Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    


مُڈھلا ورقہ >> شاہ مُکھی وچار >> شاعری >> مسعود منور >> آپ مارو بمبار دی وار

آپ مارو بمبار دی وار

February 7th, 2010
5 / 5 (7 Votes)

لہو دا مینہہ ، دھماکے ، چیکاں
بھُگتے ساری قوم تریکاں

خُود کُش بمباراں دے دھاڑے
نیم مسیتڑ ، ہتھ کُہاڑے

ڈالر دے بھا رب پئے ویچن
اسماناں دا قد پئے میچن

وِگڑ گیا اِس دیس دا آوا
کفر کرے اِسلام دا دعوا

ہر پاسے ہنجو تے ہاہواں
لاشاں اُتے روندیاں ماواں

بالک دُدھاں دے تریہائے
رو رو کردے ہائے ، ہائے

اُجڑ گئے چانن دے ڈیرے
ماڑیاں کوٹھے ، گھُپ ہنیرے

ہر شے نوں اَگ لگی ہوئی
قوم دے نال کیہ ٹھگی ہوئی

۔۔۔۔
دہشت واد دے ہلکے کُتّے
پاکستان نوں وڈھ کے سُتّے

بے درداں دیاں سُتھناں لاہ کے
ماراں گِن گِن سو سو جُتّے

دیس دا کنجراں ککھ نہ چھڈیا
ویکھو ، کر گئے ہیٹھلی اُتّے

پیلیاں وچ لاشاں دیاں فصلاں
خانہ جنگی ، امن دی رُتّے

فرقو فرقی کر چھڈیا نیں
لا لا کے ملوانیاں لُتّے

مرداں دی پگڑی دے ہیٹھاں
لمک ، لمک، کھُسرے دیئے گُتّے

۔۔۔۔
کُتّا ، کُتے دا ویری سی
ہُن بندہ ، بندے دا ویری

کھا گئی سیم سیاست ، زِمیاں
بھانویں چاہی ، بھانویں نہری

وِک گئیاں بھُکھیاں دیاں جھُگیاں
اُسر گئی شاہواں دی کٹہری

چوراں ، پُلس بنا لئی اپنی
قاتل ،ڈاکو کرن کچہری

افسر لُٹدے ، لیڈر لُٹدے
چیکے ساری رات ٹٹہری

ملوانے وی مال دے مُلّا
بھانویں پینڈو ، بھانویں شہری
۔۔۔
امریکا دیاں بینکاں دے وچ
لُٹ دا مال لُکاون والے

لندن دے وچ مہنگے ، مہنگے
بنگلے ، محل اُسارن والے

رشوت لیندے ، رشوت دیندے
رب دا نام ، چِتارن والے

دُکھ غریب دا ونڈ نہ سکدے
رو رو ڈھاہاں مارن والے

نکیاں بالاں دا لہو ویچن
جنت ٹکٹ کٹاون والے

قوم دے دشمن ، دین دے دشمن
دیس دے مُڈھ ، آئین دے دشمن

ویری ، حاکم بن کے آگئے
پاکستان نوں لُٹ کے کھا گئے

شکلوں لگن ، انت سیانے
عقلوں انھے ، لولھے ،کانے

لیڈر بن گئے دیس دھروہی
ساڈے نال ان ہونی ہوئی

ربّا! ساڈا دیس بچا لئے
چور تے ڈاکو ، کول بُلا لئے
۔۔۔۔۔۔۔۔۔۔۔۔۔۔۔۔۔۔





Share |

 


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels