Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شاعری >> نیاز احمد عاجز >> سسی دے دوہڑے 11

سسی دے دوہڑے 11

نیاز احمد عاجز
June 27th, 2009
5 / 5 (2 Votes)
اتھ نی سسئے چھوڑ نیندر نوں تیرے ملک الموت اج نی
ہوشیار تے جاگ سویرے کیوں ستیاں لال کھڑائیے نی
کرلے جو کجھ کرنائی سسئے تیرے وقت حساب دے آئے نی
نیاز انہاندا بدلہ دیسیں جیہڑی خوشی دے وقت لنگھائے نی

نال سہاگ دے ستی سسی سارا دل دا فکر مٹا کے
اک یار دی جھولی دوجی سیج پھلاندی تیجا عمر دی جاگ نبھا کے
جوش نہ ہوش سسی نوں کوئی ستی اپنا آپ بھلاکے
نیاز لگی نہ خبر سسی نوں کیچی لے گئے یار اٹھا کے

لے کے خان بلوچ پنن نوں کیچی طرف کیچم دے ہٹ گئے
نازک دلدیاں نازک کلیاں اوہ تڑوڑ مروڑ کے سٹ گئے
بوٹے آس امیداں والے اوہ اکھیڑ جڑیاں تھیں پٹ گئے۔
تقسیر نیاز سسی دی یارا اوہ ساڑا اجاڑ کے نٹھ گئے

نال خوشی دے ستی سسی اتھی ابھڑ بھاندی بہوں کرلاندی
نہ اوہ خوشبو یار سجن دی نہ اوہ باہاں سرہاندی سیج پھلاندی
ہو گئی کمی مول نہ سنبھلی ہو گئی ریت تھالندی جان جلاندی
نیازؔ جے عشق حقیقی پاندی خود پنوں ہو جاندی شگن مناندی

مطبوعہ دوہڑے
نال خوشی دے سوں گئی سسی یارو دل دا مقصد پاکے
اک یار دی جھولی دوجی سیج پھلاندی تیجی عمر دی جاگ نبھاکے
عاشق مول نہ سوندے سسئے توں سو گئیوں عشق بھلا کے
نیازؔ بھلاہن عشق کی کرسی ذرا سسی نوں ویکھ جگا کے

نال خوشی دے سوں گئی سسی کرلوں شتر بلوچ سے لاگئے
یاری دا قدر انہاں مول نہ جاتا جیہڑی ستی سسی نوں چھڈ گئے
دھوکے باز بلوچ کیچم دے کر نال سسی دے حد گئے
نیاز اوہدے پلے ککھ نہ چھڈیا بس رون جوگی چھڈ گئے

اٹھ نی سسی چھوڑ نیندر نوں لیا سوں کے لال کھڑا توں
کھول اکھاں تینوں رب دیاں رکھاں ذرہ عشق دا جوش وکھا توں
چھوڑ خیال سون دا جھلئے ہن لگیاں توڑ نبھا توں
نیازؔ عشق نوں داغ نہ لاویں سر دے کے یار مناتوں

نال پریم دے ستی سسی تے وین کریندی اٹھی
کرے دہایاں وانگ سودائی جویں یار چوراں دی مٹھی
رو کے کہے سہیلیاں تائین میری پینگ ہلاریوں ٹٹی
نیازؔ کی دوس کسے نوں دیواں میری ہوئی تقدیر پُٹھی

طعنے دین سسی نوں سیّاں تینوں ہٹکیا سی لکھ واری
نال پیار سی بہوں سمجھایا لاویں نال بلوچ نہ یاری
آکھاں مول نہ منیائی ساڈا ہن بنی ہوئی مصیبت بھاری
نیازؔ عشق نوں مت اوہ دیون ہے مت جنہاندی ماری

جواب سسی
تڑف جواب دتا پھر سسی مینوں کیویں تساں لیا گھبرا اے
دو جیاں گلاں تسیں وت کریائے مینوں کیچ دا دسو راہ اے
عقل تہاڈی اوتھے کم نئیں کر دی جتھے ماملے دی جا اے
نیاز محبوب دی صورت وچوں مینوں دسدی ذات خدا اے

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels