Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 386-390

ہیر وارث شاہ بند 386-390

وارث شاہ
January 14th, 2009
5 / 5 (2 Votes)
386
مانی متیے روپ گمان بھریے بھیڑو کارئیے گرب گہیلیے نی
ایڈے فن فریب کیوں کھیڈنی ہیں کسے وڈے اُستاد دیے چیلیے نی
ایس حسن دا نہ گمان کیجے مان متیے روپ روہلیے نی
تیری بھابی دی نہیں پرواہ سانوں وڈی ہیر دی انگ سہیلیے نی
ملے سراں نوں نہ وچھوڑ دیجے ہتھوں وِچھڑیاں سِراں نوں میلیے نی
کیہا ویر فقیر دے نال چایو پچھا چھڈ انوکھیے لیلیے نی
ایہہ جٹی سی کونج تے جٹ اُلو پری بدھیا جے گل کھیلیے نی
وارثؔ جنس دے نال ہم جنس بندی بھور تازناں گدھے نہ میلیے نی
387
ہیر کن دھریا ایہہ کون آیا کوئی ایہہ تاں ہے داد خواہ میرا
مینوں بھور تازن جیہڑا آکھدا ہے اتے گدھا بنایا سو چا کھیڑا
متاں چاک میرا کویں آن بھاسے اوس نال میں اٹھ کے کراں جھیڑا
وارثؔ شاہ مت کن پڑا رانجھا گھت مُندراں منیاحکم میرا
388
بولی ہیر وے اڑیا جا ساتھوں کوئی خوشی نہ ہووے تے ہسیے کیوں
پردیسیاں جوگیاں کملیاں نوں وچوں جیو دا بھیت چا دسیے کیوں
جے تاں جفا نہ جالیا جائے جوگی جوگ پنتھ وچ آئی کے دھسیے کیوں
جے توں انت رناں ول ویکھنا سی واہی جو ترے چھڈ کے نسیے کیوں
جے تاں آپ علاج نہ جانےے وے جن بھوت دے جادوڑے دسیے کیوں
فقر بھارڑے گورڑے ہو رہیے کُڑی چڑی دے نال خرخسیے کیوں
جیہڑا کن لپیٹ کے نس جائے مگر لگ کے اوس نوں دھسیے کیوں
وارثؔ شاہ اُجاڑ کے وسدیاں نوں آپ خیر دے نال پھیرو سیے کیوں
389
گھروں سکھنا فقر نہ ڈوم جائے انی کھیڑیاں دئیے غمخورئیے نی
کوئی وڈی تقصیر ہے اساں کیتی صدقہ حسن دا بخش لئے گورئیے نی
گھروں سرے سو فقر نوں خیر دیجے نہیں تُرت جواب دے ٹورئیے نی
وارثؔ شاہ کجھ رب دے نانو دیچے نہیں عاجزاں دی کائی زورئیے نی
390
ہیر آکھدی جوگیا جھوٹھ آکھیں کون رُٹھڑے یار ملاؤندا ای
ایہا کوئی نہ ملیا میں ڈھونڈھ تھکی جیہڑا گیاں نوں موڑلیاؤندا ای
ساڈے چم دیاں جُتیاں کرے کوئی جیہڑا جیو دا روگ گواؤندا ای
بھلا دس کھاں چریں وچھنیاں نوں کدوں رب سچا گھریں لیاؤندا ای
بھلا موئے تے وچھڑے کون میلے ایویں جیوڑا لوک دلاؤندا ای
اک باز تھوں کانو نے کونج کھوئی ویکھاں چپ ہے کہ کرلاؤندی ای
اِکس جٹ دے کھیت نوں اگ لگی ویکھاں آن کے کدوں بجھاؤندا ای
دیاں چوریاں گھیو دے بال دیوے وارثؔ شاہ جے سناں میں آؤندا ای


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels