Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شاعری >> نیاز احمد عاجز >> سسی دے دوہڑے 10

سسی دے دوہڑے 10

نیاز احمد عاجز
June 27th, 2009
رفتن قاصد بطرف پنوں
ٹُرپیا قاصدے پروانہ آرنجیا شہر بھنبھور اے
ملیا آن پنوں دسے تائیں بڑے ادب تعظیمی طور اے
بعد کلام سلام دے قاصد تے عرض کرے ہتھ جوڑ اے
نیاز میں قاصد باپ تیرے جس باپ نوں تینڈی لوڑ اے

نال میرے توں جے کر جاسیں تیرا عیداں باپ مناسی! خوشی ہوسی
جے نہ جاسیں تے پچھتاسیں اوہ رو رو کے مر جاسی! تے غم کھاسی
باپ تیرے دے تخت دے اتے دس کیہڑا راج کماسی! جے اوہ مرجاسی
اٹھ بہوں نیاز آپاں جلدی چیئے اوہ راہ تکندا راسی تے گھبراسی

جواب پنوں
کہن لگا وَت قاصد تائیں یارا سن میری تقدیر اے
جاون میرا بہت اکھیرا مینوں کیتا عشق فقیر اے
تاج تخت سب ملک تہاڈی جاؤ سانبھو کل جاگیر اے
نیاز انہاں نوں سب کجھ ملیا ہوندا عشق جنہاندا پیر اے

کلام حضور
صدائے پنوں پیش حضرت عشق
اے عشق میری فریاد نہ بن ناشاد نہ ہو برباد نہ کر
رہنے دے مجھے بس رہنے ہی دے پھر بھولے ہوئے کویاد نہ کر
ڈوبا ہوں ہجور حیرت بھی جہاں متحیر ہے
آباد ہوں گر برباد نہ کر برباد نہو گر آباد نہ کر

نامہ پنوں بطرف پدر
اے باپ میرے تیرا صاحبزادہ جہنوں کیتا عشق شہید اے
عرض کراں تینوں نال ادب دے میرے ملن دی چھوڑ امید اے
تاج تخت دی لوڑ نہ مینوں میری ہر دم ایتھے عید اے
یار نیازؔ انہوں لکھ لکھ عیداں جیہنوں یار سوہنے دی دید اے

نامہ نوں دیگر
تو ناراض نہ ہوویں بابا تینوں مڑ مڑ پیا ہتھ جوڑاں
قسمت نال ماہی مینوں ملیا وس چلدے مول نہ چھوڑاں
قسم خدا دی دو جگ اندر مینوں یار ایسے دیاں لوڑاں
یار نیازؔ میں کافر ہونا جے یار ولوں ملک موڑاں

لے کے خط پنن دے کو لوں ہویا قاصد جلد روانہ
شہر کیچم وچ آگیا قاصد دل کر کر بہت نمانا
شاہ دے ہتھ وچ خط پکڑایا بس بدلیا ہور زمانہ
نیازؔ روندا تے پچھتاوندا جد کھول ڈٹھا پروانہ

رعب دے نال رعیت تائیں دیندا آڈر سخت سنا اے
کان بلوچ نوں جلد لیاؤ نئیں تاں دسیں سخت سزا اے
جلدی جاؤ دیر نہ لاؤ میرا دل گیا گھبرا اے
جے کر یار نیازؔ نہ لیا سو تساں دیساں مار مکا اے

فکر پیا ہن سبھناں تائیں ہو گئے بہو مجبور اے
حیلہ کریئے تے کہیڑا کریئے گئے مارے بے قصور اے
یار نیازؔ جے جاویئے ناہیں دیسی مار اے پہلے پور اے
رل مل کے سب کرن صلاحاں ہن چلئے جلد ضروری اے

ہو مجبور بلوچ کیچم دے ہوئے طرف بھنبھور تیار اے
کر کے سلام اس شاہ دے تائیں ہوئے شتراں تے اسوار اے
منزل ختم کیتی انہاں ساری لنگھے گھاٹ پتن تھیں پار اے
نیاز کی دس انہاندے آہا ساری عشق ظالم دی مار اے

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels