Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> آکھیا وارث شاہ نے >> ہیر وارث شاہ >> ہیر وارث شاہ بند ۱۳،۱۴،۱۵،۱۶

ہیر وارث شاہ بند ۱۳،۱۴،۱۵،۱۶

وارث شاہ
August 28th, 2008
5 / 5 (1 Votes)

۱۳

پنڈاچت کے آرسی نال ویکھن تنھاں واہن کیہا ہل واہنا اے
پنڈا پال کے چوپڑے پٹے جنہاں کسے رن کیہ اوہناں تھوں چاہنا اے
ہنے بھوئیں دے جھگڑے کرے منڈا ایس توڑ نہ مول نباہنا اے
دیہنیں ونجھلی واہے تے رات گاوے، کوئی روز ایہہ پراہنا ہے


مشکل لفظاں دے معنے

پنڈا۔ جسم ، تن۔چت۔ چیتنا توں ۔ جسم تے پھل بوٹے تے ہور نقش بناونا جیس نوں اجکل ٹے ٹو کہیا جاندا ہے۔آرسی۔ انگوٹھی وچ جڑیا شیشہ، آئینہ جیس وچ زنانیاں اپنا منہ ویکھدیاں ہین۔تنہاں۔ اوہناں، ایہو جیہیاں۔واہن۔ پہلے توں ہل واہی زمین۔ ایس وچ ہل واہنا مشکل ہوندا اے کیوں جے بھوئیں اچی نیویں ہوندی اے۔پنڈا پالنا۔ تن پروری کرنا۔ ویہلیاں رہ کے چنگا کھا کے جسم بناونا۔چوپڑنا۔ کسے تھندی شے (گھیو تیل ) وغیرہ نوں کسے تھاں تے ملنا، جیویں روٹی چوپڑنا، وال چوپڑنا۔پٹے۔ لمے وال، زلفاں۔رن۔ عورت۔توڑ۔ اخیر تیکر۔مول۔ باالکل، ہڈوں۔دیہنیں۔ دن نوں ونجھلی۔ بنسری۔ونجھلی واہنا۔ بنسری بجانا۔پراہنا۔ مہمان۔کوئی روز دا پراہنا۔ کجھ دناں دا مہمان۔

۱۴

رانجھا جوترا واہ کے تھک رہیا، لاہ ارلیاں چھاؤں نوں آوندا اے
بھتا آن کے بھابی نے کول دھریا، حال اپنا رو وکھاوندا اے
چھالے پئے تے ہتھ تے پیر پھٹے، سانوں واہی دا کم نہ بھاوندا اے
وارث شاہ جیوں لاڈلا باپ دا سی اتے کھرا پیارڑا ماؤں دا اے


مشکل لفظاں دے معنے

جوترہ۔ اک دن لئی مقرمتھیا ہویا ہل واہن دا کم۔ارلیاں۔ جولے دے دوناں پاسیاں تے دھون نوں اندر رکھن لئی کلیاں۔ارلیاں لاہنا۔ واہن والے ڈھگیاں یا ہور جانوراں نوں جولے وچوں کڈھنا۔ محاورے موجب، کم ختم کرنا۔بھتا۔ بھوئیں تے کم کرن والے کامیاں دا دوپہر دا کھانا۔بھاوندا۔ چنگا لگدا
کھرا۔ نرول، خال

۱۵

رانجھا آکھدا بھابیو ویرنو نی تساں بھائیاں نالوں وچھوڑیا جے
خوشی روح نوں بہت دلگیر کیتا، تساں پھل گلاب دا توڑیا جے
سکے بھائیاں نالوں وچھوڑ مینوں کنڈا وچ کلیجے دے پوڑیا جے
بھائی جگر تے جان ساں اسیں اٹھے، وکھو وکھ کر چا نکھوڑیا جے
نال ویر دے رکتاں چھیڑ بھابی، سانوں میہنا ہور چموڑیا جے
جدوں صفاں ہو ٹرن گیاں طرف جنت وارث شاہ دی واگ نہ موڑیا جے

مشکل لفظاں دے معنے

ویرنو ۔ دشمن۔وچھوڑیا۔ وکھرا کیتا۔پوڑیا۔ دل وچ ٹھوک دتا، نکھوڑیا۔ وکھرا وکھرا کر دتا۔میہنا۔ طعنہ۔رکتاں۔ شرارت نال بنایا ہویا بہانہ، دلیل، گل۔واگ موڑنا۔ کسے نوں اک خاص پاسے جاون لئی موڑنا، یا واپس موڑ کے لیاونا

۱۶

کریں آکڑاں کھائے کے ددھ چاول ایہہ رج کے کھان دیاں مستیاں نیں
آکھن دیورے نال نہال ہوئیاں سانوں سب شریکنیاں ہسدیاں نیں
ایہہ رانجھے دے نال ہین گھیو شکر پر جیو دا بھید نہ دسدیاں نیں
رناں ڈگدیاں ویکھ کے چھیل منڈا جویں شہد وچ مکھیاں پھسدیاں نیں
اک توں کلنک ہیں اساں لگا، ہور سب سکھالیاں وسدیاں نیں
گھروں نکلیں تے پیا مریں بھکھا، وارث بھل جاون خرمستیاں نیں

مشکل لفظاں دے معنے


آکڑاں۔ آکڑنا توں، ویہرنا، بغاوت کرنا۔ددھ چاول۔ ایہہ پرانیاں ویلیاں وچ بڑا اعلی کھنا منیا جاندا سی۔رج کے کھان دیاں مستیاں۔ یعنی پیٹ بھریا ہووے تے پٹھیاں سدھیاں مستیاں وی ہوندیاں نیں (بھکھے کولوں مستیاں نہیں ہوندیاں)۔دیورے۔ دیور۔نہال۔ خوش ہونا، اک مک ہوکے موج کرنا، ایتھے مطلب ہے دیور نال پھسیاں ہوئیاں نیں۔شریکنیاں۔ برادری دیاں دوجیاں عورتاں۔گھیو شکر ہونا۔ اک مک ہونا (اک جان دو قالب ) شیر و شکر ہونا۔ڈگنا۔ ایتھے مطلب ہے کسے تے پھٹر پنچھی وانگ ڈگ پینا، عاشق ہو جانا، پروانہ وار شمع تے جان دینا۔چھیل۔ چھیل چھبیلا۔ بانکا، سوہنا سندر۔کلنک۔ کالا داغ، بدنامی دا داغ۔سکھالیاں۔ سوکھیاں۔ چین آران نال رہندیاں۔خرمستیاں۔ کھوتے والیاں مستیاں، مطلب، لاپواہی دی موج۔

 

 

 

 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels