Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند491-495

ہیر وارث شاہ بند491-495

وارث شاہ
January 19th, 2009
491
جا کھول کے ویکھ جو صدق آوی کیہا شک دل اپنے پایو ئی
کیہا اساں سو رب تحقیق کرسی کیہا آن کے مغز کھپایو ئی
جا ویکھ جو وسوسہ دور ہوئے کیہاڈور روڑا آن وجایو ئی
شک مِٹی جو تھال نُوں کھول ویکھیں ایتھے مکر کیہ آن پھیلایو ئی
492
سہتی کھول کے تھال جاں دھیان کیتا کھنڈ چاولاں دا تھال ہو گیا
چُھٹا تِیر فقیر دے معجزے دا وچوں کُفر دا جیو پرو گیا
جیہڑا چلیا نکل یقین آہا کرامات نُوں ویکھ کھلو گیا
گرم غضب دی آتشوں آب آہا برف کَشف دے نال سمو گیا
جس نال فقیراں دے اَڑی بَدھی اوہ اپنا آپ وگوء گیا
اینویں ڈاہڈیاں ماڑیاں کیہا لیکھا اوس کھوہ لیا اوہ رو گیا
مرن وقت ہویا سبھو ختم لیکھا جو کو جمیا جھوونے جھوگیا
وارثؔ شاہ جو کیمیا نال چُھتھا سوئنا تانبیوں تُرت ہی ہو گیا
493
ہَتھ بنھ کے بینتی کرے سہتی دل جان تھیں چیلڑی تیریاں میں
کراں باندیاں وانگ بجا خدمت نت پاوندی رہاں گی پھیریاں میں
پیر سچ دا اساں تحقیق کیتا سنیں ہیر تے ماپیاں تیریاں میں
کرامات تیری اُتے صدق کیتا تیرے حکم دے کشف نے گھیریاں میں
ساڈی جان تے مال تے ہیر تیری نالے سَنے سہیلیاں تیریاں میں
اساں کسے دی گل نہ کدی مَنی تیرے اسم اعظم ٹیریاں میں
اِک فقر الہ دا رکھ تقوےٰ ہور ڈھاہ بیٹھی سَبھ ڈھیریاں میں
پُوری نال حساب نہ ہو سکاں وارثؔ شاہ کیہ کراںگی سیریاں میں
494
گھر اپنے وچ چوا کر کے آکھ ناگنی وانگ کیوں شوکئیں نی
نال جوگیاں مورچہ لایو ای رَجے جَٹ وانگوں وڈی پھُوکئیں نی
جدوں بنَھ جھیڑے تھک ہٹ رہئیں جا پنڈ دیاں رناں تے کُوکئیں نی
کڈھ گالیاں سنے ربیل باندی گھن مولھیاں اساں تے گھوکئیں نی
بھلو بھلی جاں ڈٹھیاں عاشقاں دی وانگ کُتیاں انت نوں چوکئیں نی
وارثؔ شاہ تھیں پچھ لے بندگی نوں روح ساز قَلبُوت وچ پھوکئیں نی
495
سانوں بخش اللہ دے ناؤں میاں ساتھوں بھُلیاں ایہہ گناہ ہویا
کچا شِیر پتیا بندہ سدا بھُلا دُھروں آدموں بھُلنا راہ ہویا
آدم بھُل کے کنک نُوں کھائے بیٹھا کڈھ جنتوں حکم فنا ہویا
شیطان اُستاد فرشتیاں دا بھُلا سجدیوں کِبر دے راہ ہویا
مڈھوں رُوح ہی قول دے قال وڑیا جُسہ چھڈ کے اَنت فناہویا
قارون بھُل زکوٰۃ تھیں شُوم ہویا وارد اوس تے قہر اِلہٰ ہویا
بھُل زکریے لئی پناہ ہیزم آرے نال اوہ چیر دو پھاہ ہویا
عمَلَاں باجھ درگاہ وچ پَون پَولے لوکاں وچ میاں وارثؔ شاہ ہویا

Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels