Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 516-520

ہیر وارث شاہ بند 516-520

وارث شاہ
January 20th, 2009
516
سبھو مل وَل سُٹیں وانگ پھُلاں جھوکاں تیریاں مانیاں بیلیاں نیں
کسے زوم بھرے پھڑ نپئیں توں دھڑکے کالجا پوندیاں تیلیاں نیں
برھیاں بہوٹیاں دا کُھلا اج بارا کونتاں رانویاں ڈھا مہیلیاں نیں
کسے لئی ہوشناک نے جت بازی پاسا لائیکے بازیاں کھیلیاں نیں
صوبہ دار نے قلعے نُوں ڈھو توپاں کر کے زیر رعیتاں میلیاں نیں
تیریاں گلھاں تے دنداں دے داغ دِسن اج سودھیاں ٹھاکراں چیلیاں نیں
اج نہیں عیالیاں خبر لُدھی بگھیاڑاں نیں رولیاں چھیلیاں نیں
اج کھیدیاں نیں نال مستیاں دے ہاتھی داناں نے ہتھنیاں پیلیاں نیں
چُھٹا جھانجرا باغ دے صفے وچوں گاہ کڈھیاں سب حویلیاں نیں
517
جویں سونہنے آدمی پھرن باہر کچرک دولتاں رہن چھپائیاں نیں
اج بھانویں تاں باغ وچ عید ہوئی کھادیاں بھُکھیاں نے مٹھیائیاں نیں
اج کئیاں دے دلاں دی آس پُنی جم جم جان باغیں بھر جائیاں نیں
وسے باغ جُگاں تائیں سنے بھابی جتھے پِین فقیر ملائیاں نیں
خاک تودیاں تے وڈے تِیر چھُٹے تیر اندازاں نے کانیاں لائیاں نیں
اج جو کوئی باغ وچ جا وڑیا مُونہوں منگیاں دولتاں پائیاں نیں
پانی باجھ سُکی داڑھی کھیڑیاں دی اج مُن کڈھی دوہاں نائیاں نیں
اج سُرمُچو پاکے چھیلیاں نیں سُرمے دانیاں خُوب ہلائیاں نیں
سیاہ بھور ہوئیاں چشماں پیاریاں دیاں بھر بھر پاوندے رہے سلائیاں نیں
اج آبداری چڑھی موتیاں نُوں جیو آیاں بھابیاں آئیاں نیں
وارثؔ شاہ ہُن پانیاں زور کیتا بہت خوشی کیتی مرغائیاں نیں
518
تیرے چنبے دے سہرے حُسن والے اَج کسے ہوشناک نے لُٹ لَئے
تیرے سینے نُوں کسے ٹٹوہیائی نافے مُشک والے دونویں پُٹ لَئے
جیہڑے نت نشان چھپاؤندی سیں کسے تِیر انداز نے چُٹ لَئے
کسے ہک تیری نال ہک جوڑی وچے پھُل گلاب دے گھُٹ لَئے
کسے ہوبے درد کشیش دِتی بند بند کمان دے تُرٹ گئے
آکھ کِنہاں پھُلیلیاں پیڑئیں توں عطر کڈھ کے پھوگ نُوں سُٹ گئے
519
تیری گادھی نُوں اج کسے دھکیائی کسے اج تیرا کھُوہ گیڑیاای
لایا رنگ نسنگ ملنگ بھانویں انگ نال تیرے انگ بھیڑیاای
لاہ چپنی دُدھ دی دیگچی دی کسے اج ملائی نُوں چھیڑیاای
سُرمے دانی دا لاہ بروچنا نی سُرمے سُرمُچو کسے لوٹیریاای
وارثؔ شاہ تینوں پچھوں آء ملیا اکے نواں ہی کوئی سہیڑیاای
520
بھابی اج جوبن تیرے لہر دِتی جویں ندی دا نیر اُچھلیاای
تیری چولی دیاں ڈھلیاں ہین تنیاں تینوں کسے محبوب پتھلیاای
قُفل جندرے توڑ کے چور وڑیا اج بیڑا کستوری دا ہلیا ای
سُوہا گھگرا لہراں دے نال اُڈے بوگ بند دو چند ہو چلیاای
سُرخی ہوٹھاں دی کسے نے چُوپ لئی اَمب سَکھنا موڑ کے گھلیاای
کستُوری دے مرگ جس ڈھا لَئے کوئی وڈا ہیڑی آملیا ای


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels