Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند511-515

ہیر وارث شاہ بند511-515

وارث شاہ
January 20th, 2009
511
تُسیں کرو جے حکم تاں گھریں جاےئے نال سہتی دے ساز بنائیے جی
بحر عشق دا خشک غم نال ہویا مینہ عقل دے نال بھرائیے جی
کویں کراں کشائش میں عقل والی تیرے عشق دیاں پوریاں پائیے جی
جا تیاریاںٹرن دیاں جھب کرئیے سانوں سجنو حکم کرائیے جی
حضرت سورۃ اخلاص لکھ دیو مینوں فال قرعہ نجوم دا پائیے جی
کھول فال تے کاج دیوان حافظ وارثؔ شاہ تھوں فال کڈھائیے جی
512
اول پَیر پکڑے اعتقاد کر کے پھیر نال کلیجے دے لگ گئی
نَواں طَور عجُوبے دا نظر آیا ویکھو جَل پتنگ تے اگ گئی
کہے لگ گئی چننگ جگ گئی خبر جگ گئی وج دھرگ گئی
یارو ٹھگاں دی ریوڑی ہیر جٹی منہ لگدیاں یار نُوں ٹھگ گئی
لگا مست ہو کملیاں کرن گلاں دعا کسے فقیر دی وَگ گئی
اگے دھواں دُھکھندڑا جوگیڑے دا اُتوں پھوک کے جھگڑے اگ گئی
یار یار دا باغ وچ میل ہویا گل عام مشہور ہو جگ گئی
وارثؔ تُرٹیاں نُوں رب میلدا اے ویکھو کملڑے نُوں پری لگ گئی
513
ہیر ہو رخصت رانجھے یار کولوں آکھے سہتیے مَتا پکائیے نی
ٹُھوٹھا بھن فقیر نُوں کڈھیا سی کویں اوس نُوں خیر بھی پائیے نی
ویہن لوڑھ پیا بیڑا شُہدیاں دا نال کرم دے بنڑے لائیے نی
میرے واسطے اوس نے لئے ترلے کویں اوس دی آس پجائیے نی
تینوں ملے مُراد تے اساں ماہی دونویں اپنے یار ہنڈائیے نی
رانجھا کن پڑا فقیر ہویا سر اوس دے وری چڑھائیے نی
باقی عمر رانجھیٹے دے نال جالاں کویں سہیتے ڈول بنائیے نی
ہویا میل جاں چریں وچھنیاں دا یار رج کے گلے لگائیے نی
جیو عاشقاں دا عرش رَب دا ہے کویں اوس نُوں ٹھنڈ پوائیے نی
ایہہ جوبنا ٹھگ بازار دا ہے سر کسے دے ایہہ چڑھائیے نی
کوئی روز دا حُسن پراہنا ای مزے خوبیاں نال ہنڈائیے نی
شیطان دیاں اسیں اُستاد رَناں کوئی آؤ کھاں مکر پھیلائیے نی
باغ جاندیاں اسیں نہ سوہندیاں ہاں کویں یار نُوں گھریں لیائیے نی
گل گھت پَلا مُنہ گھاہ لے کے پیریں لگ کے پِیر منائیے نی
وارثؔ شاہ گناہاں دے اسیں لدے چلو کُل تقصیر بخشائیے نی
514
اگوں رائباں صیرفاں بولیاں نیں کیہا بھابیے نی متھا کھیڑیا ای
بھابی آکھ کیہ لبھیو ٹہک آئی ایں سوئن چڑی وانگوں رنگ پھیریاای
موئی گئی سیں جیوندی آوڑی ایں سچ آکھ کیہ سہج سہیڑیاای
اج رنگ تیرا بھلا نظر آیا سبھو سُکھ تے دُکھ نبیڑیاای
نین شوخ ہوئے رنگ چمک آیا کوئی جوبنے دا کھوہا گیڑیاای
عاشق مست ہاتھی بھاویں باغ والا تیری سنگلی نال کھہیڑیاای
قدم چُست تے صاف کنوتیاں نیں ہتھ چابک اسوار نے پھیریاای
وارثؔ شاہ اَج حُسن میدان چڑھ کے گھوڑا شاہ اسوار نے پھیریاای
515
نین مست گلَھاں تیریاں لال ہوئیاںڈکاں بھَن چولی وچ ٹھلیاں نی
کسے ہِک تیری نال ہِک جوڑی پیڈو نال ولوندھراں میلیاں نی
کسے اَمب تیرے اج چُوپ لَئے تِل پِیڑ کڈھے جویں تیلیاں نی
تیرا کسے نَڈھے نال میل ہویا دھاراں کجلے دیاں سُرمیلیاں نی
دس وارثاؔ کسے نچوہئیں توں کِتے گوشے ہی ہوریاں کھیلیاں نی

Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels