Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> بابا فرید >> کہے فرید >> بابا فرید: در درویشی

بابا فرید: در درویشی

August 8th, 2009
5 / 5 (1 Votes)

در درویشی گا کھڑی ، چلّاں دُنیا بھَت
بنھ اُٹھائی پوٹلی کِتّھے ونجاں گھت

اوکھے لفظاں دے معنے

دَر:دروازہ۔ راستہ۔ منزل
گاکھڑی: اوکھا۔ تکلیف دہ
بَھت: وانگوں۔ ورگا
بنّھ : بندھ کے۔
پوٹلی: پنڈ۔
ونجاں: جاواں
گھت: پا کے۔

 

سدھا مطلب

درویشی دا راہ تے منزل بڑے اوکھے ہین۔میں دنیا وانگ چل رہیا ہاں

میں جیہڑی  پنڈ چکی ہوئی ہے، ایس نوں کتھے سٹاں؟

 

کھلارواں مطلب

بیت دا بوہا کھلدیاں ہی سانوں دس پا دتی جاندی ہے جو ایس وچ کوئی شک شبہ نہیں جو درویشی دا راہ اوکھا ہے۔گاکھڑی دا مطلب اوکھا ہے پر گاکھنا دا مطلب تولنا تے نتارنا وی ہے۔ پر دوہاں صورتاں وچ ہی مڈھلا سچ ایہو ہے جو درویشی دا حیاتی ڈھنگ اوکھا ہے۔ پر ایس وچ اوکھ ہے کیہ؟

 

مڈھلی اوکھ تے دنیا دے جیون  ڈھنگ وچ  ہے۔ بیت دے دوجے مصرعے وچ دنیا دے جیون ڈھنگ بارے دسیا گیا ہے جو ایہہ اک پوٹلی دا بناونا تے اوس نوں چُکی پھرنا ہے۔ ہن اوس پوٹلی نوں کوئی کیویں تے کتھے سٹے؟ ایس پوٹلی دا سٹنا ایس لئی اوکھا ہےجو دنیا دار لئی زندگی دا ایہو حاصل ہے، ایس توں بنا اوہ زندگی دا سوچ ہی نہیں سکدا۔

 

ایس پوٹلی وچ دنیا وچ مارا ماری کرکے بنایاں وستاں ہین، اولاد تے انگ ساک ہین جیہناں لئی بندہ باقی جہان دا حق مارن لئی ہر ویلے تیار رہندا ہے۔ مال متاع دا جوڑنا وی دنیا نال مقابلے بازی لئی ہوندا ہے تے ایس مقابلے بازی وچ ہر دوجا بندہ وَیری ہے۔ ایس لئی دنیا داری دا مڈھ ہی دوجے انساناں نالوں وکھرپ تے وچھوڑے دا ہے۔ ایہہ دنیا داری دی کھیڈ دا مڈھلا قانون ہے۔

 

دنیا داری دی کھیڈ وچ بال بچہ وی مالکی دا حصہ ہین۔ 'میرا پتر'  'میری دھی' میری میری میری ہی سب پکھاں تے بھارو ہے۔ بندے دی مالکی وچ پتر دھی انگ ساک باقی وستاں طرحاں وستاں ہی ہین جیہڑیاں منڈی وچ دوجیاں وستاں دا مقابلہ کر رہیاں ہین۔ ایہناں وستاں دا مالک چاہوندا ہے جو اوہدا مال سب توں ودھیا، لشکدا ، تے ودھ مُلا ہووے۔ ایس لئی اوہ اپنے مال نوں لشکان چمکان لئی وڈیاں وڈیاں سکولاں وچ گھلدا ہے، اوہناں نوں شنگھارن دے ڈھنگ پیدا کردا ہے۔ ایس وچ اوہناں وستاں (اولاد انگ ساک) دی اپنی بھلیائی کوئی ایڈی ضروری نہیں، اوہناں نوں دوجیاں دیاں اجیہیاں وستاں نوں ودھیا بنا کے اپنی "میں " دی تسلی کرنا مڈھلی گل ہے۔ سو دنیا دی پوٹلی اول آخر "میں" دی پوٹلی ہے۔

 

"میں" دی پوٹلی ہی بندے دی ہوند ہو جاندی ہے، اوہدی شخصیت بن جاندی ہے۔ جے اوہدی "میں" نوں کوئی ڈھاہ دیوے یا اوہ ڈھٹھ جاوے تے بندے نوں لگدا ہے اوہ مر گیا ہے۔ ایسے لئی ایس پوٹلی نوں سٹنا اوکھا ہی نہیں ناممکن ہوون دے لاگے ہے۔ ایسے پوٹلی چکن نال دنیا دے غم تے خطرے جڑے ہوئے نیں۔

 

بابا گورو نانک تے اوہناں دا گائیک سنگی مردانا جنگل وچ گذر رہے ہین۔ بابا اگے اگے تے مردانا پچھے پچھے۔ مردانے نوں اک سونے دی ڈلی لبھ جاندی ہے تے اوہ چک کے کھیسے وچ پا لیندا ہے۔ کجھ دور جاکے مردانا بابے نوں کہندا ہے "بابا مینوں ڈر پیا لگدا ہے"  بابا کہندا جو چکیا ای اوہ سٹ دے ڈر لتھ جاوے گا۔

 

بابا فرید کوئی جنگل واسی جوگی نہیں سن۔ اوہناں نے ویاہ کرکے اولاد پیدا کیتی تے جیویں تیویں گھر گرہستی وی چلائی۔ ایس لئی اوہناں نوں دنیا دی پوٹلی چکن تے سٹن دا گوڑھا پتہ سی۔ ایسے لئی اوہناں کدی کوئی مال متاع جائیداد نہیں بنائی۔ اپنے دھی پتراں لئی کوئی اجیہا کم نہیں کیتا جیہڑا ساری سنگت لئی نہ ہووے۔ جے سنگت جنگل دے ڈیلے ابال کے بنا نمک دے کھا رہی ہے تے گھر دا ٹبر وی اوہو کجھ کھا رہیا ہے۔

 

اوہناں دیاں دھیاں پتراں نوں اوہناں دی وڈیائی دا کوئی لابھ نہیں سی۔ایسے لئی ڈھڈ پالن لئی اک پتر نے واہی بیجی کر لئی سی تے دوجا  فوج وچ بھرتی ہوکے چلا گیا سی۔ سگوں بابا فرید دے پتر اوہناں کولوں عاجز سن کیوں جو شہر دا قاضی تے حاکم بابا فرید دے وچاراں پاروں اوہناں دی اولاد نوں جیون نہیں سی دیندا۔ اوہناں دے اک پتر نوں نکے ہوندیاں ہی مار وی دتا گیا سی۔

 

ایس پچھوکڑ وچ ویکھو تے درویشی دے راہ دی اوکھت دا پتہ لگدا ہے۔ بابا فرید چاہندے تے اپنے تے اپنی اولاد لئی ویلے دے حاکماں کولوں بہت کجھ لے سکدے سن جیویں ملتان دے بہاءالدین ذکریا ملتانی ہوراں کیتا ہویا سی تے صوفی اکھواؤندیاں وی بادشاہاں وانگ زندگی گذاردے سن۔ پر بابا فرید نے دنیا وچ رہ کے دنیا نوں وکھایا جو درویشی دا راہ کیہ ہے تے پوٹلی نوں کیویں سٹیا جا سکدا ہے۔   


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels