Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شاعری >> نیاز احمد عاجز >> سسی دے دوہڑے 12

سسی دے دوہڑے 12

نیاز احمد عاجز
June 27th, 2009
سیّاں کہن سسی نوں لگیاں نی توں کیوں دس ہو گئیوں جھلی
باغ بہاراں چھوڑا سسئے کیوں تلی مارو ول چلی
لمبڑے سفر تھلاندے بھنیاں مردی میں ہک کلی
یار نیاز اہ مول نہ ڈولن جنہاں توں دیوے چا عشق تسلی

جواب سسی
روکے کہن سیّاں نوں لگی میں تاں برسر کیچ نوں جاؤنا
نال پیار دے مل لو بھیناں میں تاں واپس مول نہ آؤنا
صرفجہ جان دا کرکے سیو میں تاں عشق نوں داغ نئیں لاونا
نیاز محمدؔ فرض میرے تے سر دے کے یار مناؤنا

طعنے زدی کردن سیّاں
سیّاں رو رو کہن سسی نوں بھیناں من ساڈی گل توں
اوکھے پندھ تھلاندے سیئے بھیناں مول نہ جاتوں تھل نوں
سڑ دی بلدی ریت تھلاندی وچ ساڑ نہ نازک کھل نوں
نیازؔ میاں سچ کہن سیانے پہلے گل کے پائی دا گل نوں

جواب سسی
ہائے نی سیو میرا ککھ نہ رہیا گھر بار تے نہ کوئی ماپے
یار آہا میں اک تتڑی دا اوہ وی سوں کے کھڑا لیا آپے
ہور کسے نوں دوس کی دیواں گل پالے آپ سیاپے
نیاز میاں اوتھے ککھ نئیں بچدا جتھے عشق مریندا چھاپے

تھل دے راہ وچ پے گئی سسی اس مول نہ ہمت ہاری
یار بلوچ نوں ملساں راہے ایہو دل وچ نیت جاری
قدم قدم تے ڈگ ڈگ پوندی سر بنی مصیبت بھاری
نیازؔ ہمت اوتھاں مول نہ ہارن جنہاں چوٹ عشق نے ماری

نال یقین دے ٹُر پئی سسی آ تھل وچ قدم ٹکایا
ہک ریت تتی دوجی پیروں ننگی تیجا یار دی ذات ستایا
ڈگ دی تے غش کھاندی سسی جوش تھیں ہوش بھلایا
نیازؔ میاں اوہ مول نہ ڈولن جنہاں عشق جھولی وچ پایا

قعاں سسی
عشق تیرے مجبور چا کیتا میں باجھ تیرے گھبرا گئی
باغ بہاراں چھوڑ کے سجناں میں تھل مارو وچ آگئی
جان نہ جان اوہ تیری مرضی میں اپنا توڑ نبھا گئی
نیازؔ بھنبھور نوں چھڈ کے سسی جھنڈا عشق دا تھل وچ لاگئی

فغان سسی
آ ونج یار پایر نہ توڑیں تیری ہوکے پئی کھانیاں دھکے
باجھ تیرے میری کوئی نہیوں سندا بھاویں جا لوکاں وچ مکے
چھڈ گئے یار ستی نوں جیہڑے سسی آس انہاندی رکھے
نیاز انہاں نوں برسر ملدا ہوندے صدق جہاندے پکے

ناشاد سسی
گل وچ لیراں تے حالی فقیراں سسی کونج وانگن کرلاوے
سروچ خاک تے چاک پوشاک سسی رو رو حال ونجاوے
ریت تتی وچ خاک تے چاک پوشاک سسی رو رو حال ونجاوے
ریت تتی اتے کر کر سجدے سسی رٹھڑا یار مناوے

ناشاد سسی
تھل مارو دیاں بٹیاں اتے سسی چڑھ چڑھ یار پکارے
کیچ دے ول منہ کر کے یارو سسی سد وراگ دے مارے
قیمت باجھ تاں ککھ وی نیئں لبھدا سسی لبھدی اے ادھارے
نیاز میاں ایہہ بھی سستا سودا نئی سر دیکے ویکھ نظارے

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels