Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاسک >> بابا فرید >> کہے فرید >> کہے فرید: جے تُوں عقل لطیف ، کالے لِکھ نہ لیکھ

کہے فرید: جے تُوں عقل لطیف ، کالے لِکھ نہ لیکھ

February 23rd, 2010
5 / 5 (1 Votes)

جے تُوں عقل لطیف ، کالے لِکھ نہ لیکھ
آپنے گریوان میں سِر نِیواں کر دیکھ

اوکھے لفظاں دے معنے
عقل لطیف: بریک جہی عقل۔ کالے لِکھ: سیاہ اعمال نامے۔ لیکھ: قسمت۔ آپنے: اپنے۔ گریوان: گریبان گلماں۔ نِیواں کر: نیواں کرکے۔

بیان
فرید دا ایہہ دوہاں سدھ پدھرا جیہا دسدا ہے پر اونا سدھا ہے نہیں۔ سدھی گل تے ایہہ ہے جو تیری عقل باریک ہے، تے توں اپنی بھیڑی قسمت والے کم نہ کرکے۔ ایس لئی توں اپنے گریبان وچ سر نیواں کرکے اپنیاں چنگیاں مندیاں لکھ لے۔ ایس بند دی روایتی پڑھت وی کجھ انج ہی ہے جو جے توں عقل والاں ہیں تے ایہو جیہے عمل نہ کر جو اگلے جہان تیرا اخیر بھیڑا ہووے۔ ایس لئی توں اپنے اندر ویکھ لے مطلب اپنیاں نیکیاں بدیاں نوں ویکھ لے۔

پر مسئلہ ایہہ ہے جو روایتی پڑھت بڑی موٹی عقل دی گل ہے۔ ہر کوئی کہندا پھردا ہے جو نیک عمل کماؤ تے جنت جاؤ۔ پر ایس طرحاں دی پڑھت وچ دوجا مصرعہ ٹُھکدا نہیں۔ بڑا کھچ دھرو کے اسیں اوس نوں واڑ سکدے ہاں پر گل بندی نہیں کیوں جو عام طور تے محاورہ ایہہ ہے جو دوجیاں تے ٹوک مارن توں پہلاں اپنے گریبان وچ منہ پا کے ویکھ لوو۔ سو مطلب ایہہ ہویا جو ایتھے گل چھڑی اپنے عملاں دی ہی نہیں دوجیاں بارے وی وی ہو رہی ہے۔

جے گل دوجیاں بارے ہو رہی ہے تے فیر پہلے مصرعے دا مطلب بدل کے ایہہ ہو جاندا ہے جو جے توں باریک عقل والا بندہ ہیں تے فیر دوجیاں تے فتوے دین توں پہلاں اپنے آپ نوں وی ویکھ لے۔ مطلب اپنے اندر دے پاڑاں نوں ویکھ جو کیوں چنگا مندا اک تھاں نال نال چلدا ہے۔ ایویں ہی دوجیاں دے اندر ہو رہیا ہے تے جے اج جے کسے دا بھلک کالا دس رہیا ہے تے کل چانن وی ہو سکدا ہے۔

اصل گھنڈی "عقل لطیف" مطلب باریک سمجھ وچار وچ ہے۔ باریک سمجھ دا کم ہی ایہو ہے جو جیس گل نوں لوک موٹا موٹا سمجھ کے اگے ٹُر پیندے ہیں باریک عقل اوسدے اندر لکے اک اک انگ نوں نکھیڑ کے ویکھدی ہے تے اوسدا ویروا کردی ہے تے فیر اوسدے سٹے کڈھدی ہے۔ ایس لئی جے عقل باریک ہے تے اوس نے اندر دے پاڑاں نوں ویکھ کے لیکھ لکھے ہون گے۔ فرید ہوریں کہندے ہین جو جے عقل لطیف ہے تے فیر اوہ کالے لیکھ نہیں لکھ سکدی مطلب دنیا تے اوس دے بھلک بارے منفی یا بھیڑی گل نہیں کر سکدی۔

دوجے مصرعے وچ ایسے عقل لطیف نوں کہیا گیا ہے جو ایس نال پہلاں اپنے آپ نوں ویکھ۔ مطلب ایہہ ویکھ جو توں کیہ سیں تے توں کیہ بنیا۔ یا ایہہ جو کیویں اگے ودھو تے پچھونہے وچار تیرے اندر سن تے توں کیویں اگے ودھیاں۔ تے جے توں اگونہا ہو سکنا ہیں تے ایہو فارمولا دنیا تے وی لگے گا: دنیا وی اپنے اندر دے پاڑاں پاروں اگے ودھے گی تے چنگی ہوندی جاوے۔ تے ایہو گل تاریخ دے عمل تے لگے گی۔ ایس لئی ایہہ کہنا جو گذریا کل یا اج آؤن والے زمانے توں چنگے ہین درست نہیں ہووے گا۔

ایتھے فرید ہوریں روایتی کہانیاں نوں رد کر رہے ہین جیہناں دے مطابق آؤن والا ویلا بھیڑا ہووے گا۔ کوئی اوس نوں قیامت دا ناں دیندا ہے تے کوئی کلجُگ دا۔ پر ایہناں ساریاں دا تت ایہو ہوندا ہے جو آون والا کل ویران تے ٹھٹھوا والا ہووے گا۔ فرید ہوریں ایتھے ایس وچاردھارا نوں رد کرکے ایس دے الٹ نظریہ دے رہے ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels