Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> خواجہ فرد فقیر >> سِی حرفی

سِی حرفی

وچار ڈیسک
June 27th, 2009
ا
اللہ بِن غافلا پھِریوں سارا جگ،
راہ بھُلایوئی حق دا دُنیا پِچھے لگ
دنیا کُوڑی چار دِن راہ شرع دا بھال،
فردا، لیکھا لَیسیا رب قادر جل جلال
ب
بدیاں کردیاں دِن گیا سَوں ونجائی رات،
غافل اِک دن آوسی کاٹھ کُہاڑی وات
دولت دنیا مال زر کجھ نہ ویسی نال
فردا، لیکھا لَیسیا رب قادر جل جلال
ت
توبہ دل تھیں نہ کریں زبانی نِت
تسبیح رکھیں مکر دی پھاہی تے دَھر چِت
باہر بانا صوفیہ اندر دغا کمال
فردا، لیکھا لَیسیا رب قادر جل جلال
ث
ثابت دِل تھیں نہ رہیں اِکی دے ول لگ
در در پھِرنائیں بھونکدا بُونڈے لگی اگ
اَوراں مندا کیوں کہیں اپنا آپ سمھال
فردا، لیکھا لَیسیا رب قاد جل جلال
ج
جوانی چار دِن مت ہوویں مغرور
پِیر پیغمبر اولیا سبھ موت لنگھائے پُور
بھٹھ اوہناں دا جیونا اَٹھے پہر جنجال
فردا، لیکھا لَیسیا رب قادر جل جلال
ح
حق حلال پچھان توں نہ کر اِتنا زور
توں کیوں سُتائیں غافلا تینوں کھلہی اُڈیکے گور
توں جا اندھیرے لیٹنا کوئی نہ پُچھے حال
فردا، لیکھا لَیسیا رب قادر جل جلال
خ
خوشیاں کر توں شادیاں بیٹھوں مجلس لا
کُتے نفس پلید دی مَنیّ تدُھ رضا
عُمر گنوائیوئی غفلتے سمبھل لج سمبھال
فردا، لیکھا لَیسیا رب قادر جل جلال
د
دِلا ہوشیار ہو باطن اکھیں کھول
چنگا چاہیں جے ہویا مَندا کِسے نہ بول
ڈِٹھو ای شیطان دا ہویا کیہ احوال
فردا، لیکھا لَیسیا رب قادر جل جلال
ذ
ذِکر خُدائے دا نہ کر ظاہر خلق دِکھا
اندر کر توں بندگی باہر پردہ پا
مُل نہ ویچیں عِلم نوں نہ کرے سوال
فردا، لیکھا لَیسیا رب قادر جل جلال
ر
راضی کر توں رب نوں روزہ حج زکوٰۃ
کلمہ طیّب آکھنا پنجے وقت صلوٰۃ
کرنی ترک حرام تھیں کھاون ڈھونڈ حلال
فردا، لیکھا لَیسیا رب قادر جل جلال
ز
زر اِکٹھا کر کے اوہ کردے زر دا مان
دیندے نہ نمانیاں مردے پَچھو تان
آخر روسن زارزارہوسن مندے حال
فردا، لیکھا لَیسیا رب قادر جل جلال
س
سُنائیں خلق نوں کر کر مسئلے روز
لوکاں دیں نصیحتاں اندر تیرے چور
کیہ ہویا جے لَّدیا گدھا کتاباں نال
فردا، لیکھا لَیسیا رب قادر جل جلال
ش
شامت نفس توں ہر دم کریں گناہ
آپوں راہ نہ آوندا لوکاں دَسیں راہ
دِسّن صورت دوستاں دشمن وڈے کمال
فردا، لیکھا لَیسیا رب قادر جل جلال
ص
صبُوری عاقلاں کیتی بہت پسند
ہور نہ سِکھ نصیحتاں اِکو ایہا پَند
حِرص ہوائیں چھوڑ دے سُن دِل دَیاں کناں نال
فردا، لیکھا لَیسیا رب قادر جل جلال
ض
ضروری چلنا ایتھے ناہیں جا
پنج دِہاڑے جیونا بیٹھوں محل بنا
بھٹھ پئیاں ایہہ عمارتاں چھڈ دے وہم خیال
فردا، لیکھا لَیسیا رب قادر جل جلال
ط
طاقت ناہیں عدل دی کرِیں کریماں فضل
توشہ ناہیں راہ دا سِر تے بھاری مزل
باجھ شفاعت مصطٰفےؐ چھُٹّن بڑا محال
فردا،لیکھا لَیسیا رب قادر جل جلال
ظ
ظلم کریندے خلق تے جیہناں موت نہ یاد
دیندے نہ نمانیاں نہ اوہ ہوون شاد
جیہناں خوف نہ رب دا خوف تیِہناں تھیں بھال
فردا، لیکھا لَیسیا رب قادر جل جلال
ع
عبادت رب دی اندر بہہ کے کر
کہیا نفس شیطان دا دِل تے مُول نہ دھر
رکھیں نظر حلال تے نہ کھا پرایا مال
فردا، لیکھا لَیسیا رب قادر جل جلال
غ
غرورت نہ کرو روؤ ڈھائیں مار
باجھوں عملاں چنگیاں کون لنگھاسی پار
چھڈ دُنیا دے واعدے قول خدا دا بھال
فردا، لیکھا لَیسیا رب قادر جل جلال
ف
فرد فقیرا گودڑی بیٹھوں گل وچ پا
سِر ٹوپی گل سیہلیاں ٹھگاں ویس بنا
غصہ نفس نہ ماریو پھَدوئی جھوٹھا حال
فردا،لیکھا لَیسیا رب قادر جل جلال
ق
قناعت جو کرے ذوق رِزق ہمیش
تقویٰ دولت لے بہے تاں تھیوے درویش
پگڑیں ترک حرام تھیں کھاویں ڈھونڈھ حلال
فردا، لیکھا لَیسیا رب قادر جل جلال
ک
کلام خدائے دی مُلاں پڑھن فقیر
بولن جھُوٹھ تے کھان حرام کیا ہووے تاثیر
نام دھراون شیخ جی ٹُرن اَوّلی چال
فردا،لیکھا لَیسیا رب قادر جل جلال
ل
لَکھاں پڑھدے آدمی ڈنگراں وانگ قرآن
کھاون کیوں حرام نوں حق پرایا جان
تسبیح خرقہ مکر دا اگے اندر جال
فردا، لیکھا لَیسیا رب قادر جل جلال
م
مِیموں مُل وکاوندی اج فقیری ہٹ
اِک پیسے دی اُن لے گل نوں سیہلی وٹ
گیری رنگ لے کپڑے کھول سِرے دے وال
فردا، لیکھا لَیسیا رب قادر جل جلال
ن
نمازاں کیہ پڑھو، نہ کرو رکُوع سجُود
ظاہر کھڑا نماز وِچ اندر ہور غدود
متھے پا محراب نوں اندر دغا کمال
فردا، لیکھا لَیسیا رب قادر جل جلال
و
واری جاواں تیہناں تھوں جیہڑے پیِر سدان
ہتھ وچ لیندے مورچھڑ پھردے وچ جہان
وانگوں شیطاں خلق نوں رانن گلاں نال
فردا، لیکھا لَیسیا رب قادر جل جلال
ہ
ہدایت رب دی جیہناں ہوئی آ
کرن عبادت بندگی دُنیا دِلوں بھُلا
رکھن نظر حلال تے نہ تکن پرایا مال
فردا، لیکھالَیسیا رب قادر جل جلال
ل
لاموں لعنت کافراں ہور کراڑاں دیہہ
نالے پِچھوں ظالماں تریہاں دے سِر کھیہہ
غِیبت خودی تکبری ایماں کرن زوال
فردا، لیکھا لَیسیا رب قادر جل جلال
ا
اَوّلے راہ تے نہ کر ذرا خیال
چھڈ دُنیا دیاں کاراں سدھا راہ سمھال
سِدھے راہ تے جو چلے سَوئی جان نہال
فردا، لیکھا لَیسیا رب قادر جل جلال
ی
یاری کر توں رب دی ہور یار دُنی دے کُوڑ
من محمد مصطفٰی لنگھیں پہلے پُور
چوَنہہ یاراں دی دوستی من نبیؐ دی آل
فردا، لیکھا لَیسیا رب قادر جل جلال

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels