Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند 546-550

ہیر وارث شاہ بند 546-550

وارث شاہ
January 20th, 2009

546
جائے منجیوں اُٹھ کے کویںتلکے ہڈ پیر ہلائی کے چُست ہووے
وانگ روگناں رات دینہہ رہے ڈھٹھی کویں ہیر بھی تندرست ہووے
ایہہ بھی وڈا عذاب ہے ماپیاں نُوں دھیو نُونہہ بُوہے اُتے سست ہووے
وارثؔ شاہ میاں کیوں نہ ہیر بولے سہتی جیہاں دی جیں نوں پُشت ہووے
547
ہیر آکھیا بیٹھ کے عُمر ساری میں تاں اپنے آپ نُوں ساڑنی ہاں
متاں باغ گیاں میرا جیو کھلے انت ایہہ بھی پاڑنا پاڑنی ہاں
پئی رونی ہاں کرم میں آپنے نُوں کجھ کسے دا نہیں وگاڑنی ہاں
وارثؔ شاہ میاں تقدیر آکھے ویکھ نواں میں کھیل پسارنی ہاں
548
اڑیو آؤ کھاں بیٹھ کے گل گنیے سَد گھلیاں سبَھ سہیلیاں نیں
کئی کواریاں کئی ویاہیاں نیں چن جیہے سریر متھیلیاں نیں
رجوع آن ہوئیاں سبھے پاس سہتی جویں گورو اگے سبھ چیلیاں نیں
جنہاں مانو تے باپ نُوں بھُن کھادا مُنگ چِنے کواریاں کھیلیاں نیں
وچ ہیر سہتی دوویں بیٹھیاں نیں دوا لے بیٹھیاں ارتھ مہیلیاں نیں
وارثؔ شاہ سنگار مہاوتاں نیں جیویں ہتھنیاں قلعے نوں پیلیاں نیں
549
وقت فجر دے اُٹھ سہیلیو نی تُسیں آپنے آہرہی آونا جے
ماں باپ نُوں خبر نہ کرو کوئی بھلکے باغ نُوں پاسنا لاونا جے
ووہٹی ہیر نوں باغ لے چلنا ہے ذرہ ایس دا جیو ولاونا جے
لاون پھیرنی وچ کپاہ بھینا کسے پُرش نوں نہیں وکھاونا جے
راہ جاندیاں نُوں پچُھے لوک اڑیو کوئی اِفترا چا بناونا جے
کھیڈو سمیاں تے گھتو پنھبیاں نی بھلکے کھُوہ نُوں رنگ لگاونا جے
وڑو وَٹ لنگوٹرے وچ پیلی بَنا وَٹ سبَھ پُٹ وکھاونا جے
بنھ جھولیاں چُنو کپاہ سبھے تے منڈاسیاں رانگ سہاونا جے
وڈے رنگ ہوسن اِکو جیڈیاں دے راہ جاندیاں دے سانگ لاونا جے
چرخے چا بھروٹڑے کج اُٹھو کسے پُونی نُوں ہتھ نہ لاونا جے
منجیوں اُٹھ دیاں سبھ نے آجانا اک دوئی نوں سد لیاونا جے
وارثؔ شاہ میاں ایہوارتھ ہوئی سبھناں اَجو دے پھَلے نُوں آونا ہے

550
مَتیاں وچ اماہ دی رات گذری تارے گن دیاںسبھ ادمادیاں نیں
گِردھے پاوندیاں گھمبراں ماردیاں سن جیہاں ہون مٹیاراں دیاں وادیاں نیں
نخریلیاں اِک نک توڑناں سن اِک بھولیاں سدھیاں سادیاں نیں
اِک نیک بختاں اِک بے زباناں ہک نچنیاں تے مالزادایاں نیں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels