراں علاج ایس دا جے ایہہ اُٹھ کے ست وکھائے مینوں
روگ کاس تھوں چلیا کرے ظاہر مزہ مونہہ دا دے بتائے مینوں
وارثؔ شاہ میاں چھتی روگ کٹاںبلک موت تھیںلواں بچاء ایہنوں
378
کھنگھ کُھرک تے ساہ تے اکھ آئی سول دنددی پیڑ گواونے ہاں
قولنج تپ دِق تے مُحرقہ تپ اوہنوں کاڑھیاں نال گواونے ہاں
سرسام سودا ء زکام نزلہ ایہہ شربتاں نال پٹاونے ہاں
سِل نفخ تے استسقاء ہووے لحم طبل تے واؤ ونجاونے ہاں
لوت پھوڑیاں اتے گھنبیر چنبل تیل لائی کے جڑاں پٹاونے ہاں
ہووے ٹپٹپی پیڑ کہ ادھ سیسی اوہدا گٹادنہہ اٹھویں پاونے ہاں
ادھرنگ مکھ بھینگیا ہووے جس دا شیشہ حلب دا کڈھ وکھاونے ہاں
مِرگی ہوس تاں لاہ کے پیر چھتر رکھ نک تے چا سُنگھاونے ہاں
جھولا مار جائے جنہاں روگیاں نوں سوئے تیل سہانجنا لاونے ہاں
بانہہ سُک جائے ٹنگ سن ہووے تدوں پین دا تیل ملاونے ہاں
رن مردنوں کام جے کرے غلبہ دھنیاں بھیوں کے چا پواونے ہاں
نامرد نوں چیچ ووہوٹیاں دا تیل کڈھ کے نِت ملاونے ہاں
جے کسے نوں باد فرنگ ہووے رسکپورتے لونگ دواونے ہاں
پرمیو سوزاک تے چھاہ موتی اوہنوں اندری جھاڑ دواونے ہاں
اتی سار نباہیاں سُول جیہڑے ایسبغول ہی گھول پواونے ہاں
وارثؔ شاہ جیہڑی اٹھ بہے ناہیں اوہنوں ہتھ ای مول نہ لاونے ہاں
379
لکھ ویدگی وید لگا تھکے دھروں ٹٹری کسے نہ جوڑنی وے
جتھے قلم تقدیر دی وگ مُکی کسے ویدگی نال نہ موڑنی وے
جس کم وچ ووہٹڑی ہووے چنگی سوئی خیر ہے اساں نے لوڑنی وے
وارثؔ شاہ آزار ہو سبھ مڑدے ایہہ قطعی نہ کسے نے موڑنی وے
380
من ضَحَکَ ضُحِکَ حکم ہویا گل فقر دی نوںناہیں ہسیے نی
جو کجھ کہن فقیر سو رب کردا آکھے فقر دے تھوں ناہیں نسیے نی
ہووے خیر تے دیہی دا روگ جائے نِت پہنیے کھائیے وسیے نی
بھلا برا جو دیکھیے مشٹ کرئیے بھیت فقر دا مول نہ دسیے نی
ہتھ بنھ فقیر تے صدق کیجے نہیںسیلھیاں ٹوپیاں کھسیے نی
مُکھ کھول وکھا جو ہوویں چنگی نی ایانیے بھولیے سسیے نی
رب آن سبب جاں میل داہے خیر ہو جاندی نال لسیے نی
صلح کیتیاں فتح جے ہتھ آوے کمر جنگ تے مول نہ کسیے نی
تیری درد دا سبھ علاج میتھے وارثؔ شاہ نوں وید ناں دسیے نی



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels