Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شاعری >> نیاز احمد عاجز >> سسی دے دوہڑے 13

سسی دے دوہڑے 13

نیاز احمد عاجز
June 27th, 2009
آہ و فغان سسی
تھل مارو دیاں ٹبیاں اُتے سسی چڑھ چڑھ ویہندی راہواں
چار چوفیرے اجاڑ وسنیدی ہائے یار نئین وسدا ساہواں
ہاہ دے نعرے پئی مریندی سسی کر کر کھلیاں باہواں
نیازؔ اودوں جھب موڑ مہاراں کتے تڑف کے نہ مرجاواں

آ و فغان سسی
آوے ماہی چھڈ بے پرواہی آویکھ تتی دا حال حالا
نازک کلیاں وانگوں نازک تلیاں اتے پے گیا سو سو چھالا
دوزخ وانگ تتا تھل مارو میرا تیں بن بچن شالا
نیاز محمد کدی کسے ونج یار نہ وچھڑن شالا

آہ و فغان سسی
آوے ماہی چھڈ بے پرواہی بنی دل نوں بہوں مجبوری
نہ کر دورے چھڈ مزدوری چناں چھڈ نہ پریتا دھوری
ساہ دا نیئں وساہ کوئی سجناں آ مل اک وار ضروری
نیازؔ نصیب جنہاندے چنگے ہوندی آس انہاندی پوری

قربان جاواں انہاں زلفاں کولوں جیہڑیاں ریت تتی وچ رلیاں
نال شوقاں سانبھیاں سسی پیاں رلدیں نے اج ککھیاں
ہک ہک زلف دا مل کی دساں پیاں رلدیں نے آن ملاں
حالت نیاز انہاندی ایہو جیہڑی صورت ویکھ کے بھلیاں

نشان پاہوتاں
اچن چیت سسی دے تائیں آیا کھوج نظر شتراں دا
کر کے طواف کھرے دا سسی جویں ادب مکے دی تھاندا
مجنوں قدم کتے دے چمکے سسی چمدی کھوج اٹھاندا
نیازؔ میاں اوہ تاں عشق دا کعبہ جتھے عاشق جاسیں جھکاندا

ناشاد سسی
کھوجیاں وانگوں بیچاری سسی وتے لبھدی کھول اٹھاں دے
قدم قدم اتے کر کر سجدے سسی لبھدی راہ سجناں دے
بے پرواہ نال نیو نیڑے لاکے سسی پے گئی پیش غماں دے
نیاز انہاں نال ہوندی ایویں جہاندے سڑ نصیب جہاندے

دیدن سسی عیال بابا
اچن چیت سسی دے تائین آیا نظر ہک عیال اے
عیال خیال پچھن دا کیتا پچھاں اس توں حال احوال اے
دسدی بہت حسین زنانی کوئی مرد نہ اس دے نال اے
نیازؔ عورت ہے یا کوئی آفت خوب کرا ں اہدی بھال اے

ہم کلام عیال با سسی
کون کوئی کی ہے نام تیرا اے کیوں کرنی ایں حال دہائی
آدم ذات یا بھوت بلا ایں یا حور پری ایں کائی
سخت جگہ اے تھل مارو دی ایتھوں ڈردی کل خدائی
نیاز میاں ایتھے کوئی وی نہ آوندا تو کس مطلب لئی آئی

جواب سسی دیگر
اے بابا میرا نام ہی سسی ماری ہوئی آن دکھاندی قسم خدادی
تقدیر غریب کنگال چا کیتا پر ہاں مالک وطناں دی قسم خدا دی
قِسمت جا پردیسی کیتا پر ہاں مالک وطنا دی قسم خدا دی
نیاز میں ہر شے نوں کنڈ کر کے ہوئی آن نوکر بے پرواہ دی قسم خدا دی

جواب سسی دیگر
اے بابا میں تیرے تائیں دساں کی نصیباں ماری
طاقت نئیں بولندی رہ گئی میری ہوئی اے زبان بیچاری
آپ بھلی تاں میں تھل وچ رلی سر بنی ہے مصیبت بھاری
نیازؔ میاں اوہو رلدیاں جنہاں لائی بے پرواہ نال یاری

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels