Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 456-460

ہیر وارث شاہ بند 456-460

وارث شاہ
January 19th, 2009
456
روندا کاس نوں بیر بیتالیاوے پنجاں پیراں دا تُدھ ملاپ میاں
لا زور للکار توں پیر پنجے تیرا دور ہووے دُکھ تاپ میاں
جنہاں پیراں دا زور ہے تُدھ نُوں وے کر رات دینہہ اوہناں دا جاپ میاں
زور اپنا فقر نُوں یاد آیا بالناتھ میرا گرو باپ میاں
وارثؔ شاہ بھکھا بوہے روئے بیٹھا دے انہاں نُوں وڈا سراپ میاں
457
کرامات لکھاء کے سحر پھُوکاں جڑ کھیڑیاں دی مُڈھوں پٹ سٹاں
فوجدار ناہیں پکڑ کوارڑی نُوں ہتھ پیر تے نک کن کٹ سٹاں
نال فوج ناہیں دیاں پھُوک اگاں کر ملک نُوں چوڑ چپٹ سٹاں
اَلَم تَرَکَیفَ بدوح قہارپڑھ کے نہیں وہندیاں پلک وچ اٹ سٹاں
سہتی ہتھ آوے پکڑ چوڑیاں تھوں وانگ ٹاٹ دے تپڑی چھٹ سٹاں
پنج پیر جے باہوڑن آن مینوں دُکھ درد قضیڑے کٹ سٹاں
حکم رب دے نال میں کال جیبھا مکر لگ کے دُوت نُوں چٹ سٹاں
ہووے پارسمندروں ہیر بیٹھی بُکاں نال سمندراں جھٹ سٹاں
جٹ وٹ تے پٹ پھٹ بدھے ور دین سیانیاں سٹ سُٹاں
وٹ سٹ نچت گھلہٹ ہو کے جھٹ وٹ تے اوندھ ولٹ سٹاں
وارث شاہ معشوق جے ملے خلوت سبھ جیو دے دکھ الٹ سٹاں
458
دل فکر نے گھریا بند ہویا رانجھا جیو غوطے لکھ کھاء بیٹھا
ستھوں ہُونجھ دُھواں سر چا ٹُریا کالے باغ وھیر مچا ء بیٹھا
اکھیں میٹ کے رب دھیان دھر کے چاروں طرف ہی دھونڑا لاء بیٹھا
وٹ مار کے چاروں ہی طرف اُچی اوتھے ولگناں خوب بنا بیٹھا
اساں کچ کیتا رب سچ کرسی ایہہ آکھ کے ویل جگا ء بیٹھا
بھڑکی اگ جاں تاؤنی تا کیتا عشق مُشک وسار کے جا بیٹھا
وچ سنگھنی چھاؤں دے گھت بھُورا وانگ احدیاں ڈھاسنا لاء بیٹھا
وارثؔ شاہ اوس وقت نُوں جُھور دائی جس ویلڑے اکھیاں لا بیٹھا
459
میٹ اکھیاں رکھیاں بندگی تے گھتے جلیاں چِلے وچ ہو رہیا
کرے عاجزی وچ مراقبے دے دینہہ رات خدائے تھے رو رہیا
وچ یاد خدائے دی محو رہندا کدی بیٹھ رہیا کدی سو رہیا
وارثؔ شاہ نہ فکر کر مشکلاں دا جو کچھ ہوونا سی سوئی ہو رہیا
نیولی کرم کردا کدی اُردھ تپ وچ کدی ہوم سریر وچ جھو رہیا
460
کدی نکہی تپ شام تپ پَون بھکھی سدا برت نیمے چت لا رہیا
کدی اُردھ تپ ساس تپ گراس تپ نوں کدی جوگ جتی چت لا رہیا
کدی مست مجذوب لٹ ہو ستھرا الف سیاہ متھے اُتے لا رہیا
آواز آیا بچا رانجھنا وو تیرا صبح مقابلہ آ رہیا


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels