Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیروارث شاہ بند476-480

ہیروارث شاہ بند476-480

وارث شاہ
January 19th, 2009
476
آء سہتیے واسطا رب دا ای نال بھابیاں دے مِٹھا بولیئے نی
ہویے پِیڑ ونڈاوڑے شوہدیاں دے زہربسئرٔاں وانگ نہ گھولیئے نی
کم بند ہووے پردیسیاں دا نال مہر دے اوس نوں کھولیئے نی
تیرے جیہی ننان ہو میل کرنی جیو جان بھی اوس تھوں گھولیئے نی
جوگی چل منایئے باغ وچوں ہتھ بنھ کے مِٹھڑا بولیئے نی
جو کچھ کہے سو سرے تے من لیئے غمی شادیوں مُول نہ ڈولیئے نی
چل نال میرے جیویں بھاگ بھریے میل کرنیے وچ وچولیئے نی
کویں میرا تے رانجھے دا میل ہووے کھنڈ دُدھ دے وچ چا گھولیئے نی
477
جویں صبح دی قضا نماز ہُندی راضی ہو ابلیس بھی نچدا اے
تویں سہتی دے جیو وچ خوشی ہوئی جیو رن دا چھلڑا کچ داے
جا بخشیا سبھ گناہ تیرا تینوں عشق قدیم تھوں سچ داے
وارثؔ شاہ چل یار منا آیئے ایتھے نواں اکھارڑا مچدااے
478
سہتی کھنڈ ملائی دا تھال بھریا چا کپڑے وچ لُکایاای
جیہا وچ نماز وسواس غیبوں عزازیل بنا لے آیاای
اُتے پنج روپے سُو روک رکھے جائے فقر تے پھیررڑا پایاای
جدوں آوندی جوگی نے اوہ ڈِٹھی پچھاں اپنا مُکھ بھوایاای
اساں روحاں بہشتیاں بیٹھیاں نوں تاؤ دوزخے دا کیہا آیاای
طلب مینہ دی وگیا آن جھکھڑ یارو آخری دور ہُن آیاای
سہتی بَنھ کے ہتھ سلام کیتا اگوں مُول جواب نہ آیاای
عامل چورتے چودھری جٹ حاکم وارثؔ شاہ نُوں رب وکھایاای
479
جدوں خلق پیدا کیتی رب سچے بندیاں واسطے کیتے نے ایہہ پسارے
رناں چھوکرے جن شیطان راول کُتا ککڑی بکری اُٹھ سارے
ایہا مُول فساد دا ہوئے پیدا جنہاں سبھ جگت دے مُول مارے
آدم کڈھ بہشت تھیں خوار کیتا ایہہ ڈائیناں دُھروں ہی کرن کارے
ایہہ کرن فقیر چا راجیاں نُوں اوہناں راؤ رزادڑے سِدھ مارے
وارثؔ شاہ جو ہُنر سبھ وچ مرداں اَتے مہریاں وچ نیں عیب سارے
480
سہتی آکھیا پیٹ نے خوار کیتا کنک کھا بہشت تھیں کڈھیا ای
آئی میل تا جنتوں ملے دھکے رسا آس اُمید دا وڈھیاای
آکھ رہے فرشتے کنک دانہ نہیں کھاونا حکم کر چھڈیاای
وَلاتَقرَبا ھٰذالشَجرۃ نالے سپ تے مورنوں کڈھیاای
ایہہ سمجھ شیطان بھی مرد ہویا ناؤں رَناں دا بُرا کر چھڈیاای
سگوں آدمے حوا نوں خوار کیتا ساتھ اوس دا ایس نہ چھڈیاای
پھیڑن مرد تے سونپ دے تریمتاں نُوں مُنہ جھُوٹھ دا کاسنوں ٹڈیاای
مرد چورتے ٹھگ جواریے نیں ساتھ بُرے دا نراں نیں لدیاای
فُرقان وچ فانکحوا رب کہیا جدوں وحی رسول ؐ نے سدیاای
وارثؔ شاہ ایہہ تریمتاں کھان رحمت پیدا جنہاں جہان کر چھڈیاای



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels