Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند436-440

ہیر وارث شاہ بند436-440

وارث شاہ
January 19th, 2009

436
جے تیں پول کڈھاونا نہ آہا ٹھوٹھا فقر دا چا بھنائیے کیوں
جے تاں کواریاں یا ر ہنڈاونے سن تاں پھر مانو دے کولوں چھپائیے کیوں
خیر منگیے تاں بھن دیئیں کاسہ اسیں آکھدے مونہوں شرمایے کیوں
بھرجائی نوں مہنا چاک دا سی یاری نال بلوچ دے لائیے کیوں
بوتی ہو بلوچ دے ہتھ آئیں جڑ کوار دی چا بھنائیے کیوں
وارث شاہ جاں عاقبت خاک ہونا ایتھے اپنی شان ودھائیے کیوں


437
جو کو جمیّا مرے گا سبھ کوئی گھڑیا بھجسی واہ سبھ ویہن گے وے
میر پیر ولی غوث قطب جاسن ایہہ سبھ پسارڑے ڈھین گے وے
جدوں رب اعمال دی خبر پچھے ہتھ پیر گواہیاں کہن گے وے
جدوں عمر دی اودھ معتاد پُگی عزرائیل ہوری آ بہن گے وے
بھنے ٹھوٹھے توں ایڈ ودھا کیتو بُرا تدھ نوں لوک سبھ کہن گے وے
جیبھ بُرا بویسیا راولا وے ہڈپیر سزائیاں لین گے وے
کُل چیز فناہ ہو خاک رلسی ثابت ولی اللہ دے ریہن گے وے
ٹھوٹھا نال تقدیر دے بھج پیا وارث شاہ ہوری تینوں کہن گے وے


438
شالا قہر پوی چھُٹ باز پینی ٹھوٹھا بھن کے لاڈ بھنگارنی ہیں
لک بنھ کے رنے گھلہکڑے نی ماڑا ویکھ فقیر نوں مارنی ہیں
نالے مارنی ہیں جیو ساڑنی ہیں نالے حال ہی حال پکارنی ہیں
مرے حکم دے نال تاں سبھ کوئی بنا حکم دے خون گذارنی ہیں
برے نال جے بولیے برے ہوئیے اسیں بودلے ہاں تے توں یارنی ہیں
ٹھوٹھا پھیر درست کر دے میرا ہور آکھ کیہ سچ نتارنی ہیں
لوک آکھدے ہین ایہہ کڑی کواری ساڈے باب دی دھاڑوی دھارنی ہیں
ایڈے فن فریب ہین یاد تےنوں مرداراں دی سر سردارنی ہں
اک چور تے دوسرے چتر بنیوں وارث شاہ ہن ڈھائی کے مارنی ہیں
گھر والیے ووہیٹے بول توں بھی کہی جیو وچ سوچ وچارنی ہیں
سوامنی مطہر پئی پھرکدی ہے کسے یارنی دے سر مارنی ہیں


439
ہیر آکھدی ایہہ چوا کہےا ٹھوٹھا بھن فقیراں نوں مارنا کیہ
جِنہاں ہک اللہ دا آسرا ہے اوہناں پنکھیاں نال کھہاڑنا کیہ
جیہڑے کن پڑا فقیر ہوئے بھلا اوہناں دا پڑتنا پاڑنا کیہ
تھوڑی گل دا وڈا ودھا کر کے سورے کم نوں چا وگاڑنا کیہ
جےہڑے گھراں دیاں چاوڑاں نال مارے گھر چُک کے ایس لے جاونا کیہ
لڑیے آپ بروبرے نال کڑئیے سوٹے پکڑ ےتےماں تے آونا کیہ
میرے بوہیوں فقر کیوں ماریو ای وسدے گھراں توں فقر موڑاونا کیہ
گھر میرا تے میں نال کھنس چا یو ایتھوں کوارئیے تُدھ لے جاونا کیہ
بولھ راہکاں دا ہونس چوہڑ ے دی مرشوں مرش دنہہ رات کراونا کیہ
وارث شاہ ایہہ حرص بے فائدہ ای اوڑک ایس جہان توں چاونا کیہ


440
بھلا آکھ کیہ آہدی ایں نیک پا کے جس دے پلُّو تے پڑھن نماز آئی
گھر بار تیرا اسیں کوئی ہویاں جاپے لد کے گھروں جہاز آئی
نڈھے موہنی تے جھوٹے دوہنی نی اجے تیک نہ عشق توں باز آئی
وارث شاہ جوانی دی عمر گذری اجے تیک نہ یاد حجاز آئی




Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels