Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ -505 501

ہیر وارث شاہ -505 501

وارث شاہ
January 20th, 2009
لکھی سوہنی موہنی ہنس رانی مرگ نینی نوں جاء کے گھلنی ہاں
تیریاں عظمتاں ویکھ کے پیر میاں باندی ہوئی کے گھراں نُوں چلنی ہاں
پیری پیر دی ویکھ مرید ہوئی تیرے پَیر ہی آن کے ملنی ہاں
مینوں بخش مُراد بلوچ سائیاں تیریاں جُتیاں سرے تے جھلنی ہاں
وارثؔ شاہ کر ترک بریائیاں دی دربار الہ دا ملنی ہاں
502
سہتی جاء کے ہیر نُوں کول بَہ کے بھیت یار دا سبھ سمجھایا ای
جی نوں مار کے گھروں فقیر کیتو اوہ جوگیڑا ہوء کے آیاای
اوہنوں ٹھگ کے مہیں چرا لیوں ایتھے آء کے رنگ وٹایا ای
تیرے نیناں نے چا ملنگ کیتا مَنوں اوس نُوں چا بھلایا ای
اوہدے کن پڑائی کے ون لتھا آپ وہوٹڑی آن سدایا ای
آپ ہو زلیخا دے وانگ سچی اوہنوں یوسف ؑ چا بنایاای
کیتے قول قرار وسار سارے آن سیدے نُوں کونت بنایاای
ہوئے چاک پِنڈے ملی خاک رانجھے کن پاڑ کے حال ونجایائی
دینے دار مواس ہو ویہر بیٹھی لینے دار ہی اَک کے آیاای
گالیں دے کے ویہڑیوں کڈھ اوس نوں کل مولھیاں نال کٹایاای
ہو جائیں نہال جے کریں زیارت تینوں باغ وچ اوس بلایا ای
زیارت مرد کفارت ہون عصیاں نور فقر دا ویکھنا آیا ای
بہت زہد کیتا ملے پیر پنجے مینوں کشف بے زوروکھایا ای
جھب نذر لے کے مل ہوئے رعیت فوجدار بحال ہو آیاای
اوہدی نزع توں آب حیات اوسدا کیہا بھابیے جھگڑا لایا ای
چاک لاء کے کن پڑایو نی نیناں والیے غیب کیوں چایاای
بچے اوہ فقیراں تھوں ہیر کڑیے ہتھ بنھ کے جنہاں بخشایا ای
اکے مار جاسی اکے تار جاسی ایہہ مینہ انیاؤں دا آیاای
عمل قوت تے وڈی دستار پھلی کیہا بھیل دا سانگ بنایاای
وارثؔ قول بھلاء کے کھیڈ ردھوں کیہا نواں مخول جگایاای
503
ہیر آکھیا جاء کے کھول بُکل اوہدے ویس نُوں پھُوک وکھاونی ہاں
نیناں چاڑھ کے سان تے کراں پُرزے قتل عاشقاں دے اُتے دھاؤنی ہاں
اِکے چاک سی خاک کر ساڑ سٹاں اوہدے عشق نُوں صِقل چڑھاونی ہاں
اوہدے پَیراں دی خاک ہے جان میری ساری سچ دی نِشا دواونی ہاں
مویا پیا ہے نال فراق رانجھا عیسیٰ ؑ وانگ مُڑ پھیر جواونی ہاں
وارثؔ شاہ پتنگ نُوں شمع وانگوں انگ لائی کے ساڑ وکھاونی ہاں
504
ہیر نہاء کے پَٹ دا پَہن تیور والیں عطر پھُلیل ملاؤندی ہے
وَل پا کے میڈھیاں خونیاں نُوں گورے مُکھ تے زُلف پلماؤندی ہے
کجل بھنڑے نین اپرادھ لُٹے دوویں حُسن دے کٹک لے دھاؤندی ہے
مَل وَٹنا ہوٹھاں تے لاء سُرخی نواں لوڑھ تے لوڑھ چڑھاؤندی ہے
سری صاف سندا بھوچن سُوہندا سی کنیں بُک بُک والیاں پاؤندی ہے
کمخواب دی چولڑی ہک پیدھی مانگ چونک تے تیڑولاؤندی ہے
گھت جھانجراں لوڑھ دے سرے چڑھ کے ہیر سیال لٹکدی آؤندی ہے
ٹِکا بندلی بنی ہے نال لُوہلاں وانگ مور دے پائیلاں پاؤندی ہے
ہاتھی مست چُھٹا چھن چھن چھنکے قتل عام خلقت ہوندی آؤندی ہے
نین مست تے لوڑھ دے سرے چڑھ کے شاہ پری چھنکدی آؤندی ہے
کدی کڈھ کے گُھنڈ لوڑھا دیندی کدی کھول کے مار مکاؤندی ہے
گُھنڈ لاہ کے لٹک وکھا ساری جٹی رُٹھڑا یار مناؤندی ہے
وارث مال دے نُوں سبَھا کھول دولت وکھو وکھ کر چا وکھاؤندی ہے
وارثؔ شاہ شَاہ پَری دی نظر چڑھیا خلقت سیفیاں پھُوکنے آؤندی ہے
505
رانجھا ویکھ کے آکھدا پری کوئی اکے بھانویں تاں ہیر سیال ہووے
کوئی حُور کہ موہنی اندرانی ہیر ہووے تاں سیاں دے نال ہووے
نیڑے آئی کے کالجے دھا گیوس جویں مست کوئی نشے نال ہووے
رانجھا آکھدا ابر بہار آیا بیلا جنگلا لالو ہی لال ہووے
ہاٹھ جوڑ کے بدلاں ہانجھ بَدھی ویکھاں کیہڑا دیس نہال ہووے
چمکی لیلتہ القدر سیاہ شب تھیں جس تے پوے گی نظر نہال ہووے
ڈول ڈال تے چال دی لٹک سُندر جیہا پیکھنے دا کوئی خیال ہووے
یار سوئی محبوب تھوں فدا ہووے جیو سوئی جو مُرشداں نال ہووے
وارثؔ شاہ آئے چمبڑی رانجھنے نوں جیہا گدھے دے گل وچ لعل ہووے



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels