Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند606-610

ہیر وارث شاہ بند606-610

وارث شاہ
January 20th, 2009
606
ہیر کھوہ کھیڑ ے چلے وا ہو واہی رانجھا رہیا مونہہ گنجھ حیران یارو
اُڈ جائی کے نگھرے غرق ہو وے ویل دیس نہ زمین اسمان یارو
کھیپ مارلئے کھیتڑ ے سڑ ے بوہل حق عملیاں دے رُڑ ھ جان یارو
ڈوراں ویکھ کے میر شکار رو ون ہتھوں جنہاں دیوں باز اُڈ جان یارو
اوہناں ہوش تے عقل نہ تھانو رہندا سریں جنہاں دے پون ودان یارو
ہیر لاہ کے گُھنڈ حیران ہوئی ستی چخا دے وچ میدان یارو
تِکھا دیدڑ ا وانگ مہاستی دے مل کھڑ ی سی عشق میدان یارو
وچ اوڈھنی سہم دے نال چھپی جیویں وچ قربان کمان یارو
کھونڈے اتے چو گان لے دیس نٹھا ویکھاں کیہڑ ے پھندے جان یارو
چُپ شل ہو بولنوں رہی جٹی بِناں رُوح دے جیویں انسان یارو
وارثؔ شاہ دو ویں پریشان ہوئے جیویں پڑ ھیاں لاحول شیطان یارو
607
رانجھا آکھدا جا کیہ ویکھدی ہیں بُرا موت تھیں ایہہ وجوگ ہے نی
پئے دھاڑ وی لُٹ لے چلے مینوں ایہہ دُکھ کیہ جان دا لوگ ہے نی
ملی سیدے نُوں ہیر تے سواہ مینوں تیرا نام تے اساں نُوں ٹوگ ہے نی
بُکل لیف دی جپھیاں و وہوٹیاں دیاں ایہہ رُت سیال دا بھوگ ہے نی
سوکن رن گوانڈھ کُپتیاں دا بھلے مرد دے باب دا روگ ہے نی
خوشی کِت ہو ون مرد پھُل وانگوں گھریں جنہاں دے نِت دا سوگ ہے نی
تنہاں وچ جہان کیہ مزا پایا گل جنہاں دے ریشٹہ جوگ ہے نی
جیہڑ ا بناں خوراک دے کرے کشتی اوس مرد نُوں جانیے پھوگ ہے نی
اسمان ڈھیہ پوے تاں نہیں مردے باقی جنہاں دی زمین تے چوگ ہے نی
جدوں کدوں محبوب نہ چھڈنا ایں کالا ناگ خدا دا جوگ ہے نی
کانوکُونج نُوں ملے تے شیر پھوی وارثؔ شاہ ایہہ دُھروں سنجوگ ہے نی؟
608
ہر وقت جے فضل دا مینہ وسے بُرا کون مناوندا وُٹھیاں نُوں
لب یار دے آبِ حیات باجھوں کون زندگی بخش دا کُٹھیاں نُوں
دو ویں آہ فراق دی مار لَیے کرامات مناؤندی رُٹھیاں نُوں
وارثؔ مار کے آہ تے شہر ساڑ وں بادشاہ جانے اساں مُٹھیاں نُوں
609
ہیر نال فراق دے آہ ماری ربا ویکھ اساڈیاں بھکھن باہیں
اگے اگ پچھے سَپ شینہہ پاسیں ساڈی واہ نہ چلدی چوہیں راہیں
اکے میل رنجھیٹڑ ا عمر جالاں اکے دوہاں دی عمر دی الکھ لاہیں
ایڈا قہر کیتا دیس والیاں نے ایس شہر نُوں قادرا اگ لاہیں
610
ربا اوہ پائیں قہر شہر اُتے جیہڑ ا گھت فرعون ڈُبایا ای
جیہڑ ا نازل ہویا زکریے تے اوہنوں گھَت شریہنہ چروایا ای
جیہڑ ا پاء کے قہر تے نال غصے وچ اگ خلیل ؑ پوایا ای
جیہڑ ا پاء کے قہر تے سٹ تختوں سلیمان ؑ نوں بھٹھ جھلکایا ای
جیہڑ ے قہر دا یونس ؑ تے پیا بدل اونہوں ڈمبھرے تھوں نگلوایا ای
جیہڑ ے قہر تے غضب دی پکڑ کاتی اسماعیل ؑ نوں ذبح کرایا ای
جیہڑ ا گھتیو غضب تے وڈا غصہ یوسف ؑ کھُوہ دے بند پوایا ای
جیہڑ ے قہر دے نال پھر شاہ مرداں اکس نفر توں قتل کرایا ای
جیہڑ ے قہر دے نال اس بُڈھڑ ی توں امیر حمزہؓ نُوں چا مروایا ای
جیہڑ ے قہر دے نال یزیدیاں توں امام حُسین ؓ نوں چا کہایا ای
ککی بھوہری تیز زبان کولوں حسن ؓزہر دے نال مروایا ای
اوہا قہر گھتیں ایس دیس اُتے جیہڑ ا ایتناں دے سر آیا ای


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels