Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شاعری >> افضل ساحر >> ہونی

ہونی

افضل ساحر
March 23rd, 2009
5 / 5 (12 Votes)
ہونیے، من موہنیے،
عُمراں دے دھونے دھونیے
تِرے صدقے جاواں
سانوں جمنوں ودھ کے،
کیہ ہور سزاواں
ہر کِکر دی سُول تے،
ساڈا سرناواں
ہُن تے ایویں ہس کے،
تینوں مگروں لاہواں

ہونیے، من موہنیے
تِرے صدقے جاواں

ہونیے، من موہنیے
عُمراں دے دھونے دھونیے،
چل اگّے اگّے
آؤندے نِت بُھچال نی،
ساڈی اِک اِک رگّے
ساڈیاں ناڑاں نال،
کُھوہاں نُوں جالا لگّے
ساڈیاں سوچاں نال،
سمے دے دھولے بگّے

ہونیے، من موہنیے
چل اگّے اگّے

ہونیے، من موہنیے
عُمراں دے دھونے دھونیے
آ لائیے غوطے
جیون دے کالے پانیاں،
اسیں بانے دھوتے
وحشت تے تھرتھلیاں،
ہتھ جوڑ کھلوتے
ویلے دے نمرود نُوں،
اسیں لاؤنا جوتے
ہونیے، من موہنیے،
آ لائیے غوطے

ہونیے من موہنیے،
عمراں دے دھونے دھونیے
لکھ بن جا قہراں
ساڈے لئی رُشنائیاں،
مرگی دیاں لہراں
اسیں مِٹھے شہد وجود وچ،
بھر لئیاں زہراں
دِل آکھے سپ دی رُڈّھ وِچ،
جا جا کے ٹھہراں

ہونیے، من موہنیے
لکھ بن جا قہراں

ہونیے، من موہنیے
عمراں دے دھونے دھونیے
آ رَل کے بہیے
اَتے ہونی ہونی کھیڈ کے،
اِک مِک ہو رہیے
اَتے جگ نُوں ہسدا چھڈ کے،
قبراں وچ بہیے
تے رل دوویں انہونیاں،
ایہہ ہونا سہیے

ہونیے، من موہنیے
آ رل کے بہیے

ہونیے، من موہنیے
تیرے صدقے جاواں

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels